ພີທີໄຂທົດລອງການຜະລິດກະແສໄຟຟ້າເຄື່ອງຈັກໜ່ວຍທີ 1 ຂອງໂຄງການເຂື່ອນໄຟຟ້າດອນສະໂຮງ ເມືອງໂຂງ ແຂວງຈຳປາສັກ ໄດ້ຈັດຂຶ້ນໃນວັນທີ 11 ຕຸລາ 2019 ຢູ່ໂຄງການດັ່ງກ່າວ.
ໂດຍມີທ່ານ ສົມສະຫວາດ ເລັ່ງສະຫວັດ ທີ່ປຶກສາຄະນະບໍລິ ຫານສູນກາງພັກ ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ມີທ່ານຮອງເຈົ້າແຂວງຈຳປາສັກ ທ່ານປະ ທານບໍລິສັດໄຟຟ້າດອນສະໂຮງຈຳກັດ ແລະຕົວແທນພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ໂກນັນດຽວ ປະທານບໍລິສັດໄຟຟ້າດອນສະໂຮງຈຳກັດ ໄດ້ຂຶ້ນລາຍງານໂດຍຫຍໍ້ກ່ຽວກັບຜົນສຳເລັດຂອງໂຄງການ ໂດຍສະເພາແມ່ນພາຍຫລັງທີ່ໄດ້ຮັບອະນຸຍາດໃຫ້ດຳເນີນການກໍ່ສ້າງຈາກລັດຖະບານ ສປປ ລາວ ທາງບໍລິສັດໄດ້ສູມທຸກກຳລັງເຂົ້າໃສ່ຕາມແຕ່ລະໜ້າວຽກໃຫ້ສຳເລັດຕາມແຜນການ.
ເປັນຕົ້ນແມ່ນໜ້າວຽກສຳຄັນຂອງໄລຍະທ້າຍແມ່ນການສູມໃສ່ເລັ່ງຕິດຕັ້ງເຄື່ອງ ຈັກປັ່ນໄຟ ຈົນມາຮອດປັດຈຸບັນແມ່ນສຳເລັດໂດຍພື້ນຖານ ແລະ ໄດ້ໄຂທົດລອງເຄື່ອງຈັກໜ່ວຍທີ 1 ໃນວັນທີ 11ຕຸລາ 2019 ນີ້ ເຊິ່ງມີກຳລັງຕິດຕັ້ງ 65 ເມກາວັດ ຄາດວ່າຮອດທ້າຍປີ 2019 ນີ້ ຈະສາມາດເປີດນຳໃຊ້ໃຫ້ໄດ້ທັງ 4 ໜ່ວຍ ທີ່ມີກຳລັງຕິດຕັ້ງທັງ ໝົດຂອງເຂື່ອນໄຟຟ້າດອນສະໂຮງ 260 ເມກາວັດ.
ຈາກນັ້ນ ທ່ານ ຄຳມະນີ ອິນທິລາດ ໄດ້ຂຶ້ນມີຄຳເຫັນ ໂດຍເນື້ອໃນສຳຄັນທ່ານໄດ້ກ່າວວ່າ:
ໂຄງການເຂື່ອນໄຟຟ້າດອນສະໂຮງແມ່ນໂຄງການຍຸດທະສາດຂອງລັດຖະບານ ໃນການພັດທະນາເຂື່ອນໄຟຟ້າພະລັງນ້ຳ ເຊິ່ງເປັນໂຄງການຂະໜາດໃຫຍ່ 1 ໃນ 2 ເຂື່ອນ ທີ່ກຳລັງດຳເນີນການກໍ່ສ້າງຢູ່ແມ່ນ້ຳຂອງ ເປັນເຂື່ອນທີ່ມີລັກສະ ນະພິເສດ ມີຜົນປະໂຫຍດສູງສຸດ ແຕ່ມີຜົນກະທົບຕໍ່ທຳມະຊາດ ແລະ ສັງຄົມໜ້ອຍທີ່ສຸດຖ້າທຽບໃສ່ເຂື່ອນອື່ນໆ ເຊິ່ງເຂື່ອນດອນສະໂຮງແຫ່ງນີ້ສ່ວນຫຼາຍແມ່ນສົ່ງຂາຍໃຫ້ປະເທດກຳປູເຈຍ.
ແຫຼ່ງຂໍ້ມູນ: ພາບ-ຂ່າວ ສີພອນ, ໜັງສືພິມວຽງຈັນໃໝ່