ໃນໂອກາດໂອ້ລົມກອງປະຊຸມແຮງງານ ແລະ ສະຫວັດດີການສັງຄົມທົ່ວປະເທດປະຈໍາປີ 2018 ໃນວັນທີ 30 ມັງກອນນີ້, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ເນັ້ນຫລາຍບັນຫາໃຫ້ຂະແໜງການດັ່ງກ່າວເອົາໃຈໃສ່ຄື: ໃຫ້ເພີ່ມທະວີຄວາມເອົາໃຈໃສ່ຄົ້ນຄວ້າສ້າງ, ປັບປຸງນິຕິກໍາ ແລະ ແຜນຍຸດທະສາດການພັດທະນາວຽກງານແຮງງານ ແລະ ສະຫວັດດີການສັງຄົມໃຫ້ເປັນລະບົບຄົບຊຸດ ເພື່ອເປັນເຄື່ອງມືໃນການຄຸ້ມຄອງວຽກງານດັ່ງກ່າວດ້ວຍກົດໝາຍເຂັ້ມແຂງເທື່ອລະກ້າວ.
ສືບຕໍ່ພັດທະນາຖານຂໍ້ມູນຕະຫລາດແຮງງານໃຫ້ເປັນລະບົບ ເພື່ອສາມາດຕອບສະໜອງຂໍ້ມູນທີ່ຈໍາເປັນໃນໂຄງປະກອບກໍາລັງແຮງງານໃຫ້ສົມສ່ວນກັບຄວາມຕ້ອງການຂອງຂະແໜງການເສດຖະກິດ, ພ້ອມທັງດັດສົມການສະໜອງ ແລະ ຄວາມຕ້ອງການພັດທະນາສີມືແຮງງານ ແລະ ການຈັດຫາວຽກເຮັດງານທໍາໃຫ້ມີຄວາມຄ່ອງຕົວ.
ສືບຕໍ່ປັບປຸງໂຄງລ່າງພື້ນຖານ ແລະ ກົນໄກການພັດທະນາສີມືແຮງງານ ໂດຍການມີສ່ວນຮ່ວມລະຫວ່າງພາກລັດ, ເອກະຊົນ, ຫົວໜ່ວຍແຮງງານ ແລະ ໂຄງການລົງທຶນຕ່າງໆ ໃຫ້ມີຄວາມກົມກຽວ ແລະ ແຂງແຮງກວ່າເກົ່າ, ສ້າງລະບົບການພັດທະນາສີມືແຮງງານ ໂດຍສຸມໃສ່ຫລັກສູດການຝຶກສີມືແຮງງານ, ການສ້າງມາດຕະຖານສີມືແຮງງານຕາມສາຂາອາຊີບຕ່າງໆໃຫ້ຫລາຍຂຶ້ນ ແລະ ເໝາະສົມກັບແຮງງານແຕ່ລະກຸ່ມໃຫ້ພຽງພໍກັບຄວາມຕ້ອງການຂອງຂະແໜງການເສດຖະກິດ ກໍຄືຕະຫລາດແຮງງານ.
ສົ່ງເສີມການຈັດຫາວຽກເຮັດງານທໍາ, ໂດຍຂະຫຍາຍຕາໜ່າງການບໍລິການຈັດຫາງານໃຫ້ຫລາຍຂຶ້ນ ແລະ ສາມາດໃຫ້ບໍລິການຕາມຄວາມຕ້ອງການຂອງຕະຫລາດແຮງງານ. ໃນນັ້ນໃຫ້ສຸມໃສ່ການຫັນປ່ຽນການຈັດຫາວຽກເຮັດງານທໍານອກລະບົບໄປສູ່ໃນລະບົບ ເພື່ອກ້າວສູ່ການມີຽກເຮັດງານທໍາທີ່ມີຄຸ່ນຄ່າ ແລະ ເປັນທໍາໃຫ້ມີຄວາມຄ່ອງຕົວ, ແກ້ໄຂບັນຫາແຮງງານເຄື່ອນຍ້າຍຈາກຊົນນະບົດເຂົ້າສູ່ຕົວເມືອງ, ການເຄື່ອນຍ້າຍໄປເຮັດວຽກຢູ່ຕ່າງປະເທດ, ການຂາດແຄນແຮງງານໃນທ້ອງຖິ່ນ ຫລື ການສະໜອງແຮງງານໃຫ້ໂຄງການລົງທຶນຂະໜາດໃຫຍ່ຕ່າງໆ ແລະ ການຫລຸດຜ່ອນອັດຕາການວ່າງງານໃຫ້ຫລຸດລົງ.
