ບໍ່ດົນມານີ້ ຄະນະຜູ້ແທນແຫ່ງ ສປປ ລາວ ເຊິ່ງນຳໂດຍ ທ່ານ ອາລຸນແກ້ວ ກິດຕິຄຸນ, ລັດຖະມົນຕີ ປະຈຳສຳນັກງານນາຍົກລັດຖະມົນ ຕີ, ຮອງປະທານຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ (ຄຊກມດ) ໄດ້ເຂົ້າຮ່ວມກອງປະຊຸມຄັ້ງທີ 71 ຂອງ ຄະນະກຳມະການລຶບລ້າງ ທຸກຮູບການຈຳແນກຕໍ່ແມ່ຍິງ (ຊີດໍ) ສປຊ ເຊິ່ງໄດ້ຈັດຂຶ້ນທີ່ສຳນັກງານອົງການ ສປຊ ປະຈຳນະຄອນ ເຈນິວາ, ປະເທດສະວິດເຊີແລນ ເພື່ອປະເມີນ ແລະ ທົບທວນຄືນກ່ຽວກັບການຈັດຕັ້ງປະຕິບັດວຽກງານ ພາຍໃຕ້ສົນທິສັນຍາຊີດໍ ຂອງ ສປປ ລາວ ນັບແຕ່ການທົບທວນປະຈຳໄລຍະຄັ້ງທີ 2 ໃນ ປີ 2009 ຈົນເຖິງປະຈຸບັນ.
ໃນກອງປະຊຸມ ຄະນະຝ່າຍລາວ ໄດ້ຍົກໃຫ້ເຫັນເຖິງຜົນງານອັນພົ້ນເດັ່ນ ແລະ ຄວາມຄືບໜ້າໃນການຈັດຕັ້ງປະຕິບັດ ວຽກງານສົ່ງເສີມຄວາມກ້າວໜ້າຂອງແມ່ຍິງ, ຄວາມສະເໝີພາບຍິງ-ຊາຍ ແລະ ການລຶບລ້າງທຸກຮູບການຈຳແນກຕໍ່ແມ່ຍິງ ຢູ່ ສປປ ລາວ ເປັນຕົ້ນ ແມ່ນການປະຕິບັດນະໂຍບາຍ, ລັດຖະທຳມະນູນ ແລະ ກົດໝາຍ, ການພັດທະນາເສດຖະກິດ-ສັງຄົມ, ການລຶບລ້າງຄວາມທຸກຍາກ, ການປະຕິບັດເປົ້າໝາຍສະຫັດສະຫວັດດ້ານການພັດທະນາ, ການຮ່ວມມືສາກົນດ້ານສິດທິມະນຸດ ໂດຍສະເພາະ ສິດທິມະນຸດຂອງແມ່ຍິງ ກໍຄືການຈັດຕັ້ງປະຕິບັດສົນທິສັນຍາ ຊີດໍ ທີ່ ສປປ ລາວ ເປັນພາຄີ ອັນໄດ້ເຮັດໃຫ້ແມ່ຍິງລາວບັນດາເຜົ່າ ໄດ້ຮັບການປົກປ້ອງສິດ ແລະ ຜົນປະໂຫຍດອັນຊອບທຳ ໄດ້ຮັບການສົ່ງເສີມໃຫ້ມີຄວາມກ້າວໜ້າ, ມີຄວາມສະເໝີພາບລະຫວ່າງຍິງ-ຊາຍ ລວມທັງການລຶບລ້າງທຸກຮູບການຈຳແນກຕໍ່ແມ່ຍິງ ໄດ້ເທື່ອລະກ້າວ.
ຄະນະຜູ້ແທນ ສປປ ລາວ ໄດ້ສະໜອງຂໍ້ມູນ ແລະ ຊີ້ແຈງອະທິບາຍຢ່າງລະອຽດ ເປັນຕົ້ນແມ່ນ: ສະພາບກົງຈັກການຈັດຕັ້ງຂອງ ຄະນະກຳມາທິການແຫ່ງຊາດເພື່ອ ຄວາມກ້າວໜ້າຂອງແມ່ຍິງ ແລະ ແມ່-ເດັກ, ການຈັດຕັ້ງປະຕິບັດບັນດາກົດໝາຍ ທີ່ກ່ຽວພັນເຖິງສິດ ແລະ ຜົນປະໂຫຍດ ຂອງແມ່ຍິງ, ການເຂົ້າເຖິງຂະບວນການຍຸຕິທຳຂອງແມ່ຍິງ, ການເຂົ້າເຖິງການສຶກສາຂອງເດັກຍິງ, ບັນຫາສຸຂະພາບຂອງແມ່ຍິງ, ການມີວຽກເຮັດງານທຳ, ການຈ່າຍຄ່າແຮງງານລະຫວ່າງຍິງ-ຊາຍ, ແຮງງານເຄື່ອນຍ້າຍເພດຍິງ, ບັນຫາຄວາມສະເໝີພາບໃນຄອບຄົວ ລວມເຖິງການມີສ່ວນຮ່ວມ ໃນການຈັດຕັ້ງປະຕິບັດວຽກງານ ຂອງບັນດາອົງການບໍ່ສັງກັດລັດຖະບານ, ອົງການຈັດຕັ້ງທາງສັງຄົມ ແລະ ສະມາຄົມຕ່າງໆ, ລວມທັງ ການຈັດສັນງົບປະມານເພື່ອຮັບໃຊ້ ວຽກງານຄວາມກ້າວໜ້າຂອງແມ່ຍິງ, ຄວາມສະເໝີພາບຍິງ-ຊາຍ ແລະ ການລຶບລ້າງທຸກຮູບການຈຳແນກຕໍ່ແມ່ຍິງ.
ຄະນະກຳມະການຊີດໍ ແລະ ຜູ້ເຂົ້າຮ່ວມອື່ນໆ ມີຄວາມເຂົ້າໃຈເປັນຢ່າງດີກ່ຽວກັບການ ປະຕິບັດສິດທິມະນຸດຂອງແມ່ຍິງບັນດາເຜົ່າໃນ ສປປ ລາວ. ສຳລັບບາງຄຳຊີ້ແຈງຂໍ້ມູນກ່ຽວກັບ ວຽກປົກປ້ອງທາງສັງຄົມ ຄະນະຜູ້ແທນ ຂອງ ສປປ ລາວ ກໍໄດ້ສົ່ງຄຳຊີ້ແຈງເປັນລາຍລັກອັກສອນເພີ່ມເຕີມ ໃຫ້ຄະນະກຳມະການຊີດໍຕາມພາຍຫລັງ.
ກອງປະຊຸມໄດ້ດຳເນີນໄປດ້ວຍບັນຍາກາດທີ່ສ້າງສັນ ແລະ ເຂົ້າອົກເຂົ້າໃຈກັນລະຫວ່າງຄະນະຜູ້ແທນ ສປປ ລາວ ແລະ ຄະນະກຳມະການຊີດໍ ແຫ່ງ ສປຊ.
Cr.KPL
ຮູບປະກອບ: raosukunfung