ແຂ່ງຂັນຊ່ວງເຮືອ ໃນງານບຸນອອກພັນສາປະວໍລະນາ ແລະ ຊ່ວງເຮືອປະເພນີ ປະຈຳປີ 2018 ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ ມີເຮືອຊ່ວງແຈ້ງເຈດຈຳນົງເຂົ້າຮ່ວມແຂ່ງຂັນທັງໝົດ 35 ລຳ ໃນ 3 ປະເພດ ຄື: ເຮືອປະເພນີຊາຍ-ຍິງ ເຮືອສູດຊາຍ ແລະ ເຮືອກີລາ 12 ສີພາຍຊາຍ ເຊິ່ງຈະເລີ່ມແຂ່ງຂັນກັນໃນລະຫວ່າງວັນທີ 24-25 ຕຸລາ ນີ້.
ທ່ານນາງ ບົວລອນ ວົງດາລາແສນ ເຈົ້າເມືອງຈັນທະບູລີ ທັງເປັນປະທານຄະນະກຳມະການຈັດງານບຸນດັ່ງກ່າວ ຖະແຫຼງຂ່າວຕໍ່ສື່ມວນຊົນ ວ່າ: ສຳລັບການກະກຽມຈັດງານສະເຫຼີມສະຫຼອງງານບຸນອອກພັນສາປະວໍລະນາ ແລະ ຊ່ວງເຮືອປະເພນີ ປະຈຳປີ 2018 ທີ່ທ່າວັດຈັນ ເມືອງຈັນທະບູລີ ປີນີ້ ມີເຮືອແຈ້ງເຈດຈຳນົງເຂົ້າຮ່ວມການແຂ່ງຂັນທັງໝົດ 35 ລຳ ໃນ 3 ປະເພດຄື:
ເຮືອປະເພນີຊາຍ 9 ລຳ ເຮືອປະເພນີຍິງ 5 ລຳ ເຮືອສູດຊາຍ 5 ລຳ ແລະ ເຮືອກີລາ 12 ສີພາຍ 16 ລຳ ປີນີ້ທາງເມືອງຈັນທະບູລີ ຈະເນັ້ນລະບຽບສຸດໆກັບຜູ້ປະກອບການ ໂດຍສະເພາະການເກັບປີ້ຄ່າຝາກລົດ ທາງຄະນະຮັບຜິດຊອບຈັດງານແມ່ນກຳນົດໃຫ້ຄື: ລົດຖີບ ລາຄາ 2.000 ກີບຕໍ່ຄັນ ລົດຈັກຕ້ອງເກັບໃນລາຄາ 5.000 ກີບຕໍ່ຄັນ ລົດຈ່ຳໂບ້-ຕຸກໆ ລາຄາ 10.000 ກີບ ແລະ ລົດເກັງ-ລົດກະບະ ລາຄາບໍ່ເກີນ 15.000 ກີບຕໍ່ຄັນ.
Cr.VientianeMai