ສປປ ລາວ ເຕັມໄປດ້ວຍຊັບພະຍາກອນທີ່ອຸດົມສົມບູນ ມີທັງປ່າໄມ້ຂຽວງາມ ສັດປ່ານາໆຊະນິດ ແລະ ນໍ້າຕົກຕາດທີ່ຫຼາກຫຼາຍ ຄຽງຄູ່ໄປກັບເມືອງ ແລະ ໝູ່ບ້ານທີ່ສ່ວນໃຫຍ່ຍັງມີກິ່ນອາຍຂອງອານານິຄົມຝຣັ່ງ, ໂດຍມື້ນີ້ ອິນໄຊລາວ ຈະມາແນະນຳສະຖານທີ່ທ່ອງທ່ຽວ ທີ່ຢາກໃຫ້ທຸກຄົນໄດ້ໄປລອງສຳພັດເບິ່ງ ເພາະນອກຈາກສະຖານທີ່ທ່ອງທ່ຽວທີ່ເປັນທີ່ຮູ້ຈັກແລ້ວ ກໍຍັງມີສະຖານທີ່ທ່ອງທ່ຽວ ທີ່ຍັງບໍ່ເປັນທີ່ຮູ້ຈັກ ຫຼື ເປີດໃໝ່ ເຊິ່ງຈະມີບ່ອນໃດແນ່ໄປເບິ່ງນຳກັນເລີຍ.
ພາກເໜືອ
ນໍ້າຕົກຕາດສະແນນ (ແຂວງ ໄຊຍະບູລີ)
ນ້ຳຕົກຕາດນີ້ຕັ້ງຢູ່ ບ້ານນ້ຳດັ້ນ ເມືອງ ບໍ່ແຕນ ແຂວງ ໄຊຍະບູລີ ນັບແຕ່ເມືອງໄປຫາ ບ້ານນ້ຳດັ້ນ ໄລຍະທາງແມ່ນ 10-11 km ໂດຍຕ້ອງຜ່ານບ້ານນ້ຳພຸ, ເມື່ອທ່ານຮອດເຂດບ້ານ ນ້ຳດັ້ນແລ້ວ ແມ່ນສືບຕໍ່ເດີນທາງໄປທາງທິດຕາເວັນຕົກຂອງບ້ານ ໄລຍະທາງ ຫາ ບ່ອນຈອດລົດແມ່ນ 9 km ໃນເສັ້ນທາງຫຼຽ້ວໃຫຍ່ແຕ່ລະບ່ອນນັ້ນຈະມີປາຍບອກທາງ ເມື່ອເຖິງບ່ອນຈອດລົດແລ້ວທ່ານຕ້ອງຍ່າງຜ່ານປ່າ ແລະ ຫ້ວຍ ໄລຍະທາງ 500 m ຫຼັງຈາກນັ້ນຈະມີ ທາງແຍກ ລະຫວ່າງຕາດນ້ອຍ ຫາ ຕາດໃຫຍ່.
ເກາະດອນຊາວ (ແຂວງ ບໍ່ແກ້ວ)
ສະຖານທີ່ທ່ອງທ່ຽວແບບຜ່ອນຄາຍ ຖ່າຍຮູບຫຼິ້ນແຫ່ງໃຫມ່ ທີ່ເກາະດອນຊາວ ເມືອງຕົ້ນເຜິ້ງ ແຂວງບໍ່ແກ້ວ ເປັນອີກໜື່ງສະຖານທີ່ ທີ່ໄປແຂວງບໍ່ແກ້ວ ຫ້າມພາດ.
ຕາດແກ້ວ (ແຂວງ ຫຼວງນໍ້າທາ)
ຕັ້ງຢູ່ ປ່າສະຫງວນແຫ່ງຊາດນໍ້າຫ້າ ເມືອງ ສິງ ແຂວງ ຫຼວງນ້ຳທາ ຖ້າໃຊ້ເວລາຍ່າງໄປໄລຍະທາງຈາກທາດຊຽງຕືງໄປຮອດຕາດປະມານ 1-2 ຊົ່ວໂມງກວ່າ.
ພູຫຍ້າຄາ (ແຂວງ ອຸດົມໄຊ)
ຕັ້ງຢູ່ບ້ານ ບ້ານຫຼັກ32 ເມືອງ ໄຊ ແຂວງ ອຸດົມໄຊ ຕ້ອງຂຶ້ນຜາສູງປະມານ ຄວາມສູງ 1.600 ແມັດ ມີບັນດາຫີນທີ່ມີຮູບຊົງແປກຕາ ບໍ່ວ່າຈະເປັນ ຫີນເກັດເຕົາ, ຫີນປາໂລມາ, ຫີນພະຍາງູໃຫຍ່ ແລະ ອື່ນໆອີກ.
