ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະຜູ້ແທນ ຂອງ ສປປ ລາວ ເຂົ້າຮ່ວມກອງປະຊຸມສຸດ ຍອດອາຊຽນ ຄັ້ງທີ 33 ແລະ ບັນດາກອງປະຊຸມສຸດຍອດອື່ນໆ ທີ່ກ່ຽວຂ້ອງ, ເຊິ່ງໄດ້ໄຂຂຶ້ນຢ່າງເປັນທາງການ ໃນຕອນແລງຂອງມື້ວານນີ້, ທີ່ປະເທດສິງກະໂປ (ປະທານອາຊຽນ ປີ 2018) ພາຍໃຕ້ຄຳຂວັນ: “ສ້າງປະຊາຄົມອາຊຽນໃຫ້ເຂັ້ມແຂງ ແລະ ທັນສະໄໝ”.
ຜູ້ນຳອາຊຽນ ໄດ້ປຶກສາຫາລື ກ່ຽວກັບການສ້າງປະຊາຄົມອາຊຽນໃຫ້ເຂັ້ມແຂງ ແລະ ທັນສະໄໝ ເພື່ອໃຫ້ອາຊຽນມີຄວາມສາມາດປັບຕົວ ແລະ ຮັບມືກັບສີ່ງທ້າທາຍຕ່າງໆ ໄດ້ຢ່າງທັນການ ໂດຍສະເພາະ ໃນຍຸກເສດຖະກິດດີຈີຕອນ ແລະ ການປະຕິວັດ ອຸດສາ ຫະກຳ 4.0 ທີ່ເຕັກໂນໂລຊີ ມີການພັດທະນາຢ່າງໄວວາ.
ພ້ອມນີ້, ຜູ້ນຳອາຊຽນ ຍັງໄດ້ສະແດງຄວາມຍິນດີ ທີ່ບັນດາຂະແໜງ ການກ່ຽວຂ້ອງ ພາຍໃຕ້ສາມເສົາຄໍ້າ ປະຊາຄົມອາຊຽນ ໄດ້ເອົາ ໃຈໃສ່ຈັດຕັ້ງປະຕິບັດ ວິໄສທັດປະຊາຄົມອາຊຽນ 2025, ຈັດຕັ້ງປະຕິບັດບັນດາ ແຜນແມ່ບົດປະຊາຄົມ ການເມືອງ-ຄວາມໝັ້ນຄົງອາຊຽນ, ປະຊາຄົມເສດຖະກິດອາຊຽນ ແລະ ປະຊາຄົມວັດທະນະທຳ-ສັງຄົມອາຊຽນ ແລະ ຈັດຕັ້ງປະຕິບັດ ແຜນວຽກ ຂອງຂໍ້ລິເລີ່ມ ເພື່ອການເຊື່ອມໂຍງອາຊຽນ ສະບັບທີ 3 ແລະ ແຜນແມ່ບົດ ເພື່ອການເຊື່ອມຈອດອາຊຽນ 2025 ມີຜົນສຳເລັດເປັນກ້າວໆມາ.
ຜູ້ນຳອາຊຽນ ຍັງໄດ້ປຶກສາຫາລື ກ່ຽວກັບການຮ່ວມມືກັບພາຍນອກ, ໂດຍໄດ້ຕີລາຄາສູງຕໍ່ຜົນສຳເລັດຂອງການ ພົວພັນຮ່ວມມື ກັບປະເທດຄູ່ເຈລະຈາ ແລະ ຄູ່ຮ່ວມມື ພາຍນອກອາຊຽນ ໃນໄລຍະຜ່ານມາ ແລະ ໄດ້ຢໍ້າຄືນບົດບາດນຳພາ ແລະ ຄວາມເປັນແກນກາງຂອງອາຊຽນໃນໂຄງສ້າງພາກພື້ນ ແລະ ກົນໄກຕ່າງໆ ທີ່ອາຊຽນເປັນຜູ້ສ້າງຂຶ້ນ. ຜູ້ນຳອາຊຽນ ໄດ້ເຫັນດີໃຫ້ສືບຕໍ່ຮັດ ແໜ້ນການຮ່ວມມືກັບພາຍນອກ ເພື່ອເປັນການປະກອບສ່ວນ ສ້າງປະຊາຄົມອາຊຽນ ໃຫ້ນັບມື້ ນັບເຂັ້ມແຂງ ກໍ່ຄືປະກອບສ່ວນເຂົ້າໃນການ ປົກປັກຮັກສາສັນຕິພາບ, ຄວາມໝັ້ນຄົງ, ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງພາກພື້ນ ແລະ ໃນໂລກໂດຍລວມ.
