ປັດຈຸບັນມີຊາວຄ້າຂາຍໄດ້ເຂົ້າມາຈັບຈອງສະຖານທີ່ຂາຍສິນຄ້າ ໂດຍສະເພາະຢູ່ຈຸດເດີ່ນສະໜາມຫຼວງ ແລະ ບໍລິເວນອ້ອມຮອບ 80% ສ່ວນຢູ່ຈຸດສູນການຄ້າລາວ-ໄອເຕັກ ມີຊາວຄ້າຂາຍມາຈັບຈອງແລ້ວ 60% ແລະ ຈະເປີດຈັບຈອງໃຫ້ສຳເລັດໃນທ້າຍອາທິດນີ້.
ການຈຳໜ່າຍສິນຄ້າໃນງານວາງສະແດງສິນຄ້າ ໂອກາດບຸນນະມັດສະການພະທາດຫຼວງປະຈຳປີ 2018 ຈະເລີ່ມຈຳໜ່າຍແຕ່ວັນທີ 16-25 ພະຈິກ 2018 ສະເພາະຢູ່ຈຸດເດີ່ນສະໜາມຫຼວງແມ່ນອະນຸຍາດໃຫ້ຈຳໜ່າຍຜະລິດຕະພັນພາຍໃນ ແລະ ຜະລິດຕະພັນໂອດ໋ອບ ຢູ່ຈຸດດາວແດງເກົ່າແມ່ນຈຳໜ່າຍສິນຄ້າທົ່ວໄປ ສ່ວນຢູ່ຈຸດສູນການຄ້າລາວໄອເຕັກແມ່ນຈຳໜ່າຍສິນຄ້າພາຍໃນ ແລະ ຕ່າງປະເທດ.
ສຳລັບຜູ້ທີ່ເຂົ້າມາວາງສະແດງ ແລະ ຈຳໜ່າຍສິນຄ້າພາຍໃນງານ ຕ້ອງປະຕິບັດຕາມກົດລະບຽບໂດຍການຂາຍ-ຕິດປ້າຍໂຄສະນາຕ້ອງເປັນເງິນກີບແລະ ໂຄສະນາເປັນພາສາລາວ ແລະ ຫ້າມຂາຍ ແລະ ນຳເອົາຢາເສບຕິດ ສິ່ງມຶນເມົາ ອາວຸດ ມີດ ງ້າວ ໜ້າ ກະຖຸນ ສາຍແອວຫົວໃຫຍ່ ສະໜັບມື ອາວຸດຕ່າງໆ ສິນຄ້າລອກຮຽນແບບ ສິນຄ້າລາມົກອານາຈານ ແລະ ສິນຄ້າທີ່ຜິດກົດໝາຍເຂົ້າມາວາງຂາຍຢ່າງເດັດຂາດ ຫ້າມຂາຍເຄື່ອງຊະຊາຍ ວາງສິນຄ້າອອກນອກຮ້ານ ແລະ ຊື້ຂາຍສິນຄ້າເປັນເງິນຕາຕ່າງປະເທດ ອີງຕາມກົດລະບຽບຊົ່ວຄາວຂອງງານບຸນດັ່ງກ່າວ ໄດ້ອອກກົດລະບຽບຄ່າບໍລິການຝາກລົດໃຫ້ຜູ້ມອບເໝົາ ຫຼື ຜູ້ປະມູນສະຖານທີ່ຝາກລົດຈັດຕັ້ງປະຕິບັດຄື: ລົດໃຫຍ່ 20.000 ກີບ/ຄັນ/ຄັ້ງ ລົດຕຸກໆ 15.000 ກີບ/ຄັນ/ຄັ້ງ ແລະ ລົດຈັກ 10.000 ກີບ/ຄັນ/ຄັ້ງ.
ເພື່ອຮັກສາໄດ້ຄວາມເປັນລະບຽບຮຽບຮ້ອຍ ໃນການຕິດຕາມການຄ້າຂາຍສິນຄ້າ ພະແນກອຸດສາຫະກຳ ແລະ ການຄ້າ ໄດ້ຮ່ວມກັບຫ້ອງການອຸດສາຫະກຳ ແລະ ການຄ້າເມືອງ ຕຳຫຼວດເສດຖະກິດ 100 ກວ່າຄົນ ລົງຕິດຕາມຮ້ານຄ້າໃນຂອບເຂດງານແຕ່ລະວັນ ເພື່ອກວດກາຄວາມເປັນລະບຽບຮຽບຮ້ອຍ ສຳລັບຜູ້ສຳປະທານການຝາກລົດແມ່ນໃຫ້ຝາກໃນລາຄາຕາມແຈ້ງການ ຖ້າຜ່າຝືນຈະປະຕິບັດຕາມລະບຽບຢ່າງເຂັ້ມງວດ.
Cr.Vientianemai
ຮູບພາບ: facebook.com/548914071950807
#insidelaos