ໄລຍະ 2-3 ວັນຜ່ານມາ ສື່ອອນລາຍໄດ້ນຳສະເໜີອອກຜ່ານເຟສບຸກ ວ່າດ້ວຍກໍລະນີທີ່ມີຄົນໄປຂໍກວດສຸຂະ ພາບເພື່ອຫາເຊື້ອພະຍາດ COVID-19 ຢູ່ໂຮງໝໍ 103 ແລະ ໂຮງໝໍມິດຕະພາບ 150 ຕຽງ ນະຄອນຫຼວງວຽງຈັນ ແລ້ວບໍ່ໄດ້ຮັບການບໍລິການໃຫ້ແບບບໍ່ໄດ້ເສຍຄ່າ.
ຕາມທີ່ອອກຂ່າວທາງສື່ອອນລາຍໄປກ່ອນໜ້ານີ້ ແມ່ນບໍ່ມີມູນຄວາມຈິງ ເປັນພຽງການເຂົ້າໃຈຜິດຂອງຜູ້ທີ່ຈະເຂົ້າມາກວດເທົ່ານັ້ນ ຈຶ່ງຂໍຮຽກຮ້ອງໃຫ້ສັງຄົມຈົ່ງສຶກສາຂໍ້ມູນກ່ຽວກັບການເຂົ້າໄປກວດຫາເຊື້ອພະຍາດ COVID-19 ໃຫ້ຢ່າງລະອຽດຖີ່ຖ້ວນ ກ່ອນຈະເດີນທາງເຂົ້າໄປກວດຢູ່ໂຮງໝໍ 2 ແຫ່ງດັ່ງກ່າວ.
ໃນໂອກາດຖະແຫຼງຂ່າວປະຈຳວັນກ່ຽວກັບການປ້ອງກັນ ແລະ ສະກັດກັ້ນການລະບາດຂອງພະຍາດ COVID-19 ຢູ່ກະຊວງສາທາລະນະສຸກ ວັນທີ 2 ມີນາ 2020 ທ່ານ ຣັດຕະນະໄຊ ເພັດສຸວັນ ຫົວຫນ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ກໍໄດ້ຊີ້ແຈງກ່ຽວກັບບັນຫາດັ່ງກ່າວວ່າ:
ເຫດການທີ່ເກີດຂຶ້ນຄັ້ງນີ້ ເປັນພຽງການເຂົ້າໃຈຜິດຂອງບຸກຄົນທີ່ເຂົ້າໃຈວ່າຖ້າເຂົ້າໄປກວດຫາເຊື້ອພະຍາດ COVID-19 ຢູ່ໂຮງໝໍແລ້ວ ຈະບໍ່ໄດ້ເສຍຄ່າໃຊ້ຈ່າຍ ໂດຍທີ່ບໍ່ມີການສຶກສາຂໍ້ມູນຢ່າງລະອຽດຖີ່ຖ້ວນ ເຊິ່ງຂັ້ນຕອນການກວດຫາເຊື້ອພະຍາດ ຈະກວດໃຫ້ສະເພາະບຸກຄົນທີ່ເຂົ້າກັບນິຍາມສົງໄສເທົ່ານັ້ນ ໂດຍສະເພາະຜູ້ທີ່ເດີນທາງມາຈາກປະເທດ ຫຼື ເຂດທີ່ມີການລະບາດ.
ເຊິ່ງບໍ່ສາມາດກວດໃຫ້ໝົດທຸກຄົນໄດ້ ເພາະນ້ຳຢາທີ່ໃຊ້ໃນການກວດມີຈຳນວນຈຳກັດ ຖ້າກວດໃຫ້ໝົດທຸກຄົນອາດບໍ່ພຽງພໍ ແຕ່ຖ້າມີການພົບການລະບາດ ຫຼື ເກີດມີກໍລະນີກວດພົບເຫັນຜູ້ຕິດເຊື້ອພະຍາດ ລັດຖະບານກໍຈະຮັບຜິດຊອບຄ່າໃຊ້ຈ່າຍທັງໝົດໃນການກວດຫາເຊື້ອພະຍາດ ແລະ ການປີ່ນປົວໃຫ້ໂດຍບໍ່ເສຍຄ່າຈົນກວ່າຈະຫາຍດີ.
ຈຶ່ງຮຽກຮ້ອງມາຍັງທຸກຄົນຈົ່ງເຂົ້າໃຈໃນການຈັດຕັ້ງປະຕິບັດວຽກງານຂອງເຈົ້າໜ້າທີ່ກ່ຽວຂ້ອງ ເພາະທຸກຂັ້ນຕອນແມ່ນເຮັດຕາມຫຼັກ ການສາກົນ ກໍຄືຂອງອົງການອະນາໄມໂລກວາງອອກຢ່າງເຄັ່ງຄັດ.
ສຳລັບອີກກໍລະນີໜຶ່ງທີ່ສັງຄົມໃຫ້ຄວາມສົນໃຈເຊັ່ນກັນ ແມ່ນຂ່າວລືທີ່ວ່າຢູ່ແຂວງສະຫວັນນະເຂດ ໄດ້ມີກໍລະນີຕ້ອງສົງໃສຄົນຕິດເຊື້ອພະຍາດ COVID-19 ໂດຍໄດ້ມີການສົ່ງຄົນເຈັບໄປປີ່ນປົວຢູ່ແຂວງມຸກ ດາຫານ ປະ ເທດໄທ ກໍບໍ່ມີມູນຄວາມຈິງ ເປັນພຽງການເຝິກຊ້ອມຂອງເຈົ້າໜ້າທີ່ກ່ຽວຂ້ອງຂອງແຂວງສະ ຫວັນນະເຂດ ແລະ ແຂວງມຸກດາຫານ ເພື່ອກຽມຮັບມືກັບການແຜ່ລະບາດຂອງພະຍາດດັ່ງກ່າວ
ປັດຈຸບັນ ສປປ ລາວ ຍັງບໍ່ພົບການແຜ່ລະບາດຂອງເຊື້ອພະຍາດນີ້ ມີພຽງກໍລະນີສົງໃສ 46 ກໍລະນີ ແລະ ໄດ້ຜ່ານການກວດກາຈາກອົງການອະນາໄມໂລກ ທັງ 46 ຄົນນີ້ ບໍ່ທັນພົບກໍລະນີຜູ້ທີ່ຕິດເຊື້ອພະຍາດ COVID-19.
ແຫຼ່ງຂໍ້ມູນ: ວຽງຈັນໃໝ່