ອີງຕາມຂໍ້ມູນຢູ່ໃນປຶ້ມວັນນະຄະດີລາວ (1987) ໄດ້ໃຫ້ຮູ້ວ່າ: ກາບປູ່ສອນຫຼານສະບັບເດີມ ແມ່ນພະພຸດທະໂຄສາຈານແຫ່ງເມືອງລ້ານຊ້າງເປັນຜູ້ແຕ່ງ, ແຕ່ບໍ່ຮູ້ວັນ, ເດືອນ ແລະ ປີແຕ່ງລະອຽດ; ແຕ່ອາດຈະແມ່ນແຕ່ງຂຶ້ນມາໃນສະໄໝອານາ ຈັກລາວລ້ານຊ້າງໃນລະຫວ່າງສະຕະວັດທີ XVII ໃນລັດຊະການຂອງເຈົ້າສຸລິຍະວົງສາ ເຊິ່ງເປັນສະໄໝ ລ້ານຊ້າງມີຄວາມຈະເລີນຮຸ່ງເຮືອງສູງສຸດ
ກາບປູ່ສອນຫຼານເປັນວັນນະຄະດີຂຽນປະເພດກາບກອນທີ່ເກົ່າແກ່ຂອງລາວ ທີ່ມີເນື້ອໃນສິດສອນແບບເຜີຍແຜ່ຫຼັກສິນທຳ-ທຳມະຈະລິຍາ. ເພື່ອບອກສອນ, ກ່າວເຕືອນຜູ້ເປັນລູກໆຫຼານໆທຸກຄົນໃຫ້ມີຄວາມຊື່ສັດບໍລິສຸດ, ປອດໃສຂາວສະອາດໃນການ ດຳລົງຊີວິດ, ມີການຄອງເຮືອນທີ່ດີ, ຮູ້ຈັກວາງຕົວ, ຮູ້ຈັກເຄົາລົບນັບຖືເຊິ່ງກັນ ແລະ ກັນ, ຮູ້ຈັກບ່ອນຕໍ່າ ບ່ອນສູງ, ທຳແຕ່ຄວາມດີມີປະໂຫຍດແກ່ຕົນ ສັງຄົມ ແລະ ປະເທດຊາດ, ຫຼີກເວັ້ນຄວາມຊົ່ວ
ໜັງສືກາບປູ່ສອນຫຼານ, ຜູ້ແຕ່ງໄດ້ອີງໃສ່ແນວຄິດຄຸນສົມບັດຕົວຈິງຂອງການດຳລົງຊີວິດຢູ່ໃນລະບອບສັງຄົມສັກດິນາ ແລະ ໜັງສືພີມທາງສາສະໜາພຸດອັນເປັນຫຼັກທຳຄໍາສອນມຸ່ງປະສົງເພື່ອປູພື້ນ ໃຫ້ແກ່ການປະຕິບັດຕົນ ແລະ ສຶກສາອົບຮົມໃຫ້ຄົນເຮົາເປັນຄົນດີຮອບດ້ານ
ເຖິງວ່າກາບປູ່ສອນຫຼານເປັນບົດວັນນະຄະດີຄຳສອນທີ່ເກົ່າແກ່ ທີ່ອີງຕາມຫຼັກທຳມະຈະລິຍາ ຂອງພະພຸດສາສະໜາ ແລະ ອີງຕາມຫຼັກຄຳສອນໃນຊີວິດຕົວຈິງຂອງລະບອບສັກດີນາຜ່ານມາໄດ້ຫຼາຍ ຮ້ອຍປີແລ້ວກໍຕາມ, ແຕ່ບໍ່ໄດ້ໝາຍຄວາມວ່າ ເນື້ອໃນຄຳສອນນັ້ນຈະເປັນສິ່ງເກົ່າແກ່ຫຼ້າຫຼັງທັງໝົດ
ເມື່ອມາຮອດສັງຄົມປັດຈຸບັນ, ປະເທດຊາດມີຄວາມຈະເລີນກ້າວໜ້າທາງດ້ານເຕັກໂນໂລຊີ ກໍຕາມ ແຕ່ເຫັນວ່າເນື້ອໃນຄຳສອນກາບປູ່ສອນຫຼານຍັງມີຄວາມສຳຄັນຢ່າງຫຼວງຫຼາຍ, ຄົນຮຸ່ນໃໝ່ໃຫຍ່ລຸນກໍ່ຄວນຈະສຶກສາຮຽນຮູ້ເນື້ອໃນຄຸນຄ່າຂອງກາບຢ່າງເລິກເຊິ່ງ, ມີຄວາມເຂົ້າໃຈ ແລະ ສາມາດໄປໝູນໃຊ້ຢູ່ໃນການດໍາລົງຊີວິດຕົວຈິງໄດ້ຢ່າງຖືກຕ້ອງ