ທີ່ ໂຮງແຮມ ວຽງຈັນ ພລາຊ້າ, ນະຄອນຫຼວງວຽງຈັນ, ກົມພັດທະນາສີມືແຮງງານ ແລະ ຈັດຫາງານ, ກະຊວງ ແຮງງານ ແລະ ສະຫວັດດີການສັງຄົມ ໄດ້ຈັດກອງປະຊຸມປຶກສາຫາລືຜົນການຄົ້ນຄ້ວາຄວາມຕ້ອງການທັກສະສີມື ແລະ ການສຶກສາໃນການຈ້າງງານຂອງພາກເອກະຊົນ ຢູ່ ສ ປ ປ ລາວ ພາຍໃຕ້ການເປັນປະທານຂອງ ທ່ານ ໄທ ແສງອາລຸນ ຮອງຫົວໜ້າກົມພັດທະນາສີມືແຮງງານ ແລະ ຈັດຫາງານ.
ຈຸດປະສົງຂອງກອງປະຊຸມ ແມ່ນລາຍງານຜົນການຄົ້ນຄວ້າຄວາມຕ້ອງການດ້ານທັກສະສີມື ແລະ ການສຶກສາໃນພາກເອກະຊົນ,ພ້ອມທັງຮັບເອົາບັນດາຄຳຄິດຄຳເຫັນຂອງຜູ້ເຂົ້າຮ່ວມຕໍ່ກັບຜົນຂອງການຄົ້ນຄວ້າດັ່ງກ່າວ ເພື່ອນຳໄປປັບປຸງເຮັດໃຫ້ມີຄວາມສົມບູນຂຶ້ນຕື່ມ.
ກອງປະຊຸມຄັ້ງນີ້ ໄດ້ຮັບການສະໜັບສະໜູນຈາກລັດຖະບານອົດສະຕາລີໂດຍຜ່ານສູນຮຽນຮູ້ເພື່ອການພັດທະ ນາລາວ-ອົດສະຕາລີ,ເຊິ່ງມີຜູ້ເຂົ້າຮ່ວມທີ່ມາຈາກອົງການຈັດຕັ້ງທັງພາກລັດແລະເອກະຊົນ, ອົງການຈັດຕັ້ງສາ ກົນ ແລະ ຜູ້ໃຫ້ທຶນ ຈຳນວນ 55 ຄົນ.
ການຄົ້ນຄວ້າຄັ້ງນີ້ໄດ້ນຳໃຊ້ຂໍ້ມູນຕຳແໜ່ງງານວ່າງທີ່ໄດ້ປະກາດຜ່ານເວັບໄຊ 108job ໃນປີ 2018 ຈຳນວນ 2,192 ຕຳແໜ່ງງານ ແລະ ໄດ້ນຳໃຊ້ໃນການຄົ້ນຄວ້າ ແລະ ວິເຄາະໃນ 7 ຂະແໜງການເສດຖະກິດທີ່ມີການປະກາດຮັບສະໝັກງານຄື:
ກໍ່ສ້າງ,ໄຟຟ້າແລະນ້ຳປະປາ, ການຄ້າຂາຍຍົກ-ຂາຍຍ່ອຍ,ບໍ່ແຮ່,ອຸດສາຫະກຳປຸງແຕ່ງ,ກະສິກຳ ແລະ ການບໍລິການຕ່າງໆ.
ໃນນີ້ໄດ້ກວມເອົາ 9 ກຸ່ມອາຊີບເຊັ່ນ: ຜູ້ຈັດການ,ຜູ້ຊ່ຽວຊານ,ນັກວິຊາການ ແລະ ຜູ້ຊ່ວຍຊ່ຽວຊານ,ພະນັກງານທົ່ວໄປ,ພະນັກງານຂາຍແລະໃຫ້ການບໍລິການ, ພະນັກງານກະສິກຳ,ປ່າໄມ້ ແລະ ການປະມົງທີ່ມີສີມື, ແຮງງານຫັດຖະກຳ, ຜູ້ຄວບຄຸມເຄື່ອງຈັກແລະສິ້ນສ່ວນ ແລະ ອາຊີບທີ່ໃຊ້ແຮງງານເປັນຕົ້ນຕໍ. (ສຳລັບ ລາຍລະອຽດຜົນການຄົ້ນຄວ້າທີ່ຖືກຮັບຮອງເປັນທາງການຈະໄດ້ upload ຂຶ້ນທາງເວັບໄຊ www.lmi.molsw.gov.la )
ແຫຼ່ງຂໍ້ມູນ: ພະແນກ ຂໍ້ມູນຂ່າວສານ ຕະຫຼາດແຮງງານ