ທ່ານ ອະນຸສອນ ສິດທິລາດ ຮອງຫົວໜ້າຫ້ອງການກະສິກຳ ແລະ ປ່າໄມ້ ເມືອງປາກຊ່ອງ ແຂວງ ຈຳປາສັກ ໄດ້ໃຫ້ຮູ້ວ່າ: ໃນໄລຍະເວລາ 8 ເດືອນ ໃນປີ 2022 ການລ້ຽງສັດ ແລະ ປາເປັນສິນຄ້າ ຢູ່ເມືອງປາກຊ່ອງ ມີການຂະຫຍາຍຕົວຂຶ້ນຫຼາຍ ການລ້ຽງແບບຄອບຄົວກໍກ້າວໄປສູ່ການລ້ຽງແບບເປັນຟາມ ດ້ວຍການນຳໃຊ້ເຕັກນິກໃໝ່ ແລະ ສາຍພັນປັບປຸງ, ໄດ້ຮັບການສົ່ງເສີມ ດ້ານວິຊາການນຳພາຢ່າງຕໍ່ເນື່ອງຈາກລັດຖະບານ ແລະ ບວກກັບປະຊາຊົນ ຜູ້ປະກອບການມີຄວາມຫ້າວຫັນດຸໝັ່ນ.
ການລ້ຽງງົວ ແລະ ປາ ໃນຮູບແບບຄອບຄົວ ແລະ ເອກກະຊົນພາຍໃນ-ຕ່າງປະເທດມາລົງທຶນ ມີຟາມ ທັງໝົດ 10 ແຫ່ງ ໃນປີ 2021 ເຊິ່ງມາເປັນ 18 ແຫ່ງ ໃນ ປີ 2022 ອັນພົ້ນເດັ່ນໄດ້ແກ່: ຟາມລ້ຽງງົວ ມີ 11 ຟາມ, ມີຈໍານວນ ງົວ 1.335 ໂຕ; ຟາມລ້ຽງແບ້ 3 ຟາມ, ມີຈໍານວນແບ້ 184 ໂຕ; ຟາມລ້ຽງໝູຊີ້ນ 4 ຟາມ, ມີຈໍານວນໝູ 1.598 ໂຕ.
ທົ່ວເມືອງປາກຊ່ອງ ສາມາດບັນລຸຜົນຜະລິດສັດ, ປາ ແລະ ອື່ນໆ ເພື່ອສະໜອງແກ່ການບໍລິໂພກໄດ້ເຖິງ 1.718,68 ໂຕນ, ສະເລ່ຍໄດ້ 19,75 ກິໂລ/ຄົນ, ທຽບໃສ່ແຜນການປະຕິບັດໄດ້ 49,76 %, ທຽບໃສ່ໄລຍະດຽວກັນເພີ້ມຂຶ້ນ 22,30 %, ໃນນັ້ນມີ ຊີ້ນ 538,02 ໂຕນ, ປາ 642,71 ໂຕນ, ໄຂ່ 1,55 ໂຕນ ແລະ ອື່ນໆ 536 ໂຕນ.
ນອກຈາກ ການລ້ຽງສັດ-ປາເປັນສິນຄ້າຂະຫຍາຍຕົວນັ້ນ ການສ້າງຕົວແບບດ້ານການລ້ຽງສັດ ແລະ ການປະມົງ ກໍມີທ່າຂະຫຍາຍຕົວເພີ່ມຂຶ້ນຫຼາຍຄອບຄົວ ແຕ່ພົ້ນເດັ່ນກ່ວາໝູ່ແມ່ນ ຄອບຄົວຂອງ ທ່ານ ຄໍາມົນ ແພງພັນ ບ້ານ ຫ້ວຍກອງ, ເມືອງ ປາກຊ່ອງ (ລ້ຽງປາ) ມີລາຍຮັບ ສະເລັ່ຍ 100.000.000 ກີບ/ປີ
ທີ່ມາ: Lao National Radio