ຫຼັງຈາກປາຕີ້ເຄົ້າດາວມາໜັກໆ ເຂົ້າປີໃໝ່ແລ້ວກໍຄວນເລີ່ມຕົ້ນທຸກຢ່າງດ້ວຍສິ່ງດີໆ ແຕ່ກ່ອນຈະເລີ່ມຫຍັງເຮົາຕ້ອງມີສຸຂະພາບທີ່ດີກ່ອນ ເມື່ອກ່າວເຖິງສະໝຸນໄພວ່າເປັນສ່ວນໜຶ່ງຂອງຊີວິດເຮົາກໍບໍ່ແມ່ນເລື່ອງແປກ ເພາະນັບທັງອາຫານທີ່ບໍລິໂພກແຕ່ລະມື້ລ້ວນແຕ່ມີສ່ວນປະສົມຈາກພືດສະໝຸນໄພ ທີ່ຊ່ວຍໃຫ້ອາຫານຂອງເຮົາມີລົດຊາດອັນແຊບຊ້ອຍ ແລະ ສັບພະຄຸນອັນລົ້ນເຫຼືອ ນອກຈາກຈະນຳມາເປັນສ່ວນປະສົມຂອງອາຫານແລ້ວ ເຮົາຍັງສາມາດນຳມາປຸງເປັນນ້ຳຢາເພື່ອດື່ມແກ້ອາການຕ່າງໆໄດ້.
ນ້ຳສະໝຸນໄພຫົວສີໄຄ
ຫົວສີໄຄມີວິຕາມິນເອ ທີ່ຊ່ວຍບຳລຸງສາຍຕາ ແລະ ຍັງມີແຄລຊ່ຽມ ແລະ ຟອສຟໍັສ ຊ່ວຍບຳລຸງກະດູກ ແລະ ແຂ້ວໃຫ້ແຂງແຮງ, ຊ່ວຍແກ້ທ້ອງອືດ, ໄລ່ລົມ, ຫຼຸດຄວາມດັນໂລຫິດສູງ, ຊ່ວຍຂັບໄລ່ເຫື່ອ ແລະ ພິດຂອງສານແປກປອມໃນຮ່າງກາຍ ເຊິ່ງວິທີເຮັດສະໝຸນໄພແມ່ນພຽງແຕ່ນຳເອົາຫົວສີໄຄປະມານ 3-5 ຕົ້ນມາຫັ່ນເປັນທ່ອນ ແລ້ວນຳມາທຸບໃຫ້ແຫຼກ ຈຶ່ງນຳມາຕົ້ມໂດຍໃຊ້ນ້ຳປະມານເຄິ່ງລິດພໍຟົດ ແລ້ວນຳເອົາຫົວສີໄຄອອກ ແລະ ສຸດທ້າຍນຳເອົາໄປຕົ້ມອີກປະມານ 3-5 ນາທີ ຫຼັງຈາກນັ້ນ ສາມາດນຳມາດື່ມໄດ້ເລີຍ.
ນ້ຳຂິງ ຫຼື ຊາຂີງ
ຄວນເລືອກຂິງທີ່ບໍ່ແກ່ ຫຼື ອ່ອນເກີນໄປ ນຳມາລ້າງໃຫ້ສະອາດທຸບໃຫ້ແຫຼກພໍປະມານ ແລ້ວນຳຂິງໃສ່ນ້ຳກຳລັງຟົດ ແລ້ວປະໄວ້ປະມານ 2-5 ນາທີ ຫາກຕົ້ມດົນເກີນໄປຈະເຮັດໃຫ້ກິ່ນຫອມຈາງລົງ. ນ້ຳຂິງຈະຊ່ວຍແກ້ໄອ, ຊ່ວຍຫຼຸດອາການທ້ອງອືດ, ແກ້ອາການເມົາລົດລວມເຖິງແກ້ປວດຂໍ້.
ນ້ຳຜັກຕຳນິນ
ນຳໃບຜັກຕຳນິນມາລ້າງໃຫ້ສະອາດແລ້ວນຳມາປັ່ນ ໃສ່ນ້ຳຕົ້ມເຄິ່ງໜຶ່ງຂອງໂຖປັ່ນ ຫຼັ້ງຈາກປັ່ນລະອຽດແລ້ວຈຶ່ງນຳມາຕອງເອົາແຕ່ນ້ຳ ແລະ ຕື່ມເອົາເກືອ, ນ້ຳໝາກນາວຕາມໃຈມັກ. ນ້ຳຜັກຕຳນິນອຸດົມໄປດ້ວຍວິຕາມິນເອທີ່ຊ່ວຍບຳລຸງສາຍຕາ, ມີແຄລຊ່ຽມ ແລະ ຟອສຟໍຣັສທີ່ຊ່ວຍບຳລຸງກະດູກ, ມີວິຕາມິນຊີຊ່ວຍຮັກສາອາການເລືອດອອກຕາມແຂ້ວ
ນ້ຳໃບເຕີຍ
ນຳໃບມາລ້າງໃຫ້ສະອາດແລ້ວນຳມາຫັ່ນເປັນຕ່ອນໃສ່ໝໍ້ແລ້ວຕົ້ມດ້ວຍນ້ຳສະອາດຈົນກວ່າສີຂອງໃບເຕີຍຈາງລົງ ຈຶ່ງຕອງໃບເຕີຍອອກ ຫຼັງຈາກນັ້ນນຳເອົາເກືອ 1 ບ່ວງກາເຟ ຕາມດ້ວຍນ້ຳເຊື່ອມແລ້ວນຳໄປຕົ້ມອີກປະມານ 5 ນາທີ. ນ້ຳໃບເຕີຍຈະຊ່ວຍບຳລຸງຫົວໃຈ
ນ້ຳຫົວຂ່າ
ນຳເອົາຂ່າແຫ້ງທີ່ຕາກແລ້ວໃສ່ຖ້ວຍປະມານ 4-5 ປ່ຽງ ແລ້ວເອົານ້ຳຮ້ອນເທໃສ່ປະມານຂ້ອນຖ້ວຍແລ້ວຈຶ່ງປິດຝາປະມານ 4-5 ນາທີຈຶ ຫຼັງຈາກນັ້ນນຳມາດື່ມ ຖ້າຈະໃຫ້ດີຄວນດື່ມ 2-3ຖ້ວຍຕໍ່ມື້ ຫຼື ອາດນຳເອົາຂ່າສົດປະມານ 10-12 ປ່ຽງ ມາທຸບໃຫ້ແຫຼກແລ້ວນຳມາຕົ້ມເພື່ອດື່ມກໍໄດ້ເຊັ່ນກັນ.