ເມື່ອສັງຄົມເຮົາກ້າວເຂົ້າສູ່ຍຸກທີ່ເຂົ້າຍາກມາກແພງ ຫຼາຍຄົນ “ຫາເຊົ້າກິນເຊົ້າ” ບໍ່ແມ່ນ “ຫາເຊົ້າກິນຄໍ່າ” ຄືແຕ່ກ່ອນແລ້ວ ເຄື່ອງໃຊ້ຂອງສອຍຕ່າງໆ ກໍລ້ວນແຕ່ລາຄາສູງຂຶ້ນເທົ່າຕົວ, ເຮົາຍັງຈະພາກັນມາອວດລວຍໂຊລົດສະນິຍົມດີໆ ໃຊ້ຂອງແພງໆ ກິນອາຫານຫຼູຫຼາ ຕາມຄົນມີລາຍຮັບທີ່ໝັ່ນຄົງ ຫຼື ຄົນຮັ່ງມີບໍ່ໄດ້ແລ້ວ; ສະນັ້ນ, ໃນຍຸກນີ້ ເຮົາຕ້ອງພາກັນຫັນມາອວດກັນປະຢັດແທນ ກັບເທຣນທີ່ກຳລັງເປັນກະແສໃນຕອນນີ້ຄື: Loud Budgeting ເປັນການຫັນມາປະຢັດເກັບອອມເງິນຂອງໄວໜຸ່ມ Gen Z ຄືໃຊ້ເງິນໄປກັບສິ່ງຂອງຈຳເປັນເທົ່ານັ້ນ, ງົດຊື້ເຄື່ອງຕາມກະແສ, ຫຼຸດຜ່ອນການໄປກິນເຂົ້າຢູ່ຮ້ານອາຫານເພື່ອປະຢັດງົບ, ງົດການຈັດງານສັງສັນທີ່ບໍ່ຈຳເປັນ ຫັນມາກິນດື່ມແບບທຳມະດາ ຫຼື ແບບຄອບຄົວ, ຫຼຸດຜ່ອນການຊື້ເຄື່ອງເພື່ອເປັນລາງວັນໃຫ້ຕົນເອງ ເພາະການທີ່ເກັບອອມເງິນໄວ້ໃຊ້ໃນຍາມທີ່ຕ້ອງການໂດຍບໍ່ເດືອດຮ້ອນນັ້ນຄື ລາງວັນໃຫ້ຕົນເອງທີ່ແທ້ຈິງ ແລະ ຍັງມີອີກຫຼາຍຢ່າງ ແລ້ວແຕ່ຄວາມສະດວກຂອງແຕ່ລະຄົນ.
ແລ້ວການທີ່ເຮົາອວດປະຢັດ ຫຼື ເຮັດຕາມເທຣນ Loud Budgeting ນີ້ຈະມີຜົນດີແບບໃດ? ມາເບິ່ງນຳກັນ
- ມີເງິນເກັບຫຼາຍຂຶ້ນ
- ຫຼຸດພົ້ນຈາກຄຳວ່າ ຂອງມັນຕ້ອງມີ
- ກ້າປະຕິເສດຄົນອື່ນຫຼາຍຂຶ້ນ (ໂດຍສະເພາະໝູ່ທີ່ມັກຊວນໄປຫຼິ້ນ)
- ຮູ້ຈັກຄຸນຄ່າຂອງເງິນທີ່ຫາມາໄດ້ (ເພາະເຮົາຈະບໍ່ໃຊ້ຟຸ່ມເຟື່ອຍ)
- ສ້າງນິດໄສໃຫ້ເປັນຄົນ “ຄິດກ່ອນຊື້”
- ມີຄວາມໝັ້ນໃຈ ແລະ ພູມໃຈໃນຕົນເອງ ທີ່ສາມາດເອົາຊະນະຄວາມຕ້ອງການຂອງຕົນເອງໄວ້
ເຊິ່ງການເລີ່ມອວດປະຢັດນີ້, ເຮົາກໍສາມາດເລີ່ມໄດ້ເລີຍຈາກໂຕຂອງເຮົາເອງ ໂດຍອາດຈະເລີ່ມຈາກການກຳນົດງົບໃນການໃຊ້ຈ່າຍໃຫ້ກັບຕົນເອງໃນແຕ່ລະດ້ານເຊັ່ນ: ໃຊ້ຈ່າຍໄປກັບອາຫານການກິນເທົ່າໃດ? ຂອງໃຊ້ທີ່ຈຳເປັນເທົ່າໃດ? ເງິນເກັບອອມເທົ່າໃດ … ແບບນີ້ເປັນຕົ້ນ ແລະ ກ້າປະຕິເສດໝູ່ທີ່ຊວນໄປກິນຫຼິ້ນແບບບໍ່ຈຳເປັນລົງ, ກ້າທີ່ຈະບອກເຂົາໄປວ່າ ເຮົາປະຢັດເງິນ ເພາະມັນບໍ່ແມ່ນສິ່ງທີ່ຜິດ ແລະ ໜ້າອາຍເລີຍ ສິ່ງສຳຄັນແມ່ນບອກກັບຕົນເອງຢູ່ສະເໝີວ່າ ຖ້າເຮົາຢູ່ແບບຈົນ ເຮົາຈະບໍ່ຈົນ ຖ້າເຮົາຢູ່ແບບລວຍໃຊ້ເງິນຟຸ່ມເຟື່ອຍເຮົາກໍຈະບໍ່ລວຍ ນອກຈະບໍ່ລວຍແລ້ວສະຖານະການແບບນີ້ ຢ້ານຈະບໍ່ຫຼອດນຳ ສະນັ້ນ, ພ້ອມກັນຫັນມາປະຢັດຈະດີກວ່າ!