ອໍານາດການປົກຄອງແຂວງຫົວພັນ ໄດ້ປະກາດຮັບຮອງເອົາ ຂັບຊຳເໜືອ ແລະ ພູມປັນຍາການຕໍ່າສິ້ນ, ຜ້າໄໝມ້ອນ ເປັນມໍລະດົກທາງດ້ານວັດທະນະທຳ ລະດັບທ້ອງຖິ່ນຂອງແຂວງ ທີ່ເມືອງຊຳເໜຶອ ແຂວງຫົວພັນ ເຊິ່ງປະຈຸບັນ ແຂວງ ຫົວພັນ ມີມໍລະດົກທີ່ໄດ້ຮັບການຂື້ນທະບຽນບັນຊີທັງໝົດ 4 ລາຍການ.
ຂັບຊຳເໜືອ ແມ່ນສຽງຂັບໜື່ງທີ່ເປັນເອກະລັກຂອງແຂວງຫົວພັນມາແຕ່ດົນນານ ຊຶ່ງປະຫວັດຕົ້ນກຳເນີດ ແມ່ນໃຜເປັນຜູ້ປະດິດຄິດແຕ່ງຂື້ນມານັ້ນ ກໍບໍ່ສາມາດຮູ້ໄດ້ຊັດເຈນ, ຮູ້ພຽງແຕ່ວ່າຂັບຊຳເໜືອ ໄດ້ຮັບການສືບທອດຈາກຮຸ່ນສູ່ຮຸ່ນຈົນມາເຖີງປະຈຸບັນ ແລະ ການຕໍ່າສິ້ນ, ຜ້າໄໝມ້ອນ ເປັນພູມປັນຍາທ້ອງຖິ່ນດັ່ງເດີມທີ່ມີມາແຕ່ບູຮານນະການຂອງປະຊາຊົນລາວບັນດາເຜົ່າ ໂດຍສະເພາະແມ່ນແມ່ຍິງຊາວແຂວງຫົວພັນ, ຊຶ່ງແມ່ນຫັດຖະກໍາການຕໍ່າສິ້ນ, ຜ້າໄໝ ທີ່ມີຄວາມເປັນເອກະລັກສະເພາະ, ມີຄວາມໂດດເດັ່ນທາງດ້ານສີສັນ, ຄວາມງາມຂອງລວດລາຍ ແລະ ຮູບແບບການປະດິດຄິດແຕ່ງຈາກແນວຄວາມຄິດ ແລະ ສີມືຂອງຜູ້ຕໍ່າ.
ມາຮອດປະຈຸບັນ ແຂວງ ຫົວພັນ ໄດ້ມີມໍລະດົກທີ່ໄດ້ຮັບການຂື້ນທະບຽນບັນຊີ ແລະ ຮັບຮອງຢ່າງເປັນທາງການແລ້ວ ມີທັງໝົດ 4 ລາຍການຄື: ມໍລະດົກແຫ່ງຊາດ 1 ແຫ່ງ ຄື (ຖໍ້າທ່ານຜູ້ນຳເມືອງວຽງໄຊ), ມໍລະດົກລະດັບທ້ອງຖິ່ນ 3 ລາຍການ ໃນນັ້ນມໍລະດົກທີ່ເປັນວັດຖຸ 1 ລາຍການ ຄື (ພຣະເຈົ້າອົງຕື້ ວັດສີບຸນເຮືອງ ໄຊຍາຣາມ) ແລະ ມໍລະດົກທີ່ບໍ່ເປັນວັດຖຸ 2 ລາຍການຄື (ຂັບຊຳເໜືອ ແລະ ພູມປັນຍາການຕ່ຳສິ້ນ, ຜ້າໄໝມ້ອນຫົວພັນ).
