ເພື່ອເປັນການສານຕໍ່ຄວາມຮ່ວມມືດ້ານການພັດທະນາ ແລະ ສົ່ງເສີມບຸກຄະລາກອນ ລະຫວ່າງ 2 ປະເທດ ລາວ-ໄທ ໃຫ້ມີຄວາມຮູ້, ຄວາມສາມາດຂຶ້ນຕື່ມທາງດ້ານວິຊາສະເພາະ; ສະນັ້ນ, ໃນວັນທີ 22 ສິງຫາ 2022 ຢູ່ທີ່ ສະຖານທູດໄທ ປະຈຳລາວ, ກົມຮ່ວມມືລະຫວ່າງປະເທດ (TICA) ໄດ້ຮ່ວມກັບ ສະຖານທູດໄທ ປະຈຳ ສປປ ລາວ ຈັດພິທີມອບທຶນການສຶກສາ ແລະ ທຶນຝຶກອົບຮົມ ຂອງລັດຖະບານໄທ ໃຫ້ກັບ ລັດຖະກອນລາວ ເພື່ອໄປສຶກສາຕໍ່ທີ່ປະເທດໄທ.
ເຂົ້າຮ່ວມໃນພິທີມອບທຶນໃນຄັ້ງນີ້ ມີທ່ານ ນາງ ອຸຣີຣັດ ຈະເລີນໂຕ, ອະທິບໍດີກົມຮ່ວມມືລະຫວ່າງປະເທດ (TICA), ທ່ານ ເຈດສະດາ ກະຕະເວທິນ, ເອກອັກຄະລັດຖະທູດໄທ ປະຈຳ ສປປ ລາວ, ທ່ານນາງ ຂັນທະລີ ສິລິພົງພັນ, ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ປອງດອງ ປະຊາພັກດີ, ຮອງຫົວໜ້າກົມ ອາຊີປາຊີຟິກ ແລະ ອາຟຣິກາ, ກະຊວງການຕ່າງປະເທດ.
ສຳລັບຈໍານວນຜູ້ທີ່ໄດ້ຮັບທຶນມີທັງໝົດມີ 42 ທຶນ ເຊິ່ງປະກອບດ້ວຍຜູ້ໄດ້ຮັບທຶນການສຶກສາລະດັບປະລິນຍາໂທ (ເຂົ້າສຶກສາໃໝ່) ພາຍໃຕ້ແຜນພັດທະນາຊັບພະຍາກອນມະນຸດສອງຝ່າຍ ລາວ-ໄທ ຈໍານວນ 27 ຄົນ ແລະ ອີກ 15 ຄົນ ທີ່ໄດ້ຮັບທຶນການສຶກສາ ດ້ານຄວາມຮູ້ທາງດ້ານການທູດ ໃຫ້ແກ່ນັກສໍາມະນາກອນຈາກໂຄງການ ສປປ ລາວ (Knowledge of Diplomacy for Participants from Lao People’s Democratic Republic), ໂດຍຈະມອບຜ່ານ ທ່ານ ປອງດອງ ປະຊາພັກດີ, ຮອງຫົວໜ້າກົມ ອາຊີປາຊີຟິກ ແລະ ອາຟຣິກາ, ກະຊວງການຕ່າງປະເທດ.
ສຳລັບທຶນການສຶກສາ ແລະ ການຝຶກອົບຮົມນີ້ ແມ່ນເປັນໜຶ່ງໃນບັນດາການເຄື່ອນໄຫວຂອງໂຄງການຮ່ວມມືດ້ານວິຊາການ ລາວ-ໄທ 3 ປີ (2020 – 2022) ໂດຍລັດຖະບານໄທ ຈະໃຫ້ທຶນການສຶກສາລະດັບປະລິນຍາໂທ 30 ທຶນຕໍ່ປີ ແລະ ທຶນສະໜັບສະໜຸນຝຶກອົບຮົມ ປີລະ 20 ຫຼັກສູດ.