ເອົາໃຈໃສ່ສ້າງຄວາມເຂັ້ມແຂງໃຫ້ແກ່ອົງການສາມຝ່າຍ ເພື່ອປົກປ້ອງສິດຜົນປະໂຫຍດຂອງຜູ້ໃຊ້ແຮງງານ ແລະ ຜູ້ອອກແຮງງານໃຫ້ຖືກຕ້ອງຕາມລະບຽບກົດໝາຍ, ກວດກາບັນດາຫົວໜ່ວຍແຮງງານ, ສັນຍາແຮງງານ, ຄ່າແຮງງານ, ຄວາມປອດໄພ ແລະ ສຸຂະພາບແຮງງານ ໃຫ້ມີຄວາມຄ່ອງຕົວ ແລະ ມີປະສິດທິຜົນກວ່າເກົ່າ.
ເອົາໃຈໃສ່ຂະຫຍາຍອັດຕາປົກຄຸມປະກັນສັງຄົມໃຫ້ຫລາຍຂຶ້ນ, ໂດຍຊຸກຍູ້ໃຫ້ຜູ້ໃຊ້ແຮງງານ ແລະ ຜູ້ອອກແຮງ ງານ ປະຕິບັດຕາມລະບຽບກົດໝາຍປະກັນສັງຄົມ, ພ້ອມທັງຄຸ້ມຄອງກອງທຶນປະກັນສັງຄົມໃຫ້ມີບໍລິການອຸດໜູນຕ່າງໆວ່ອງໄວ, ໂປ່ງໃສ, ມີການສະສົມທຶນ ແລະ ມີຄວາມຍືນຍົງ, ສືບຕໍ່ປັບປຸງຂໍ້ມູນຂ່າວສານຜູ້ມີຜົນງານໃຫ້ເປັນລະບົບ, ມີຄວາມຊັດເຈນ, ຫລີກເວັ້ນເປົ້າໝາຍຊໍ້າຊ້ອນ ແລະ ບໍ່ຄົບເງື່ອນໄຂ ເພື່ອກ້າວໄປສູ່ການປິດການສະເໜີຂໍນະໂຍບາຍຂອງເປົ້າໝາຍໃໝ່, ຄົ້ນຄວ້າສ້າງຕັ້ງກອງທຶນສັງຄົມສົງເຄາະ ເພື່ອຮັບໃຊ້ໃຫ້ການຊ່ວຍເຫລືອຜູ້ປະສົບໄພພິບັດຕ່າງໆ, ຜູ້ດ້ວຍໂອກາດ ແລະ ຜູ້ທຸກຍາກໃຫ້ວ່ອງໄວກວ່າເກົ່າ, ເອົາໃຈໃສ່ປັບປຸງກົນໄກການບໍລິຫານຂອງຄະນະກໍາມະການຊີ້ນໍາວຽກງານເກັບກູ້ລະເບີດບໍ່ທັນແຕກ ຮ່ວມກັບຄູ່ຮ່ວມພັດທະນາໃຫ້ມີຄວາມແຂງແຮງກວ່າເກົ່າ, ເພີ່ມການລະດົມທຶນ ແລະ ນໍາໃຊ້ທຶນເຂົ້າໃນວຽກງານດັ່ງກ່າວຢ່າງມີປະສິດທິຜົນ, ເພີ່ມການຮັບບໍລິຈາກເລືອດ ແລະ ການແຈກຈ່າຍເລືອດຮັບໃຊ້ສັງຄົມໃຫ້ພຽງພໍກັບຄວາມຕ້ອງການ.
ທີ່ມາ: ໜັງສືພິມ ລາວພັດທະນາ