ງານສະແດງຜະລິດຕະພັນທ່ອງທ່ຽວ ແລະ ວັດທະນະທໍາອາຊີໄດ້ໄຂຂຶ້ນໃນຕອນເຊົ້າຂອງວັນທີ 16 ພຶດສະພາ 2019 ນີ້ທີ່ ນະຄອນຫລວງປັກກິ່ງ ສປ ຈີນໂດຍມີຕົວແທນຈາກ 47 ປະເທດໃນຂົງເຂດອາຊີ ລວມທັງປະເທດກ່ຽວຂ້ອງເຂົ້າຮ່ວມຢ່າງໜາແໜ້ນ.
ໃນໂອກາດເປີດງານດັ່ງກ່າວນີ້, ທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວໄດ້ກ່າວວ່າ:
ຄືດັ່ງທີ່ຮູ້ນໍາກັນວຽກງານທ່ອງທ່ຽວແມ່ນໜຶ່ງໃນຂະແໜງເສດຖະກິດທີ່ໄດ້ຮັບການຂະຫຍາຍຕົວເພີ່ມຂຶ້ນຢ່າງຕໍ່ເນື່ອງ ແລະ ວ່ອງໄວໃນຫລາຍປະເທດໂດຍສະເພາະໃນຂົງອາຊີ ແລະ ທົ່ວໂລກ. ລັດຖະບານລາວໄດ້ຖືເອົາວຽກງານດັ່ງກ່າວເປັນໜຶ່ງໃນຫລາຍບຸລິມະສິດສໍາຄັນທີ່ນອນໃນແຜນພັດທະນາເສດຖະກິດ-ສັງຄົມໂດຍສຸມໃສ່ນະໂຍບາຍການທ່ອງທ່ຽວແບບທໍາມະຊາດ, ປະຫວັດສາດ ແລະ ວັດທະນະທໍາເປັນກົກເພື່ອດຶງດູດນັກທ່ອງທ່ຽວຕ່າງປະເທດ ລວມທັງນັກທ່ອງທ່ຽວ ສປຈີນ ເຂົ້າມາຢ້ຽມຢາມ ສປປ ລາວ.
ຕະຫລອດໄລຍະຜ່ານມານັ້ນລັດຖະບານໄດ້ເອົາໃຈໃສ່ ແລະ ເລັ່ງລັດພັດທະນາພື້ນຖານໂຄງລ່າງ ແລະ ສິ່ງອໍານວຍຄວາມສະດວກການທ່ອງທ່ຽວຈາກພາກເໜືອເຖິງພາກໃຕ້ຂອງລາວເພື່ອເຊື່ອມໂຍງກັບບັນດາປະເທດເພື່ອນບ້ານໄກ້ຄຽງ, ໄດ້ພັດທະນາຜະລິດຕະພັນທ່ອງທ່ຽວໂດຍສຸມໃສ່ການທ່ອງທ່ຽວແບບຊຸມຊົນມີສ່ວນຮ່ວມ ເຊິ່ງແນໃສເພື່ອຫລຸດຜ່ອນຄວາມທຸກຍາກຂອງປະຊາຊົນ ແລະ ການພັດທະນາເສດຖະກິດ-ສັງຄົມແບບຍືນຍົງ.
ໃນປີ 2018 ຜ່ານມາ, ລັດຖະບານລາວໄດ້ເປີດປີທ່ອງທ່ຽວລາວເຫັນວ່າໄດ້ຮັບຜົນສໍາເລັດບໍ່ໜ້ອຍ ໃນນັ້ນມີນັກທ່ອງທ່ຽວເຂົ້າມາຢ້ຽມຢາມລາວເຖິງ 4 ລ້ານກວ່າຄົນໃນນັ້ນ ນັກທ່ອງທ່ຽວຈີນເກືອບ 8 ແສນຄົນ, ເພີ່ມຂຶ້ນ 8% ຖ້າປຽບທຽບໃນດຽວກັນຂອງປີ 2017 ແລະ ຄາດວ່າພາຍໃນປີ 2019 ນີ້ຈໍານວນນັກທ່ອງທ່ຽວຈີນຈະເພີ່ນຂຶ້ນຫລາຍກວ່າປີ 2018 ຜ່ານມາ.
ເພື່ອເປັນການສົ່ງເສີມການຮ່ວມມືດ້ານການທ່ອງທ່ຽວລະຫວ່າງ ສປປ ລາວ ແລະ ສປ ຈີນເຫັນວ່າສອງລັດຖະບານໄດ້ຈັດຕັ້ງປະຕິບັດຫລາຍກິດຈະກໍາຮ່ວມກັນທີ່ໜ້າສົນໃຈ ໃນນີ້ໄດ້ຈັດກິດຈະກໍາປີທ່ອງທ່ຽວລາວ-ຈີນ 2019 ພາຍໃຕ້ວາລະປິ່ນອອ້ມຕາມສອງຝ່າຍເຫັນດີເປັນເອກະພາບຮ່ວມກັນຄື: ຈັດສໍາມະນາສົ່ງເສີມການທ່ອງທ່ຽວລາວ-ຈີນ, ວາງສະແດງກ່ຽວກັບວັດທະນະທໍາ, ສິລະປະດົນຕີ ແລະ ອື່ນໆ.
ແນວໃດກໍດີ ທ່ານ ລັດຖະມົນຕີຖະແຫລງຂ່າວ ວັດທະນະທໍາ ແລະ ທ່ອງທ່ຽວຍັງກ່າວວ່າ: ສປປ ລາວ ແລະ ສປ ຈີນມີຊາຍແດນຕິດຈອດກັນ ໃນນັ້ນມີດ່ານສາກົນ 2 ແຫ່ງ ແລະ 6 ດ່ານປະເພນີ ເຊິ່ງໄດ້ປະກອບສ່ວນສໍາຄັນເອື້ອອໍານວຍຄວາມສະດວກໃຫ້ແກ່ນັກທ່ອງທ່ຽວ, ຂະນະດຽວກັນນີ້ ພວກເຮົາກໍໄດ້ເປີດສາຍການບິນລະຫວ່າງປະເທດແບບບິນໂດຍກົງຮ່ວມກັນລະຫວ່າງນະຄອນຫລວງວຽງຈັນ ແລະ ເມືອງມໍລະດົກໂລກແຂວງຫລວງພະບາງຫາກວາງໂຈ, ຂຸນໝິງ, ໜານໜິງ, ຊາງໂຈ, ເຊີນຕູ, ຊາງໄຮ ແລະ ອື່ນໆ.
ຍິ່ງກວ່ານັ້ນ ພາຍໃນປີ 2021 ນີ້ ໂຄງການກໍ່ສ້າງເສັ້ນທາງລົດໄຟຄວາມໄວສູງລາວ-ຈີນຈະສໍາເລັດ ແລະ ເປີດໃຫ້ບໍລິການຢ່າງເປັນທາງການ ເຊິ່ງຈະກາຍເປັນສັນຍານອັນດີລະຫວ່າງ ສປປ ລາວ, ຈີນ ແລະ ອາຊຽນໃນການເພີ່ມທະວີການການເຊື່ອມຈອດ ແລະ ສ້າງຄວາມເຂັ້ມແຂງໃນການຮ່ວມມືສອງຝ່າຍສໍາລັບຂະແໜງອຸດສາຫະກໍາທ່ອງທ່ຽວຢ່າງຈະແຈ້ງ.
ທີ່ມາ: ມິເດຍລາວ