ພູຟ້າ (ແຂວງ ຜົ້ງສາລີ)
ດິນແດນສະຫວັນເທິງດອຍ ຈຸດສູງສຸດຂອງແຂວງຜົ້ງສາລີ ສະຖານທີ່ ພູຟ້າ, ເທດສະບານ ເມືອງຜົ້ງສາລີ, ແຂວງຜົ້ງສາລີ ຂຶ້ນພູສູງປະມານ 1.539 ແມັດ ມີຂັ້ນໄດຂື້ນພູຟ້າທັງຫມົດ 822 ຂັ້ນ ຂຶ້ນໄປກໍຈະເຫັນວິວທິວທັດຂອງແຂວງຜົ້ງສາລີ.
ຜາແດງ (ແຂວງ ຫຼວງພະບາງ)
ຕັ້ງຢູ່ບ້ານໜອງຂຽວ ເມືອງງອຍ ແຂວງຫຼວງພະບາງ ຫ່າງຈາກຕົວເມືອງຫລວງພະບາງ 3 ຊົ່ວໂມງ ແລະ ໄລຍະການຂື້ນພູແມ່ນ 45 ນາທີ.
ຕາດຜາຫວ່າງ (ແຂວງ ຫົວພັນ)
ຕັ້ງຢູ່ທີ່ ບ້ານປາວເຫນືອ ເມືອງ ຊຳໃຕ້ ແຂວງ ຫົວພັນ ແຍກຈາກທາງໃຫຍ່ເຂົ້າມາປະມານ 5 ກິໂລ.
ຕາດນໍ້າຍາວ (ແຂວງ ຊຽງຂວາງ)
ຕັ້ງຢູ່ທີ່ ບ້ານທົ່ງເປີ້ ເມືອງໝອກ ແຂວງ ຊຽງຂວາງ ເຊີ່ງຫ່າງຈາກເທດສະບານ ແຂວງ ຊຽງຂວາງ 170 km ຫ່າງຈາກເທດສະບານເມືອງ 30 km.
ພາກກາງ
ພູຫົວໂລ້ນ (ແຂວງ ໄຊສົມບູນ)
ສະຖານທີ່ຕັ້ງຢູ່ ບ້ານພູຫົວຊ້າງ ເມືອງອານຸວົງ ແຂວງ ໄຊສົມບູນ ໄປງ່າຍມາງ່າຍ ສາມາດຂື້ນໄດ້ຈາກຫຼາຍທາງ ໄລຍະທາງຈາກນະຄອນຫຼວງວຽງຈັນ ຫາ ແຂວງໄຊສົມບູນ ປະມານ 222 ກິໂລແມັດ.
ຕາດວັງຫຼວງ (ນະຄອນຫຼວງ ວຽງຈັນ)
ຕັ້ງຢູ່ ບ້ານເວີນກະເບົາ ເມືອງປາກງື່ມ ນະຄອນຫຼວງວຽງຈັນ ຫ່າງຈາກເທດສະບານນະຄອນຫຼວງ ປະມານ 60 ກວ່າກິໂລແມັດ, ໂດຍທ່ານສາມາດເດີນທາງໄປຕາມເສັ້ນທາງເລກທີ 13 ໃຕ້, ກາຍຂົວບ້ານໄຮໄປອີກປະມານ 1 ກິໂລແມັດ ແລະ ລ້ຽວຊ້າຍເຂົ້າໄປອີກປະມານ 6 ກິໂລແມັດ ແລະ ເຂົ້າໄປທາງດິນແດງອີກ 100 ແມັດ ກໍ່ຈະຮອດຕາດວັງຫຼວງ.
ອ່າງນ້ຳຕົງ (ແຂວງ ວຽງຈັນ)
ຕັ້ງຢູ່ ບ້ານນາດ່ານ ເມືອງເຟືອງ ແຂວງ ວຽງຈັນ ຫ່າງຈາກນະຄອນຫຼວງວຽງຈັນ ພຽງແຕ່ 140 ກິໂລແມັດ.
ວັດພຣະບາດໂພນສັນ (ແຂວງ ບໍລິຄໍາໄຊ)
ວັດພະທາດພະບາດຕັ້ງຢູ່ແຄມທາງເລກທີ່ 13 ໃຕ້ເປັນເສັ້ນທາງຜ່ານເໜືອ – ໃຕ້ ທີ່ເໝາະສົມຕໍ່ການທ່ອງທ່ຽວ ທາງດ້ານວັດທະນະທໍາ.
