ທ່ານ ສໍາລານ ສຸວັນນະໂຊດ ຫົວໜ້າພະແນກການເງິນ ແຂວງໄຊຍະບູລີ ໄດ້ລາຍງານການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2019 ຕໍ່ກອງປະຊຸມຄົບຄະນະ ຄັ້ງທີ 14 ສະໄໝທີ VI ຂອງຄະນະບໍລິຫານງານພັກ ແຂວງໄຊຍະບູລີ ໃນວັນທີ 14 ມັງກອນ ນີ້ວ່າ:
ປີ 2019 ແຂວງໄຊຍະບູລີ ໄດ້ຮັບຕົວເລກຈາກກະຊວງການເງິນ ຕາມແຜນເບື້ອງຕົ້ນ ຈໍານວນ 961,68 ຕື້ກີບ ດັດແກ້ແຜນຫລຸດລົງ 3,8 ຕື້ກີບ, ລວມແຜນດັດແກ້ໝົດປີ ທັງໝົດ 957,88 ຕື້ກີບ ທຽບໃສ່ແຜນການປີຜ່ານມາ ເພີ່ມຂຶ້ນ 11,11% ຫລື ເທົ່າກັບ 93,16 ຕື້ກີບ.
ຜ່ານການຈັດຕັ້ງປະຕິບັດ 1 ປີຜ່ານມາ ສາມາດປະຕິບັດໄດ້ທັງໝົດ 913,43 ຕື້ກີບ ເທົ່າກັບ 94,98% ຂອງແຜນເບື້ອງຕົ້ນ ເທົ່າກັບ 95,36% ຂອງແຜນດັດແກ້ ທຽບໃສ່ໄລຍະດຽວກັນເທົ່າກັບ 105,31% ໃນນັ້ນ ລາຍຮັບໃນສ່ວນຂອງສູນກາງ (ພູດຂອງສູນກາງ) ຕົວເລກແຜນການ 708,55 ຕື້ກີບ ທຽບໃສ່ແຜນການປີຜ່ານມາເພີ່ມຂຶ້ນ 18,38%, ສາມາດປະຕິບັດໄດ້ຕົວຈິງ 699,74 ຕື້ກີບ ເທົ່າກັບ 98,76% ໃນນີ້ຂະແໜງສ່ວຍສາອາກອນປະຕິບັດໄດ້ 610,89 ລ້ານກີບ ເທົ່າກັບ 88,54%, ຂະແໜງພາສີ 697,99 ຕື້ກີບ ເທົ່າກັບ 98,73%,
ຂະແໜງຄຸ້ມຄອງຊັບສິນຂອງລັດ 307,54 ລ້ານກີບ (ເປັນລາຍຮັບບັງເອີນ), ຂະແໜງຄຸ້ມຄອງລັດວິສາຫະກິດ 836,35 ລ້ານກີບ ເທົ່າກັບ 97,25%, ລາຍຮັບໃນສ່ວນຂອງທ້ອງຖິ່ນ (ພູດຂອງທ້ອງຖິນ) ຕົວເລກແຜນການ 249,33 ຕື້ກີບ ທຽບໃສ່ແຜນການປີຜ່ານມາ ຫລຸດລົງ 5,38% ສາມາດປະຕິບັດໄດ້ 213,68 ຕື້ກີບ ເທົ່າກັບ 84,41% ໃນນີ້ ຂະແໜງສ່ວຍສາອາກອນ 206,87 ຕື້ກີບ ເທົ່າກັບ 83,89%, ຂະແໜງຄຸ້ມຄອງຊັບສິນຂອງລັດ 6,61 ຕື້ກີບ ເທົ່າກັບ 101,74% ແລະຂະແໜງຄຸ້ມຄອງລັດວິສາຫະກິດ 199,34 ລ້ານກີບ ເທົ່າກັບ 398,70%,
ການແບ່ງຂັ້ນຄຸ້ມຄອງລາຍຮັບງົບປະມານຂັ້ນແຂວງຄຸ້ມຄອງ 183,48 ຕື້ກີບ ປະຕິບັດໄດ້ 148,03 ຕື້ກີບ ເທົ່າກັບ 76,78%, ຂັ້ນເມືອງຄຸ້ມຄອງ 65,85 ຕື້ກີບ ປະຕິບັດໄດ້ 65,65 ຕື້ກີບ ເທົ່າກັບ 108,81%, ການຄຸ້ມຄອງລາຍຈ່າຍສາມາດປະຕິບັດໄດ້ 506,19 ຕື້ກີບ ເທົ່າກັບ 92,35%, ການດຸ່ນດ່ຽງງົບປະມານຈາກສູນກາງຕາມແຜນ 282,81 ຕື້ກີບ ປະຕິບັດໄດ້ 316,70 ຕື້ກີບ ເທົ່າກັບ 107,36%.
ທ່ານ ສໍາລານ ສຸວັນນະໂຊດ ຍັງໄດ້ກ່າວຕື່ມອີກວ່າ: ສາເຫດທີ່ພາໃຫ້ການຈັດຕັ້ງປະຕິບັດລາຍຮັບງົບປະມານ ປີ 2019 ບໍ່ບັນລຸຕາມແຜນ ຍ້ອນວ່າ ລາຍຮັບທີ່ຕິດພັນກັບໂຄງການກໍ່ສ້າງ ຮັບເໝົາພື້ນຖານໂຄງລ່າງແມ່ນຫລຸດລົງຫລາຍ, ປີຜ່ານມາຕົວເລກອະນຸມັດການລົງທຶນ 60-70 ຕື້ກີບ. ສໍາລັບປີ 2019 ແມ່ນອະນຸມັດ 40,78 ຕື້ກີບ, ອາກອນຕິດພັນກັບໂຄງການລົງທຶນກໍ່ຫລຸດລົງ 2-3 ຕື້ກີບ,
ລາຍຮັບທີ່ເຄີຍຈັດເກັບໄດ້ຈາກໂຄງການເຂື່ອນໄຟຟ້ານໍ້າຂອງ ຫລຸດລົງ 11,85 ຕື້ກີບ, ເນື່ອງຈາກວ່າເຂື່ອນດັ່ງກ່າວໄດ້ກໍ່ສ້າງສໍາເລັດ, ແຮງງານກໍາມະກອນຫລຸດລົງ, ລາຍຮັບຈາກບໍລິສັດສາຂາໂທລະຄົມ, ສື່ສານ ແລະສາຍສົ່ງໄຟຟ້າຫລຸດລົງ 12,55 ຕື້ກີບ ແລະລາຍຮັບບັງເອີນທີ່ຂຶ້ນໄວ້ 44,33 ຕື້ກີບ ປະຕິບັດໄດ້ພຽງ 25,36 ຕື້ກີບ ຫລຸດແຜນ 18,96 ຕື້ກີບ.
ແຫຼ່ງຂໍ້ມູນ: ຂ່າວ-ພາບໂດຍ: ອຸ່ນເຮືອນ ໂພທິລັກ ນັກຂ່າວຫ້ອງວ່າການ ແຂວງໄຊຍະບູລີ ໂທ: 22126933