ພິທີປິດກອງປະຊຸມຄົບຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິບັດລາວ ຄັ້ງທີ 5 ສະໄໝທີ VII ຈັດຂຶ້ນ ທີ່ຫໍປະຊຸມແຫ່ງຊາດ ເປັນປະທານຂອງທ່ານ ອາລຸນໄຊ ສູນນະລາດ ເລຂາຄະນະບໍລິຫານງານ ສຊປລ ເປັນກຽດເຂົ້າຮ່ວມຂອງທ່ານ ບຸນຍັງ ວໍລະຈິດ ປະທານປະເທດ ມີຮອງເລຂາ ສຊປລ ຫົວໜ້າ ຮອງຫົວໜ້າຫ້ອງການ ຕາງໜ້າອົງການຈັດຕັ້ງມະຫາຊົນ ພ້ອມດ້ວຍຂະແໜງການກ່ຽວຂ້ອງເຂົ້າຮ່ວມ.
ໃນກອງປະຊຸມໄດ້ສຸມໃສ່ຄົ້ນຄວ້າປະກອບຄຳຄິດຄຳເຫັນ ແລະ ຕົກລົງເປັນເອກະພາບ ບັນດາເນື້ອໃນບົດສະຫຼຸບ ເຊື່ອມຊຶມບົດແນະນຳການຍ້ອງຍໍການຈັດຕັ້ງຊາວໜຸ່ມ-ເຍົາວະຊົນໃນໄລຍະໃໝ່ ຜ່ານບົດສຳຫຼວດການນຳພາລວມ ຜ່ານຮ່າງແຜ່ນພັດທະນາຊາວໜຸ່ມ-ເຍົາວະຊົນ 5 ປີ ຄັ້ງທີ II (2020-2025)
ຜົນສຳເລັດຂອງກອງປະຊຸມຄັ້ງນີ້ ເປັນການຢັັ້ງຢືນເຖິງຄວາມສາມັກຄີເປັນເອກະພາບ ແລະ ຄວາມຮັບຜິດຊອບການເມືອງ ຂອງບັນດາຜູ້ແທນກອງປະຊຸມ ຜ່ານການປະກອບຄຳຄິດຄຳເຫັນ ຢ່າງກົງໄປກົງມາ ມີເຫດຜົນ ພາວະວິໄສ ເພື່ອເສີມຂະຫຍາຍບົດຮຽນອັນດີ ແລະ ປັບປຸງແກ້ໄຂຂໍ້ຄົງຄ້າງ ຈາກການຈັດຕັ້ງປະຕິບັດບັນດາໂຄງການ ກິດຈະກຳກ່ຽວກັບ ຊາວໜຸ່ມ-ເຍົາວະຊົນ ທີ່ຜ່ານມາ
ແນໃສ່ເພື່ອສືບຕໍ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ມະຕິກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VII ໃນໄລຍະທ້າຍສະໄໝໃຫ້ສຳເລັດຜົນ ພ້ອມທັງເປັນການກະກຽມຄວາມພ້ອມຮອບດ້ານ ໃຫ້ແກ່ກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VIII ທີ່ຈະມາເຖິງ ນອກຈາກນີ້ ທ່ານ ອາລຸນໄຊ ສູນນະ ລາດ ກໍໄດ້ລາຍງານສະພາບການຈັດຕັ້ງປະຕິບັດວຽກງານຊາວໜຸ່ມ ຕະຫຼອດໄລຍະຜ່ານມາໃຫ້ປະທານປະເທດຊາບ.
