ລັດຖະບານ ສປປ ລາວ ແລະ ລັດຖະບານເຢຍລະມັນ ສືບຕໍ່ຈັດຕັ້ງປະຕິບັດໂຄງການປົກປັກຮັກສາ ແລະ ນຳໃຊ້ລະບົບນິເວດປ່າໄມ້ ແລະ ຊີວະນາໆພັນແບບຍືນຍົງ ໄລຍະ 2 ເຊິ່ງໃນຂໍ້ຕົກລົງສືບຕໍ່ໂຄງການດັ່ງກ່າວ ລັດຖະບານເຢຍລະມັນໄດ້ປະກອບສ່ວນເປັນທຶນ 6.200.000 ເອີໂຣ ຫຼື ປະມານ 61,18 ຕື້ກີບ ເພື່ອສົ່ງເສີມວຽກງານການຄຸ້ມຄອງປ່າໄມ້ທີ່ດີ ຄຸ້ມຄອງເຂດປ່າສະຫງວນ ແລະ ການສົ່ງເສີມສິ່ງແວດລ້ອມຢ່າງມີປະສິດທິຜົນ.
ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະ ປ່າໄມ້ ກ່າວວ່າ:
ຂໍ້ຕົກລົງສືບຕໍ່ໂຄງການດັ່ງກ່າວ ສະແດງໃຫ້ເຫັນຄວາມມຸ່ງໝັ້ນທີ່ຈະສືບຕໍ່ ແລະ ເພີ່ມທະວີການຮ່ວມມືລະຫວ່າງລັດຖະບານລາວ-ເຢຍລະມັນ ໃນໄລຍະທຳອິດແຕ່ປີ 2017-2019 ສປປ ລາວ ມີຄວາມຄືບໜ້າຢ່າງຊັດເຈນ ໃນການບັນລຸເປົ້າໝາຍການພັດທະນາແບບຍືນຍົງ ໂດຍສະເພາະວຽກງານປົກປັກຮັກສາຊີວະນາໆພັນ ການເຮັດວຽກຮ່ວມກັນລະຫວ່າງອົງການປົກຄອງຂອງລັດ ແລະ ຜູ້ປະກອບການທີ່ບໍ່ສັງກັດລັດ ສ້າງເງື່ອນໄຂໃຫ້ການຄຸ້ມຄອງຊັບພະຍາກອນປ່າໄມ້ ແລະ ຊີວະນາໆພັນແບບຍືນຍົງ.
ທ່ານ ເຢນ ລຸກເຄິນເຮີມ ເອກອັກຄະລັດຖະທູດເຢຍລະມັນ ປະຈຳລາວ ກ່າວວ່າ:
ຂໍສະແດງຄວາມຍິນດີຕໍ່ລັດຖະບານລາວ ທີ່ມີຄວາມຄືບໜ້າຕໍ່ເປົ້າໝາຍລວມ ທີ່ໃຫ້ການສະໜັບສະໜູນໂດຍເຢຍລະມັນ ໂຄງການດັ່ງກ່າວຈະສືບຕໍ່ເສີມສ້າງຄວາມສາມາດຂອງພາກລັດ ເອກະຊົນ ແລະ ອົງການຈັດຕັ້ງທາງສັງຄົມ ເພື່ອນຳໃຊ້ປ່າໄມ້ຂອງປະເທດໃຫ້ມີຄວາມຍືນຍົງ ແລະ ປົກປ້ອງປ່າໄມ້ໃຫ້ມີປະສິດທິຜົນສູງ ເຊິ່ງຈະຊ່ວຍສ້າງເງື່ອນໄຂເຮັດໃຫ້ປະຊາຊົນລາວ ໄດ້ຮັບຜົນປະໂຫຍດຈາກລະບົບນິເວດວິທະຍາທີ່ອຸດົມສົມບູນ.
ສຳລັບໂຄງການໄລຍະທີ 2 ແມ່ນສືບຕໍ່ໂດຍອີງໃສ່ຜົນໄດ້ຮັບຂອງໂຄງການ ທີ່ໄດ້ຈັດຕັ້ງປະຕິບັດ ຜ່ານມາ ກ່ຽວກັບແຜນງານການຈັດຕັ້ງກົດໝາຍປ່າໄມ້ ການຄຸ້ມຄອງ ແລະ ການຄ້າໄມ້ ລະຫວ່າງ ສປປ ລາວ ແລະ ສະຫະພາບເອີຣົບ ການຈັດຕັ້ງປະຕິບັດລະບົບການຄຸ້ມຄອງແບບມີສ່ວນຮ່ວມ ແລະ ການສະເໜີເອົາປ່າສະຫງວນແຫ່ງຊາດ ຫີນໜາມໜໍ່ ເຂົ້າເປັນມໍລະດົກໂລກທາງທຳມະຊາດ ຮ່ວມກັບອຸທິຍານແຫ່ງຊາດ ຟອງຍາແກບາງ ສສ ຫວຽດນາມ ແນໃສ່ການປັບປຸງຄວາມສາມາດໃນການຈັດຕັ້ງປະຕິບັດວຽກງານການສ້າງຈິດສຳນຶກດ້ານສິ່ງແວດລ້ອມ ໃຫ້ອົງການຈັດຕັ້ງລັດ ແລະ ອົງການຈັດຕັ້ງສັງຄົມຕ່າງໆ.
ພິທີລົງນາມສັນຍາການຮ່ວມມືດັ່ງກ່າວ ຈັດຂຶ້ນຢູ່ນະຄອນຫຼວງວຽງຈັນ ລະຫວ່າງກົມກວດກາປ່າໄມ້ ກົມປ່າໄມ້ ກະຊວງກະສິກຳ ແລະ ປ່າໄມ້ ກົມມໍລະດົກ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ກົມສົ່ງເສີມຄຸນນະພາບສິ່ງແວດລ້ອມ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ພະແນກກະສິກຳ ແລະ ປ່າໄມ້ແຂວງຄຳມ່ວນ ຫ້ອງວ່າການປົກຄອງເມືອງບົວລະພາ ແລະ GIZ ໂດຍມີທ່ານ ທອງພັດ ວົງມະນີ ແລະ ທ່ານ ເຢນ ລຸກເຄິນເຮີມ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ແຫຼ່ງຂໍ້ມູນ: ໜັງສືພິມວຽງຈັນໃໝ່