ແນໃສ່ເຮັດໃຫ້ການສົ່ງເສີມການຜະລິດມີປະສິດທິຜົນ, ຫັນການຜະລິດໄປສູ່ຮູບໃໝ່ທີ່ສາມາດດຳເນີນການຜະລິດໃນພື້ນທີ່ກວ້າງ ແລະສົ່ງເສີມການຜະລິດໃຫ້ໄດ້ປະລິມານຫຼາຍ, ຮັບປະກັນດ້ານຄຸນນະພາບ, ທີ່ສຳຄັນຊ່ວຍໃຫ້ປະຊາຊົນຫຼຸດພົ້ນອອກຈາກຄວາມທຸກຍາກ, ດັ່ງນັ້ນໃນປີ 2019 ກະຊວງກະສິກໍາ ແລະປ່າໄມ້ຈຶ່ງສຸມໃສ່ 71 ໂຄງການມູນຄ່າ 128,70 ລ້ານໂດລາ ໃສ່ເຂດຈຸດສຸມຂອງບັນດາແຂວງທົ່ວປະເທດ.
ທ່ານ ພວງປາຣິສັກ ປຣະວົງວຽງຄຳ ຮອງລັດຖະມົນຕີກະຊວງກະສິກຳ ແລະປ່າໄມ້ໄດ້ລາຍງານໃຫ້ຮູ້ໃນບົດສະຫຼຸບສັງລວມຕີລາຄາຮອບດ້ານກ່ຽວກັບການຈັດຕັ້ງປະຕິບັດແຜນພັດທະນາກະສິກຳ, ປ່າໄມ້ ແລະພັດທະນາຊົນນະບົດປະຈຳປີ 2018 ແລະທິດທາງແຜນການປະຈຳປີ 2019 ຜ່ານມາວ່າ: ສະເພາະການລົງທຶນຂອງລັດໃນປີ 2018 ມີທັງໝົດ 367 ໂຄງການ ມູນຄ່າ 145,28 ຕື້ກີບ, ໃນນັ້ນໂຄງການສົ່ງເສີມວິຊາການ 152 ໂຄງການ ມູນຄ່າ 37,97 ຕື້ກີບ ແລະໂຄງການກໍ່ສ້າງ 215 ໂຄງການມູນຄ່າ 107,30 ຕື້ກີບ ຈັດຕັ້ງປະຕິບັດໄດ້ 100% ໃນນີ້ກະສິກຳ ແລະປ່າໄມ້ ມີ 180 ໂຄງການມູນຄ່າ 88,4 2 ຕື້ກີບ,ພັດທະນາຊົນນະບົດ ແລະລົບລ້າງຄວາມທຸກຍາກ 187 ໂຄງການມູນຄ່າ 56,85 ຕື້ກີບ, ສ່ວນການລົງທຶນຂອງຕ່າງປະເທດທີ່ກຳລັງຈັດຕັ້ງປະຕິ ບັດມີທັງໝົດ 98 ໂຄງການ, ໂດຍເນັ້ນໜັກການພັດທະນາກະສິກຳຕິດພັນກັບການປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະຫຼຸດພົ້ນອອກຈາກຄວາມທຸກຍາກ, ສ້າງຄວາມເຂັ້ມແຂງ, ພັດທະນາໂຄງລ່າງຂະໜາດນ້ອຍ, ປັບປຸງດ້ານການຜະລິດກະສິກຳເພື່ອໂພຊະນາການ.
ທ່ານຍັງໃຫ້ຮູ້ຕື່ມວ່າ: ສຳລັບ ປີ 2019, ກະຊວງແມ່ນຈະສຸມໃສ່ທັງໝົດ 71 ໂຄງການ ຊຶ່ງມີມູນຄ່າທັງໝົດ 128,70 ລ້ານໂດລາ, ໃນນັ້ນທຶນຕ່າງປະ ເທດ 117,85 ລ້ານໂດລາ ແລະທຶນ ພາຍໃນ 10,85 ລ້ານໂດລາ ທີ່ຈັດຕັ້ງປະຕິບັດຢູ່ບັນດາແຂວງເພື່ອເຮັດໃຫ້ວຽກງານຂອງທ້ອງຖີ່ນໄດ້ເຄື່ອນໄຫວຕາມວຽກຈຸດສຸມທີ່ກຳນົດທັງໂດຍກົງ ແລະທາງອອ້ມ ໂດຍສະເພາະບັນດາໂຄງ ການຈຸດສຸມຂອງແຂວງທີ່ໄດ້ມີການກຳ ນົດວຽກຮ່ວມກັນທັງທີ່ໄດ້ດຳເນີນໄປແລ້ວ, ກຳລັງຈະດຳເນີນໃນປີນີ້ ແລະໃນຕໍ່ໜ້າ, ພ້ອມດຽວກັນນັ້ນເພື່ອເຮັດໃຫ້ໂຄງການດັ່ງກ່າວໄດ້ຮັບປະສິດທິພາບຫຼາຍຂຶ້ນ, ກະຊວງຍັງຕ້ອງໄດ້ທົບທວນຄືນແຜນດຳເນີນງານຂອງແຂວງກໍ່ຄື ຂອງເມືອງຫາກເຫັນວ່າຍັງບໍ່ທັນສອດ ຄ່ອງ ແລະກໍຕ້ອງໄດ້ປຶກສາຫາລືຮ່ວມ ກັບຄະນະຊີ້ນຳໂຄງການ, ຜູ້ປະສານງານ ແລະຜູ້ໃຫ້ທຶນໃນການສຸມທຶນ, ສຸມເຕັກນິກໃສ່ວຽກຈຸດສຸມຂອງທ້ອງຖິ່ນທັງດ້ານໂຄງລ່າງ, ການສ້າງຄວາມເຂັ້ມແຂງດ້ານວິຊາການ ແລະ ອື່ນໆໃຫ້ມີປະສິດທິຜົນສູງ ແລະ ກົມກຽວ.
ທີ່ມາ: ນພສ ເສດຖະກິດ-ສັງຄົມ