ກອງປະຊຸມທະວິພາຄີ ລະຫວ່າງ ທະນາຄານ ແຫ່ງ ສປປ ລາວ (ທຫລ) ແລະ ທະນາຄານແຫ່ງລັດ ຫວຽດນາມ (ທຫວ) ປະຈຳປີ 2019 ຈັດຂຶ້ນຢູ່ໂຮງແຮມເມືອງແທັງ ເຊິ່ງຝ່າຍລາວນຳໂດຍທ່ານ ສອນໄຊ ສິດພະໄຊ ຜູ້ວ່າການ ທຫລ ຝ່າຍຫວຽດນາມ ນຳໂດຍ ທ່ານ ເລມິງ ຮຶງ ຜູ້ວ່າການ ທຫວ ພ້ອມດ້ວຍຄະນະຜູ້ແທນຈາກສອງທະນາຄານ ເຂົ້າຮ່ວມ.
ກອງປະຊຸມຄັ້ງນີ້ ເປັນຂີດໝາຍສຳຄັນໃນການເສີມຂະຫຍາຍສາຍພົວພັນຮ່ວມມືມິດຕະພາບ ທີ່ເປັນມູນເຊື້ອ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ ລາວ-ຫວຽດນາມ ໂດຍສະເພາະ ການຮ່ວມມືຂອງສອງທະນາຄານກາງໃຫ້ນັບມື້ມີຄວາມສະໜິດແໜ້ນ ແລະ ການຮ່ວມມືຊ່ວຍເຫຼືອເຊິ່ງກັນ ແລະ ກັນ ໃຫ້ຫຼາຍຂຶ້ນ ທັງເປັນການສະຫຼຸບຕີລາຄາຄືນການພົວພັນຮ່ວມມືຂອງຂະແໜງການເງິນ-ເງິນຕາ ໄລຍະ 1 ປີຜ່ານມາ ໂດຍສະເພາະ ການແລກປ່ຽນທັດສະນະໃນການວາງທິດທາງການຮ່ວມມືໃນຕໍ່ໜ້າ ຜ່ານການປຶກສາຫາລື ແລກປ່ຽນບົດຮຽນ ແລະ ການແກ້ໄຂບັນຫາຕ່າງໆຮ່ວມກັນ ເຊັ່ນ:
ບັນຫາສະພາບເສດຖະກິດມະຫາພາກ ການດຳເນີນນະໂຍບາຍເງິນຕາ ວຽກງານຄຸ້ມຄອງທະນາຄານທຸລະກິດລັດ ແລະ ການຮ່ວມມືດ້ານວິຊາການທີ່ສອງຝ່າຍໃຫ້ຄວາມສົນໃຈ ແລະ ອື່ນໆ ນອກນີ້ ສອງຝ່າຍຍັງໄດ້ລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມືລະຫວ່າງກົມເຕັກໂນໂລຊີຂ່າວສານ ທຫລ ແລະ ສູນຂໍ້ມູນຂ່າວສານສິນເຊື່ອແຫ່ງຊາດຫວຽດນາມ ແລະ ບົດບັນທຶກການຮ່ວມມືດ້ານວິຊາການ ລະຫວ່າງສະຖາບັນການທະນາຄານ ແລະ ມະຫາວິທະ ຍາໄລທະນາຄານ ນະຄອນໂຮ່ຈີມິງ ຕື່ມອີກ.
ໂອກາດນີ້ ທ່ານ ສອນໄຊ ສິດພະໄຊ ຍັງໄດ້ມອບຫຼຽນໄຊມິດຕະພາບຂອງປະທານປະເທດ ສປປ ລາວ ໃຫ້ ທຫວ ເພື່ອຍ້ອງຍໍ ແລະ ສັນລະເສີນຄຸນງາມຄວາມດີໃນການປະກອບສ່ວນເຫື່ອແຮງ ສະຕິປັນຍາ ແລະ ທຶນຮອນ ໃນການເສີມສ້າງສາຍພົວພັນມິດຕະພາບ ແລະ ການຮ່ວມມືທີ່ດີຕໍ່ ສປປ ລາວ ຂອງ ທຫວ ໃນໄລຍະຜ່ານມາຕື່ມອີກ.
ແຫຼ່ງຂໍ້ມູນ: ໜັງສືພິມວຽງຈັນໃໝ່