ໂອກາດດັ່ງກ່າວ ທ່ານ ບຸນຍັງ ວໍລະຈິດ ກໍໄດ້ໂອ້ລົມຕໍ່ກອງປະຊຸມຄັ້ງນີ້ ກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ ຕ້ອງເອົາໃຈໃສ່ຕໍ່ບັນຫາການຍົກລະດັບຄຸນນະພາບຂອງສະມາຊິກຊາວໜຸ່ມ ຜ່ານຂະບວນແຂ່ງຂັນປະຕິບັດຂໍ້ແຂ່ງຂັນ 4 ບຸກ ຂອງຕົນຢ່າງຕັ້ງໜ້າ ແລະ ເອົາຈິງເອົາຈັງ ສ້າງໃຫ້ພະນັກງານຊາວໜຸ່ມໜັກແໜ້ນ ເປັນແບບຢ່າງທາງດ້ານແນວຄິດ ແລະ ການກະທຳ ຕ້ອງມີແນວຄິດ ເບິ່ງກວ້າງເຫັນໄກ ເປັນແບບຢ່າງຫ້າວຫັນນຳໜ້າໃນທຸກວຽກງານ
ມີຄວາມຮູ້ຄວາມສາມາດ ແລະ ທັກສະດ້ານຕ່າງໆທີ່ແນ່ນອນ ທັງຕ້ອງຮູ້ພາສາຕ່າງປະເທດໃດໜຶ່ງທີ່ແນ່ນອນ ຮູ້ນຳໃຊ້ເຕັກໂນໂລຊີທີ່ກ້າວໜ້າ ຕ້ອງມີຄຸນສົມບັດສິນທຳປະຕິວັດ ຄະນະຊາວໜຸ່ມແຕ່ລະຂັ້ນ ແຕ່ລະຂະແໜງການ ແລະ ທ້ອງຖິ່ນຕ້ອງຕັ້ງໜ້ານຳພາສະມາຊິກຊາວໜຸ່ມ ເຂົ້າໃນການເຄື່ອນໄຫວຈັດຕັ້ງປະຕິບັດໃນທຸກວຽກງານຂອງຊາດໃນຫຼາຍຂະແໜງການສາຂາວິຊາອາຊີບ ໃນຫຼາຍລະດັບ ຫຼາຍສີສັນ ຮູບແບບໂດຍຕິດພັນກັບການຈັດຕັ້ງປະຕິບັດໜ້າທີ່ການເມືອງຂອງທ້ອງຖິ່ນ ຂະແໜງການ ຮາກຖານຂອງຕົນ ເຮັດໃຫ້ທຸກການເຄື່ອນໄຫວຂອງຊາວໜຸ່ມມີຊີວິດຊີວາ ທັງນຳເອົາຜົນປະໂຫຍດຕົວຈິງມາສູ່ເຂົາເຈົ້າ ສັງຄົມ ແລະ ປະເທດຊາດ
ອັນສຳຄັນເປັນພິເສດ ແມ່ນຄະນະຊາວໜຸ່ມປະຊາຊົນປະຕິວັດລາວ ຕ້ອງມີການປ່ຽນແປງໃໝ່ຕົນເອງ ທາງດ້ານແບບແຜນວິທີເຮັດວຽກກັບຊາວໜຸ່ມ ກັບມະຫາຊົນ ວິທີການປຸກລະດົມຂົນຂວາຍ ແລະ ຊ່ວຍເຫຼືອເຂົາເຈົ້າ ທົບທວນການແບ່ງງານໃຫ້ໄປສູ່ລະບອບຄວາມຮັບຜິດຊອບ ອາດແບ່ງເປັນກຸ່ມຕາມອາຊີບຂອງຊາວໜຸ່ມ ປ່ຽນແປງເນື້ອໃນ ແລະ ແບບວິທີການເຄື່ອນໄຫວໃຫ້ແທດເໝາະກັບຕົວຈິງ ແລະ ກຸ່ມເປົ້າໝາຍຊາວໜຸ່ມທີ່ຫຼາກຫຼາຍ ອົງການຈັດຕັ້ງມະຫາຊົນ ແລະ ສັງຄົມ
ຕ້ອງພ້ອມພຽງກັນສ້າງຊາວໜຸ່ມ ເຍົາວະຊົນ ເຮັດແນວໃດໃຫ້ຮຸ່ນຄົນເຫຼົ່ານີ້ມີຄຸນສົມບັດ ມີຄວາມສາມາດ ແລະ ເປັນເຈົ້າການ ປະກອບສ່ວນພັດທະນາປະເທດຢ່າງແຂງແຮງ ເພື່ອຈະກາຍເປັນຜູ້ສືບທອດແຫ່ງຍຸກສະໄໝ ສົມກັບຄຳຂະໜານນາມ ປະທານ ໄກສອນ ພົມວິຫານ ທີ່ວ່າ “ຊາວໜຸ່ມຈົ່ງເປັນດັ່ງນົກອີນຊີທີ່ບໍ່ຫັ່ວນກົວຕໍ່ພາຍຸລົມແດງ ຈົ່ງກາຍເປັນສິນໄຊແຫ່ງຍຸກສະໄໝພວກເຮົາ ” ແລະ ອື່ນໆ.
ແຫຼ່ງຂໍ້ມູນ: ໜັງສືພິມວຽງຈັນໃໝ່