ໃກ້ຮອດເທດສະການກຸດຈີນ ບັນດາພໍ່ຄ້າ ແລະ ແມ່ຄ້າຊາວຂາຍ ຕາມແຄມທາງໃນເຂດຖະໜົນຂຸນບູລົມ ເມືອງຈັນທະບູລີ ນະຄອນຫຼວງວຽງຈັນ ກໍໄດ້ມີການວາງຈໍາໜ່າຍສິນຄ້າເຄື່ອງໄຫວ້ ແລະ ເຄື່ອງປະດັບປະດາ ເພື່ອຕ້ອນຮັບກຸດຈີນທີ່ກຳລັງຈະ ມາເຖິງໃນເດືອນກຸມພານີ້.
ຈາກການສອບຖາມເຈົ້າຂອງຮ້ານທີ່ຂາຍເຄື່ອງຢູ່ເຂດຖະໜົນຂຸນບູລົມ ໄດ້ໃຫ້ຮູ້ວ່າ: ໄດ້ເລີ່ມເປີດຮ້ານມາແລ້ວຕັ້ງແຕ່ຊ່ວງເດືອນ ມັງກອນ ແລ້ວເຊິ່ງກໍມີຄົນມາຊື້ເຄື່ອງຢູ່ເລື້ອຍໆແຕ່ບໍ່ຫຼາຍເທົ່າທີ່ຄວນ ເພາະຕາມປົກກະຕິກໍເປັນແບບ ນີ້ຢູ່ແລ້ວ ເຊິ່ງຈະມີຄົນຈະຫຼາຍກໍຢູ່ໃນຊ່ວງໃກ້ຮອດມື້ແທ້ໆຄືວັນທີ 8 ວັນ 9 ເຊິ່ງເປັນມື້ກະກຽມແທ້ ແລະ ຈະເປີດຮ້ານຈົນຮອດທ້າຍອາທິດ ວັນຈັນວັນທີ 12 ກຸມພາ 2024 ກໍຈະເລີ່ມຂົນເຄື່ອງອອກເພື່ອປິດຮ້ານ.
ສໍາລັບເລື່ອງຂອງລາຄາເຄື່ອງຕ່າງໆຈາກການສຳຫຼວດ ກໍໄດ້ຮູ້ວ່າ ເຄື່ອງທີ່ນໍາເອົາມາຂາຍໃນປີນີ້ ແມ່ນມີລາຄາທີ່ສູງຂຶ້ນເມື່ອທຽບ ໃສ່ປີທີ່ຜ່ານມາ ໂດຍສະເພາະເຂົ້າໜົມເຄື່ອງໄຫວ້ ແລະ ເຂົ້າຕົ້ມ ໃສ້ໝູ ຫໍ່ໜຶ່ງລາຄາຢູ່ທີ່ 65.000 ກີບ ຫາ 80.000 ກີບ ຈາກແຕ່ກ່ອນ 50.000 ກີບ ແຕ່ວ່າຊອງອັງເປົ່າຍັງລາຄາເທົ່າເດີມ 8.000 ກີບ ຫາ 10.000 ກີບ.