ກອງປະຊຸມທ່ອງທ່ຽວບັນດາປະເທດລຸ່ມແມ່ນໍ້າຂອງຄັ້ງທີ 5 ໃນວັນທີ 14 ຕຸລາ 2019 ທີ່ ໂຮງແຮມແລນມາກ ແມ່ຂອງ ຣີເວີໄຊ໌, ນະຄອນຫຼວງວຽງຈັນ ໄດ້ອັດລົງດ້ວຍຜົນສໍາເລັດອັນຈົບງາມ ຂະນະທີ່ເຫັນພ້ອມສຸມໃສ່ການປະຕິບັດ 5 ຂົງເຂດ ເພື່ອສືບຕໍ່ພັດທະນາການມ່ອງທ່ຽວແບບເຊື່ອມຕໍ່ ແລະ ຍືນຍົງ.
ກອງປະຊຸມຄັ້ງນີ້ ໄດ້ລົງນາມຮ່ວມກັນຈັດຕັ້ງປະຕິບັດເນື້ອໃນກອງປະຊຸມທ່ອງທ່ຽວບັນດາປະເທດລຸ່ມແມ່ນໍ້າຂອງຄັ້ງທີ 5 ໃນນັ້ນໄດ້ເຫັນດີຮ່ວມກັນ ສ້າງຜະລິດຕະພັນການທ່ອງທ່ຽວເຊື່ອມຕໍ່ສົ່ງເສີມສະໜັບສະໜູນກິດຈະກໍາທ່ອງທ່ຽວ ຮ່ວມກັນແລກ ປ່ຽນຂໍ້ມູນຂ່າວສານທີ່ຮັບໃຊ້ເປັນພື້ນຖານຂອງການທ່ອງທ່ຽວ ແລກປ່ຽນບົດ ຮຽນໃນການສ້າງມາດຕະຖານການບໍລິການໃຫ້ເປັນອັນລວມ ສ້າງມາດຕະຖານປົກປັກຮັກສາມໍລະດົກທາງດ້ານວັດທະນະທໍາ ແລະ ທໍາມະຊາດ ແລະ ວິທີການຈັດມາດຕະຖານລະດັບຊາດ ມາດຕະຖານທ່ອງທ່ຽວອາຊຽນ ແລະ ຊຸມຊົນ.
ພ້ອມນັ້ນກໍຕ້ອງສືບຕໍ່ຮ່ວມກັນພັດທະນາ ແລະ ສ້າງເສັ້ນທາງທ່ອງທ່ຽວໃໝ່ຢ່າງໜ້ອຍ 2 ຕົວເມືອງພາຍໃນ 5 ນະຄອນສະມາ ຊິກຕ້ອງລວມສູນ ເພີ່ມທະວີການຮ່ວມມືຟື້ນຟູມໍລະດົກວັດທະນະທໍາ ແລະ ການແລກປ່ຽນບັນດາໂຄງການເຝິກອົບຮົມ ແລະ ແບບແຜນ ຮູບແບບ ການຟື້ນຟູມໍລະດົກ ວັດທະນະທໍາ ຕົກລົງແຜນການປະຕິບັດການຮ່ວມມືດ້ານການທ່ອງທ່ຽວລະຫວ່າງບັນດານະຄອນລຸ່ມແມ່ນໍ້າຂອງດ້ານການທ່ອງທ່ຽວ 2018-2020 ສໍາລັບເຈົ້າພາບກອງປະຊຸມທ່ອງທ່ຽວ 5 ປະເທດລຸ່ມນໍ້າຂອງຄັ້ງທີ 6 ໃນປີ 2020 ໂດຍໄດ້ຮັບການເປັນເຈົ້າພາບຂອງນະຄອນໂຮຈີມິງ ສສ ຫວຽດນາມ.
ກອງປຸມຄັ້ງນີ້ແມ່ນພາຍໃຕ້ການເປັນປະທານຂອງ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ເປັນກຽດເຂົ້າ ຮ່ວມຂອງ ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ພ້ອມດ້ວຍ ຄະນະຜູ້ແທນຈາກ 5 ນະຄອນປະເທດລຸ່ມແມ່ນໍ້າຂອງ ປະກອບມີ: ນະ ຄອນຫຼວງພະນົມເປັນ ຣາຊາອານາ ຈັກກຳປູເຈຍ ນະຄອນຫຼວງວຽງຈັນ ສປປ ລາວ ນະຄອນຢາງກຸງ ມຽນມາ ນະຄອນຫຼວງບາງກອກ ປະເທດໄທ ນະຄອນໂຮຈີ່ມິງ ສສ ຫວຽດນາມ ພ້ອມດ້ວຍ ຕາງໜ້າຈາກພາກລັດ-ເອກະຊົນ ທຸຕານຸທູດ ເຂົ້າຮ່ວມ.
ແຫຼ່ງຂໍ້ມູນ: ໜັງສືພິມວຽງຈັນໃໝ່