ກອງປະຊຸມສຸດຍອດຄັ້ງນີ້, ຍັງໄດ້ແລກປ່ຽນຄວາມຄິດເຫັນ ຕໍ່ບັນຫາພາກພື້ນ ແລະ ສາກົນ ທີ່ພົ້ນເດັ່ນ ແລະ ມີຄວາມສົນໃຈຮ່ວມກັນ ເປັນຕົ້ນແມ່ນ ສະພາບການຢູ່ຕາເວັນອອກກາງ, ແຫລມເກົາຫລີ ແລະ ອື່ນໆ, ເຊິ່ງໂດຍລວມເຫັນວ່າ ມີຄວາມຄືບໜ້າໄປໃນທາງບວກ ອັນເປັນທ່ວງທ່າທີ່ດີຕໍ່ ການສ້າງສັນຕິພາບ ແລະ ສະຖຽນລະພາບໃນພາກພື້ນ. ພ້ອມນັ້ນ, ຍັງໄດ້ສະແດງຄວາມຍິນດີ ຕໍ່ຄວາມຄືບໜ້າຂອງການຈັດຕັ້ງປະຕິບັດຖະແຫລງການ ແຫ່ງການປະພຶດ ຂອງບັນດາຝ່າຍ ໃນທະເລຈີນໃຕ້, ລວມທັງການປຶກສາຫາລືຮ່າງກົດແຫ່ງການປະພຶດ ທີ່ໄດ້ເລີ່ມເຈລະຈາຕັ້ງແຕ່ຕົ້ນປີ 2018 ຜ່ານມາ.
ຜູ້ນຳອາຊຽນ ໄດ້ຮັບຮອງເອົາ 7 ເອກະສານສຳຄັນ ຄື: (1) ເອກະສານ ແຜນວຽກ ເຄືອຂ່າຍ ເມືອງອັດສະລິຍະອາຊຽນ, ເຊິ່ງເປັນບູລິມະສິດຂອງ ສິງກະໂປ ໃນນາມປະທານ ປີ 2018; (2) ຖະແຫລງການ ກ່ຽວກັບລະບຽບການ ວ່າດ້ວຍການຊ່ວຍເຫລືອ ດ້ານກົງສຸນແກ່ພົນລະເມືອງອາຊຽນ ຢູ່ປະເທດທີ່ສາມ; (3) ແຜນແມ່ບົດສົ່ງເສີມອາຊຽນ 2025: ການສົ່ງ ເສີມສິດທິຂອງຄົນພິການ; (4) ຖະແຫລງການອາຊຽນ ວ່າດ້ວຍການຮັບຮອງເອົາ ວັນຊາວໜຸ່ມອາຊຽນ ໃນການຈັດຕັ້ງປະຕິບັດ ບັນຫາການປ່ຽນແປງດິນຟ້າອາກາດ ແລະ ຄວາມພ້ອມ ໃນການຮັບມື ກັບໄພພິບັດ; (5) ຖະແຫລງການອາຊຽນ ວ່າດ້ວຍ ການສົ່ງເສີມອາຊີບສີຂຽວ ເພື່ອຄວາມສະເໝີພາບ ແລະ ການເຕີບໂຕແບບ ມີສ່ວນຮ່ວມ ຂອງປະຊາຄົມອາຊຽນ; (6) ຖະແຫລງການຮ່ວມອາຊຽນ ວ່າດ້ວຍການປ່ຽນແປງດິນຟ້າອາກາດ ນຳສະເໜີຕໍ່ກອງປະຊຸມລັດພາຄີຕໍ່ສັນຍາ ສປຊ ວ່າດ້ວຍ ການປ່ຽນແປງດິນຟ້າອາກາດ ຄັ້ງທີ 24; ແລະ (7) ຖະແຫລງການຮ່ວມອາຊຽນ ຕໍ່ກອງປະຊຸມລັດພາຄີ ຂອງສົນທິສັນຍາ ວ່າດ້ວຍຄວາມຫລາກຫລາຍ ດ້ານຊີວະນາໆພັນຄັ້ງທີ 14.
#insidelaos
Cr.KPL