ພະແນກພາຍໃນນະຄອນຫຼວງວຽງຈັນ ຈັດກອງປະຊຸມເຜີຍແຜ່ບັນດານິຕິກຳ ກ່ຽວກັບການກະກຽມອອກບັດພະນັກງານ-ລັດຖະກອນ ທົ່ວນະຄອນຫຼວງວຽງຈັນ ທີ່ຫ້ອງວ່າການປົກຄອງນະຄອນຫຼວງວຽງຈັນ ເປັນປະທານຂອງທ່ານ ບຸນໜາ ຜາທຸມມະວົງ ຫົວໜ້າພະແນກພາຍໃນນະຄອນຫຼວງ ມີທ່ານ ສຸວັນນີ ລັດຕະນະວົງ ຫົວໜ້າກົມຄຸ້ມຄອງລັດຖະກອນ ກະຊວງພາຍໃນ ພ້ອມດ້ວຍຫົວໜ້າ ຮອງຫົວໜ້າພະແນກການ ຮອງເຈົ້າເມືອງ ແລະ ຜູ້ທີ່ເຮັດວຽກກ່ຽວກັບພະນັກງານ-ລັດຖະກອນຂອງບັນດາຂະແໜງການ ແລະ 9 ຕົວເມືອງອ້ອມຂ້າງນະຄອນຫຼວງວຽງຈັນ.
ການຈັດການເຜີຍແຜ່ຄັ້ງນີ້ ເປັນການກະກຽມໃຫ້ແກ່ການອອກບັດພະນັກງານ-ລັດຖະກອນ ໃນທົ່ວນະຄອນຫຼວງວຽງຈັນ ເຊິ່ງການອອກບັດພະນັກງານ-ລັດຖະກອນເປັນບັນຫາທີ່ສຳຄັນ ແລະ ມີຜົນປະໂຫຍດຫຼາຍ ເພາະເປັນການຢັ້ງຢືນ ແລະ ກວດກາບັນຊີຈຳນວນພະນັກງານ-ລັດຖະກອນຜູ້ມີໜ້າ ຫຼື ບໍ່ມີໜ້າຕົວຈິງ.
ພ້ອມນັ້ນ ຍັງເປັນການປັບປຸງຂໍ້ມູນປະຫວັດລັດຖະກອນໃຫ້ຖືກຕ້ອງ ສອດຄ່ອງກັບລະບຽບການ ຫັນການຄຸ້ມຄອງພະນັກງານ-ລັດຖະກອນຕາມກົດໝາຍ ລະບຽບການ ແລະ ທັນສະໄໝ ເຮັດໃຫ້ການເບີກຈ່າຍເງິນເດືອນ ເງິນອຸດໜູນ ແລະ ເງິນນະໂຍບາຍຕ່າງໆຖືກຕ້ອງຕາມຕົວຈິງ ສຳລັບນິຕິກຳນຳມາເຜີຍແຜ່ປະກອບມີ ຂໍ້ຕົກລົງການອອກບັດພະນັກງານ-ລັດຖະກອນ ນະຄອນຫຼວງວຽງຈັນ ເລກທີ 315/ພນ ຄູ່ມືກ່ຽວກັບການປັບປຸງຂໍ້ມູນຂອງພະນັກງານ-ລັດຖະກອນໃຫ້ຖືກຕ້ອງຕາມລະບຽບການ ຄຳແນະນຳເລກທີ 06/ພນ ແລະ ຂໍ້ຕົກລົງກ່ຽວ ຂ້ອງຈຳນວນໜຶ່ງ.
ທ່ານ ກາບແກ້ວ ນາມມະຈັກ ຮອງຫົວໜ້າພະແນກພາຍໃນນະຄອນຫຼວງ ໄດ້ຜ່ານບົດລາຍງານການເຄື່ອນໄຫວການຈັດຕັ້ງປະຕິບັດວຽກງານຄຸ້ມຄອງລັດຖະກອນ 6 ເດືອນຕົ້ນປີ 2019 ວ່າ:
ນັບແຕ່ເດືອນມັງກອນເປັນຕົ້ນມາ ພະນັກງານ ລັດຖະກອນສອງພາກສ່ວນແມ່ນໄດ້ໂອນໄປຂຶ້ນກັບສູນກາງຄຸ້ມຄອງໂດຍກົງ ຄື:
ອົງການໄອຍະການປະຊາຊົນ ແລະ ສານປະຊາຊົນສູງສຸດນະຄອນຫຼວງວຽງຈັນ ມີພະນັກງານ-ລັດຖະກອນ ທັງໝົດ 483 ຄົນ ຍິງ 179 ຄົນ ແລະ ດ້ານວຽກງານສະຖິຕິລັດຖະກອນ ທຸກພາກສ່ວນແມ່ນໄດ້ເອົາໃຈໃສ່ເກັບກຳສະຖິຕິພະນັກງານ-ລັດຖະກອນເປັນປົກກະຕິ.
ໂດຍສະເພາະ ແມ່ນຊີວະປະຫວັດລັດຖະກອນ ລະດັບວິຊາສະເພາະ ລະດັບທິດສະດີ ຊັ້ນ-ຂັ້ນເງິນເດືອນການສັບຊ້ອນ ການຍົກຍ້າຍມາຈາກຂະແໜງອື່ນ ເພື່ອຮັບປະກັນໄດ້ເຖິງຄວາມຊັດເຈນ ແລະ ເປັນຂໍ້ມູນອ້າງອີງໃຫ້ແກ່ຄະນະນຳແຕ່ລະຂັ້ນ ຜ່ານການເກັບກຳສະຖິຕິລັດຖະກອນ ໄລຍະ 6 ເດືອນຕົ້ນປີ 2019 ທົ່ວນະຄອນຫຼວງວຽງຈັນ ມີພະນັກງານ-ລັດຖະກອນ ທັງໝົດ 10.004 ຄົນ ຍິງ 5.411 ຄົນ ແລະ ລັດຖະກອນຄູ 5.093 ຄົນ ຍິງ 3.254 ຄົນ ສົມທຽບໃສ່ປີ 2018 ຫຼຸດລົງ 705 ຄົນ ຍິງ 326 ຄົນ.
ແຫຼ່ງຂໍ້ມູນ: ໜັງສືພິມວຽງຈັນໃໝ່