ທ່ານ ນາງ ອຸຣີຣັດ ຈະເລີນໂຕ, ອະທິບໍດີກົມຮ່ວມມືສະຫວ່າງປະເທດ (TICA) ກ່າວວ່າ: ສຳລັບປະເທດໄທແລ້ວ ສປປ ລາວ ຖືວ່າເປັນປະເທດເພື່ອນບ້ານທີ່ສຳຄັນ, ເພາະສະນັ້ນແລ້ວ ພວກເຮົາກໍຢາກໃຫ້ການສະໜັບສະໜຸນ ແລະ ການພັດທະນາຂອງ ສປປ ລາວ ເຊິ່ງກໍຈະມີຫຼາກຫຼາຍຮູບແບບ ບໍ່ວ່າຈະເປັນເລື່ອງຂອງການພັດທະນາໂຄງການ ເຊິ່ງຫຼັກໆກໍມີຢູ່ 8 ສາຂາ ໂດຍຈະເນັ້ນຈຸດແຂງໃນຄວາມຊ່ຽວຊານຂອງປະເທດໄທ ແລະ ກໍເປັນຄວາມຕ້ອງການຂອງປະເທດລາວນຳ, ເປັນຕົ້ນແມ່ນເລື່ອງ ສາທາລະນະສຸກ, ດ້ານການແພດ, ດ້ານການສຶກສາ, ດ້ານກະສິກຳ ຫຼື ດ້ານການພັດທະນາຊຸມຊົມ.
ໃນການດຳເນີນໂຄງການດ້ານການພັດທະນາຂອງກົມຄວາມຮ່ວມມືລະຫວ່າງປະເທດ ບໍ່ວ່າຈະເປັນປະເທດໃດກໍຕາມ ລວມເຖິງປະເທດລາວນຳ ແມ່ນຈະໃຫ້ຄວາມສຳຄັນໃນການພັດທະນາດ້ານຊັບພະຍາກອນບຸກຄົນ ເປັນປັດໃຈຫຼັກທີ່ຈະເຮັດໃຫ້ໂຄງການພັດທະນາຕ່າງໆ ມີຄວາມຍືຍຍົງ ແລະ ສາມາດຕໍ່ຍອດໄປດຳເນີນການໃນດ້ານອື່ນໆໄດ້.
ທ້າວ ໄຊທະສອນ ມະລີວັນ, ພະນັກງານສັງກັດ ກົມທາງລົດໄຟ, ໂຄງການລົດໄຟ ລາວ-ໄທ, ກະຊວງ ໂຍທາທິການ ແລະ ຂົນສົ່ງ, ຜູ້ທີ່ໄດ້ຮັບທຶນການສຶກສາລະດັບປະລິນຍາໂທ ໃນສາຂາ Logistic and Supply Chain Management ກ່າວວ່າ ດີໃຈຫຼາຍທີ່ໄດ້ຮັບທຶນໄປຮຽນຕໍ່ທີ່ປະເທດໄທ ເຊິ່ງກໍເປັນອີກຄວາມຝັນໜຶ່ງຂອງນ້ອງ ໃນການສຶກສາຕໍ່ໃນສາຍນີ້.
ສຳລັບເງື່ອນໄຂສຳລັບທຶນການສຶກສານີ້ ແມ່ນເພິ່ນຈະຄັດເລືອກເອົາຜູ້ທີ່ຮຽນຈົບປະລິນຕີກ່ອນ ແລະ ມີພື້ນຖານທາງດ້ານພາສາອັງກິດຢູ່ໃນເກນມາດຕະຖານທີ່ເພິ່ນຕັ້ງໄວ້, ເຊິ່ງໂຄງການນີ້ຖືວ່າເປັນໂຄງການທີ່ດີຫຼາຍ ເພາະເປັນໂຄງການທີ່ເປີດກວ້າງໃຫ້ພະນັກງານລັດຖະກອນຂອງລາວ ໄດ້ມີໂອກາດຍົກລະດັບຄວາມຮູ້, ຄວາມສາມາດ ຂຶ້ນຕື່ມອີກ ຂໍພຽງແຕ່ເຮົາມີຄວາມສາມາດ ແລະ ມີເງື່ອນໄຂຕາມທີ່ເພິ່ນກຳນົດໃຫ້.