ພູຜາມ່ານ (ແຂວງ ຄຳມ່ວນ)
ເປັນແຫຼ່ງທ່ອງທ່ຽວ ຕັ້ງຢູ່ເມືອງຄູນຄຳ ແຂວງຄຳມ່ວນ ເປັນແຫຼ່ງທ່ອງທ່ຽວທີ່ມີຄວາມກົມກືນໄປກັບທຳມະຊາດ ກິດຈະກຳທີ່ເດັ່ນໆໃນ The Rock View Point ກໍ່ຄືການຂີ່ສະລິງ (Ziplines) ຊົມທຳມະຊາດ, ເດີນປ່າ, ພາຍເຮຶອ ແລະ ອີກຫຼາຍກິດຈະກຳທີ່ເຮັດໃຫ້ນັກທ່ອງທ່ຽວໄດ້ສຳພາດກັບທຳມະຊາດ.
ອ່າງນໍ້າເຊກື (ແຂວງ ສະຫວັນນະເຂດ)
ອ່າງເກັບນໍ້າເຊກຶ ຕັ້ງຢູ່ ເມືອງທ່າປາງທອງ ເເຂວງສະຫວັນນະເຂດ ເປັນສະຖານທີ່ທີ່ເໝາະສຳລັບການນັ່ງຊິວ, ນອນກາງເຕັນແຄມປິ້ງກໍໄດ້ ທັງຍັງໄດ້ຊົມວິວທິວທັດຈາກທຳມະຊາດ.
ພາກໃຕ້
ຈຸດຊົມວິວຄຳຕື້ (ແຂວງ ສາລະວັນ)
ຈຸດຊົມວິວພູລະຫິດ, ບ້ານຄຳຕື້, ເມືອງຄົງເຊໂດນ ກົງກັນຂ້າມກັບຜາແຕ້ມ, ໂຂງຈຽມ ປະເທດໄທ.
ໜອງເຮືອເປັດທ່າແຕງ (ແຂວງ ເຊກອງ)
ຕັ້ງຢູ່ບ້ານ ໂກງຕາຢຸນ ເມືອງທ່າແຕງ ແຂວງ ເຊກອງ ເປັນສະຖານທີ່ທ່ອງທ່ຽວຫນື່ງ ລວມຫລາຍຢ່າງຢູ່ ພື້ນທີ່ດຽວກັນ ມີຟາມ, ບ່ອນພັກ ແລະ ໜອງເຮືອເປັດ.
ນ້ຳຕົກຕາດຂະໝຶດ (ແຂວງ ຈຳປາສັກ)
ສະຖານທີ່ຕັ້ງຢູ່ ເຂດບ້ານໜອງຫລວງ ປ່າສະຫງວນດົງຫົວສາວ ເມືອງປາກຊ່ອງ ແຂວງຈຳປາສັກ ນໍ້າຕົກຕາດແຫ່ງນີ້ຕ້ອງໄດ້ຢ່າງປ່າ ແຖມຂື້ນພູ ແລະ ຂີ່ສະລີງ ຈຶ່ງໄປຮອດ.
ຕາດຈໍ (ແຂວງ ອັດຕະປື)
ແຫຼ່ງທ່ອງທ່ຽວຕາດຈໍ ເປັນຕາດໜື່ງທີ່ສວຍງາມຕາມແບບທຳມະຊາດ ທີ່ເກີດຈາກສາຍນໍ້າປາ, ມີຄວາມກ້ວາງ 15 ແມັດ, ສູງ 3 ແມັດ, ຕັ້ງຢູ່ບ້ານ ວັງໄຊ, ເມືອງຊານໄຊ, ຫ່າງຈາກເທດສະບານແຂວງປະມານ 31 ກິໂລແມັດ.
ການເດີນທາງໃນ ສປປ ລາວ ເປັນປະສົບການທີ່ໃຫ້ ວັດທະນະທຳ ຄວາມສວຍງາມ ແລະ ການພົບເຫັນສິ່ງໃໝ່ໆທີ່ຫຼາກຫຼາຍ ເຊິ່ງການເດີນທາງຄັ້ງດຽວບໍ່ພໍສຳລັບນັກທ່ອງທ່ຽວ ຈາກພູມສັນຖານທີ່ສວຍງາມ ລວມໄປເຖິງວັດບູຮານຫຼາຍແຫ່ງ ໄປຈົນເຖິງອາຫານທີ່ເປັນເອກະຫຼັກ ຍັງມີອີກຫຼາຍບ່ອນໃຫ້ນັກທ່ອງທ່ຽວໄປຄົ້ນພົບ.
