ຖືວ່າເປັນອີກໜຶ່ງຄວາມພູມໃຈຂອງຄົນລາວ ທີ່ແຂວງສາລະວັນ ໄດ້ປະກາດຮັບຮອງເອົາຫໍໄຕຣປີດົກ ເປັນມໍຣະດົກແຫ່ງຊາດ ລະດັບທ້ອງຖິ່ນ ຂຶ້ນຢ່າງເປັນທາງການ ໂດຍຫໍໄຕປີດົກ ວັດສີມຸງຄຸນ (ວັດກາງ) ໄດ້ສ້າງຂຶ້ນໃນປີ ຄ.ສ 1784 (ກ່ອນໜ້ານີ້ 234 ປີ) ສະໄໝການປົກຄອງຂອງເອກະລາຊາທີ 1 ຊື່ທ້າວ ຄຳພິທູນ ແຕ່ມີຂະໜາດນ້ອຍ, ຕໍ່ມາຮອດປີ ຄສ 1859 ສະໄໝເອກະລາຊາທີ 6 ທ້າວ ເຫງົ້າກັນຍາ ຈຶ່ງໄດ້ນຳພາປະຊາຊົນ ຊາວພຸດທັງຫລາຍ ກໍ່ສ້າງຫໍໄຕຂະໜາດໃຫຍ່ກວ່າຂຶ້ນມາແທນ ເພື່ອເປັນສູນລວມຈິດໃຈ.
ເປັນສະຖານທີ່ເກັບຮັກສາຄັງແຫ່ງຄວາມຮູ້ ໂດຍສະເພາະ ພຣະທຳຄຳສັ່ງສອນຂອງພຣະພຸດທະສາສະໜາ ທັງສາມປີດົກ 84.000 ພຣະທຳມະຂັນ (ແປດໝື່ນສີ່ພັນ ພຣະທຳມະຂັນ) ຄື: ພຣະສູດຕັນຕະປີດົກ ມີ 21.000 ພຣະທຳມະຂັນ, ພຣະວິໄນປີດົກ 21.000 ພຣະທຳມະຂັນ, ພຣະອະພິທຳປີດົກ 42.000 ພຣະທໍາມະຂັນ.
ການກໍ່ສ້າງໃນສະໄໝນັ້ນ ໄດ້ເຊີນເອົານາຍຊ່າງຜູ້ຊຳນານງານມາເປັນຜູ້ອອກແບບ ແລະ ນຳພາກໍ່ສ້າງ, ສຳລັບວັດຖຸອຸປະກອນຕ່າງໆທີ່ນຳມາໃຊ້ໃນການກໍ່ສ້າງແມ່ນໄມ້ເນື້ອແຂງ ຊຶ່ງໄດ້ນຳມາບໍລິຈາກວັດຖຸທານຂອງພໍ່ແມ່ ປະຊາຊົນແຕ່ລະບ້ານ ທີ່ມີໃຈໄສສັດທາ, ລັກສະນະການກໍ່ສ້າງ ໂຄງຫລັງຄາແບບຫໍປະສາດ, ມີ 54 ເສົາ ເຮັດດ້ວຍໄມ້ມັນປາ, ໄມ້ເຄື່ອງເທິງ ແລະ ໄມ້ເຄື່ອງລຸ່ມ ເຮັດດ້ວຍໄມ້ແຄນ, ບານປະຕູ ແລະບານປ່ອງຢ້ຽມໄມ້ດູ່, ມຸງດ້ວຍແປ້ນໄມ້ແດງທີ່ຂັດມັນແບບບູຮານ, ສີ່ວເຈາະຮູຕອກຫລີ້ມໃສ່ໄມ້ໄລຄັດຕາມຂື່, ຂາງ, ເສົາ ແລ້ວແກະສະຫລັກທີ່ເປັນຮູບພາບຕ່າງໆ ຊຶ່ງເປັນສິລະປະລວດລາຍທີ່ເປັນເອ ກະລັກຂອງຊາດ ແລະ ຂອງທ້ອງຖິ່ນ.
ສຳລັບການລົງສໍາຫຼວດ ແລະ ເກັບກໍາຂໍ້ມູນຫໍໄຕຣປີດົກ ວັດສີມຸງຄຸນ (ວັດກາງ) ເມືອງ ແລະ ແຂວງສາລະວັນ ຂຶ້ນເປັນມໍຣະດົກແຫ່ງຊາດລະດັບທ້ອງຖິ່ນ ຊຶ່ງແມ່ນໄດ້ລົງມືສຳຫຼວດຈັດຕັ້ງປະຕິບັດໃນວັນທີ 2-9 ມີນາ 2022 ແລະ ໄດ້ຮອງຮັບເປັນມໍລະດົກຢ່າງເປັນທາງການໃນວັນທີ 24 ພະຈິກ 2022.
ຂໍ້ມູນຈາກ: ໜັງສືພິມສາລະວັນ