ນັກວິໄຈຈາກ ສາທາລະນະເຊັກ ໄດ້ສຶກສາປຽບທຽບປະສິດທິພາບ ການກິນອາຫານ (ອາຫານຫຼັກ) ຂອງຜູ້ປ່ວຍໂຣກເບົາຫວານ ປະເພດທີ 2 ລະຫວ່າງ ການແບ່ງຄາບອາຫານເປັນຫຼາຍໆຄາບຍ່ອຍ ກັບການກິນອາຫານພຽງມື້ລະ 2 ຄາບ ໂດຍມີປະລິມານອາຫານເທົ່າໆກັນ ພົບວ່າ ການກິນອາຫານ 2 ຄາບ ສາມາດຊ່ວຍໃຫ້ຜູ້ປ່ວຍຫຼຸດນຳ້ໜັກ ແລະ ຄວບຄຸມລະດັບນຳ້ຕານ ໄດ້ດີກວ່າຜູ້ທີ່ກິນອາຫານຫຼາຍຄາບ.
ທີມວິໄຈທຳການທົດສອບກຸ່ມໂຕຢ່າງຜູ້ປ່ວຍເບົາຫວານປະເພດ 2 ຫຼື ເບົາຫວານທີ່ຮ່າງກາຍຜະລິດ ອິນຊູລິນ ສຳລັບຄວບຄຸມນຳ້ຕານໄດ້ໜ້ອຍຜິດປົກກະຕິ ຈຳນວນທັງເໝິດ 54 ຄົນ ໃນໄວ 30-70 ປີ ໂດຍແບ່ງເປັນກຸ່ມລະ 27 ຄົນ. ກຸ່ມທຳອິດ ຈະໄດ້ຮັບອາຫານມື້ລະ 6 ຄາບ, ໃນຂະນະທີ່ກຸ່ມທີ 2 ຈະໄດ້ຮັບອາຫານມື້ລະພຽງ 2 ຄາບ ໂດຍທັງສອງກຸ່ມຈະໄດ້ຮັບອາຫານ ໂດຍສະເລ່ຍ 1,700 ແຄລໍຣີ່ຕໍ່ມື້ ມີໄລຍະເວລາການທົດສອບ 12 ອາທິດ.
ຈາກການປຽບທຽບຜົນການກວດຮ່າງກາຍ ລະຫວ່າງກຸ່ມທີ່ກິນອາຫານ 2 ຄາບ ກັບກຸ່ມທີ່ກິນອາຫານ 6 ຄາບ ຊຶ່ງເປັນວິທີທີ່ໃຊ້ທົ່ວໄປ ສຳລັບການຄວບຄຸມນໍ້າຕານ ສຳລັບຜູ້ເປັນເບົາຫວານ ໃນສາທາລະນະເຊັກ ພົບວ່າ ກຸ່ມທີ່ກິນອາຫານ 2 ຄາບ (ເຊົ້າ ແລະສວາຍ) ມີນຳ້ໜັກຫຼຸດລົງສະເລ່ຍ 1,4 ກິໂລກຣາມ ແລະຮອບແອວຫຼຸດລົງ 4 ຊັງຕີແມັດ ຫຼາຍກວ່າກຸ່ມທີ່ກິນອາຫານ 6 ຄາບຕໍ່ມື້.
ດຣ. ຮານາ ຄາເລໂອວາ ຈາກສະຖາບັນການແພດເວຊະສາດ ແລະ ການທົດລອງ ຂອງ ສາທາລະນະເຊັກ ກ່າວວ່າ: ການທົດລອງເປັນທີ່ໜ້າພໍໃຈ ແລະປະຫຼາດໃຈ ເມື່ອພົບວ່າ ຜູ້ປ່ວຍທີ່ກິນເຂົ້າ 2 ຄາບ ຊຶ່ງມີຄວາມຮູ້ສຶກໃນຕອນທຳອິດວ່າ ຕົນເອງອາດຫິວໃນຕອນສວາຍ ແຕ່ກຸ່ມນີ້ກັບຮູ້ສຶກພໍໃຈຫຼາຍກວ່າກຸ່ມທີ່ກິນ 6 ຄາບ. ດຣ. ຮານາ ລະບຸວ່າ: ວິທີການດັ່ງກ່າວອາດສາມາດປະຍຸກໃຊ້ກັບຜູ້ທີ່ບໍ່ເປັນເບົາຫວານ ທີ່ຕ້ອງການຫຼຸດນຳ້ໜັກໄດ້ອີກດ້ວຍ.