ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ລາຍງານການປະຕິບັດແຜນພັດທະນາເສດຖະ ກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດ 4 ເດືອນ, ຄາດຄະເນ 6 ເດືອນຕົ້ນປີ ແລະ ທິດທາງແຜນ ການໃນ 6 ເດືອນທ້າຍປີ 2019 ຕໍ່ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ໃນວັນທີ 5 ມິຖຸນາ ນີ້ວ່າ:
ລັດຖະບານໄດ້ຕີລາຄາລວມ ສະພາບການພັດທະນາດ້ານເສດຖະກິດ ແມ່ນຍັງສືບຕໍ່ຂະຫຍາຍຕົວໃນລະດັບ 6,5% ຖືເປັນອັດຕາການເຕີບໂຕທີ່ສູງເມື່ອທຽບກັບຫລາຍປະເທດໃນພາກພື້ນ, ແຕ່ເປັນອັດຕາທີ່ມີຈັງຫວະຊ້າລົງເມື່ອທຽບຫລາຍປີຜ່ານມາ ຍ້ອນການປະກອບສ່ວນຂອງຂະແໜງພະລັງງານ ແລະ ບໍ່ແຮ່ ຫລຸດລົງ, ຂະແໜງກະສິກຳ ຖືກກະທົບຈາກໄພພິບັດທາງທໍາມະຊາດ, ສໍາລັບຂະແໜງບໍລິການແມ່ນຂະຫຍາຍຕົວໄວຂຶ້ນ.
ທ່ານນາຍົກ ກ່າວວ່າ:
ລັດຖະບານເຫັນວ່າເສດຖະກິດມະຫາພາກຂອງປະເທດເຮົາຍັງມີຄວາມບອບບາງ ແລະ ສ່ຽງຕໍ່ສະພາບກະທົບຈາກພາຍນອກ, ເນື່ອງຈາກບັນຫາທີ່ສະສົມມາຫລາຍປີຍັງບໍ່ສາມາດແກ້ໄຂໄດ້ຢ່າງຂາດຕົວໄດ້ໃນເວລາອັນສັ້ນໆ ເປັນຕົ້ນແມ່ນບັນຫາການຂາດດຸນງົບປະມານຊໍ້າເຮື້ອ, ໜີ້ສິນສະສົມມາຫລາຍ, ຄັງສໍາຮອງເງິນຕາຕ່າງປະ ເທດຕໍ່າ, ການເກັບລາຍຮັບບໍ່ທັນຄົບຖ້ວນ ແລະ ຊັດເຈນ, ການສົ່ງເສີມການຜະລິດສິນຄ້າ ແລະ ການພັດທະນາທຸລະກິດຂະໜາດນ້ອຍ ແລະ ກາງ ຍັງບໍ່ທັນເຂັ້ມແຂງ ແລະ ເປັນຂະບວນຟົດຟື້ນ, ການປັບປຸງສົ່ງເສີມ ແລະ ນໍາໃຊ້ທ່າແຮງດ້ານທ່ອງທ່ຽວເຮັດບໍ່ທັນໄດ້ດີ, ການປັບປຸງວິສາຫະກິດລັດມີຄວາມຄືບໜ້າຊ້າ, ການແກ້ໄຂປາກົດການຫຍໍ້ທໍ້ຕ່າງໆໃນສັງຄົມ ເປັນຕົ້ນ: ບັນຫາຢາເສບຕິດ, ປຸ້ນຈີ້-ຊີງຊັບ, ຂີ້ລັກ-ງັດແງະ, ອຸປະຕິເຫດ ແລະ ໄພສັງຄົມອື່ນໆມີລັກສະນະແຜ່ຫລາຍ.
ແນວໃດກໍຕາມ, ລັດຖະບານຈະພະຍາຍາມຫລຸດຜ່ອນການເອື່ອຍອີງໃສ່ການລົງທຶນໃນຂະແໜງພະລັງງານ ແລະ ບໍ່ແຮ່ ແລະ ການກູ້ຢືມຈາກພາຍນອກມາລົງທຶນໃສ່ການສ້າງພື້ນຖານໂຄງລ່າງທີ່ມີປະສິດທິຜົນທາງດ້ານເສດຖະ ກິດຕໍ່າ.
ຊຸກຍູ້ການຜະລິດເປັນສິນຄ້າ, ການສົ່ງເສີມອຸດສາຫະກຳປຸງແຕ່ງ, ການທ່ອງທ່ຽວ ແລະ ການບໍລິການຜ່ານ, ການສົ່ງເສີມການເຊື່ອມຈອດ ແລະ ການພັດທະນາທ່າແຮງທາງດ້ານເສດຖະກິດອື່ນໆຂອງປະເທດ, ກວດກາ, ເກືອດຫ້າມ ແລະ ປະຕິບັດມາດຕະການເດັດຂາດຕໍ່ການເຄື່ອນໄຫວເສດຖະກິດທີ່ຂັດກັບແນວທາງນະໂຍບາຍ, ຜິດລະບຽບກົດໝາຍ ແລະ ບໍ່ສອດຄ່ອງກັບລະບຽບການ ເປັນຕົ້ນການປາບປາມການຄ້າຂາຍຢາເສບຕິດ, ການຕັດໄມ້ຊະຊາຍ ແລະ ສົ່ງໄມ້ທ່ອນອອກປະເທດ, ການລັກລອບໜີພາສີ ແລະ ການເຄື່ອນໄຫວບໍ່ດີອື່ນໆ, ເຊິ່ງເປັນການຈຳກັດ ແລະ ອັດຊ່ອງທາງຂອງກະແສເງິນທີ່ບໍ່ຖືກຕ້ອງເຂົ້າປະເທດ ແລະ ອື່ນໆ.
ແຫຼ່ງຂໍ້ມູນ: ໜັງສືພິມລາວພັດທະນາ