ທີ່ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ (ຖວທ ນວ) ສູນວັດທະນະທຳເດັກ ໄດ້ຈັດກອງປະຊຸມສະຫຼຸບຖອດຖອນບົດຮຽນ ໂຄງການເຝິກອົບຮົມຟ້ອມລຳວົງລາວ ແລະ ພິທີການຮັບ ແຂກ ມີທ່ານ ພອນຈັນ ແພງພູວັນ ຮອງຫົວໜ້າພະແນກ ຖວທ ນວ ທ່ານນາງ ວີປະສົງ ສຸວັນນະວົງ ຮອງຫົວໜ້າກົມສິລະປະການສະແດງ ກະຊວງ ຖວທ ບັນດາຮອງເຈົ້າເມືອງ ຫົວໜ້າຫ້ອງການ ຖວທ ເມືອງ ຫົວໜ້າ ຮອງຫົວໜ້າຂະແໜງ ສູນ ກອງວິຊາການ ແລະ ພະນັກງານວິຊາການທີ່ກ່ຽວຂ້ອງອ້ອມຂ້າງພະແນກ ຖວທ ນວ ເຂົ້າຮ່ວມ.
ໃນພິທີ ທ່ານ ຄຳພັດ ສຸວັນດີ ຫົວໜ້າສູນວັດທະນະທຳເດັກ ໄດ້ຂຶ້ນລາຍງານການເຄື່ອນໄຫວໂຄງການດັ່ງກ່າວວ່າ:
ປະເທດລາວ ເປັນປະເທດທີ່ມີຄວາມອຸດົມຮັ່ງມີທາງດ້ານສິລະປະວັດທະນະທຳ ໄດ້ຕິດພັນກັບວິຖີຊີວິດການເປັນຢູ່ຂອງຄົນລາວແຕ່ດົນນານແລ້ວ ຈົນມາຮອດປັດຈຸບັນ ຍັງສືບຕໍ່ຢ່າງບໍ່ມີວັນຈືດຈາງ ນັ້ນຄືການຂັບລຳ ເນື້ອຮ້ອງທຳນອງເພງ ຈັງຫວະໃນການຂັບລຳ ແມ່ນເປັນເອກະລັກສະເພາະຕົວແຕ່ລະທ້ອງຖິ່ນ ທຸກເທື່ອທີ່ເຂົາຂັບລຳມັກຈະຟ້ອນໄປນຳ ສ່ວນລີລາທ່າຟ້ອນ ລ້ວນແລ້ວແຕ່ຜູ້ໃດຈະຟ້ອນຕາມໃຈມັກຂອງໃຜລາວ.
ສ່ວນການຟ້ອນລຳນັ້ນ ນັບແຕ່ອະດີດຈົນຮອດປັດຈຸບັນ ແມ່ນໄດ້ສືບທອດກັນມາຕະຫຼອດ ເປັນຕົ້ນ ການສະ ຫຼອງໄຊຊະນະ ສະຫຼອງໝາກຜົນຂອງການເກັບກ່ຽວ ແລະ ງານບຸນປະເພນີຕາມຮີດ 12 ຂອງລາວ ເຊິ່ງການຟ້ອນລຳວົງລາວເປັນການຟ້ອນແບບມະຫາຊົນ ບໍ່ວ່ານ້ອຍໃຫຍ່ ເຖົ້າແກ່ກໍສາມາດຟ້ອນລຳວົງໄດ້ ຟ້ອນເປັນຄູ່ຍິງ-ຊາຍ ຟ້ອນຄຽງຄູ່ ເພື່ອເປັນການຮັກສາ ແລະ ສົ່ງເສີມຮີດຄອງປະເພນີອັນດີງາມ ກໍຄືຟ້ອນລຳວົງລາວໃຫ້ຄຽງຄູ່ກັບສັງຄົມລາວຕະຫຼອດໄປໃຫ້ມີຄວາມຍືນຍົງ.
ດັ່ງນັ້ນ ພະແນກ ຖວທ ນວ ຈຶ່ງຈັດໃຫ້ມີໂຄງການເຝິກອົບຮົມຟ້ອນລຳວົງລາວ ແລະ ພິທີການຮັບແຂກ ໂດຍມອບໃຫ້ສູນວັດທະນະທຳເດັກສົມທົບກັບຫ້ອງການ ຖວທ 9 ເມືອງ ເປັນຜູ້ຈັດຕັ້ງປະຕິບັດ ປີ 2016 ໂດຍໄດ້ລົງຈັດກິດຈະກຳຢູ່ແຕ່ລະບ້ານວັດທະນະທຳ ບ້ານພັດທະນາ ເຊິ່ງມີຜູ້ເຂົ້າຮ່ວມທັງໝົດ 1.360 ຄົນ ຍິງ 940 ຄົນ ແລະ ປີ 2018 ໂດຍສູນວັດທະນະທຳເດັກສົມທົບກັບສູນເຝິກອົບຮົມການນຳທ່ຽວ ແລະ ຫ້ອງການ ຖວທ ເມືອງ ຈັດກິດຈະກຳດັ່ງກ່າວ ໂດຍແບ່ງອອກເປັນ 2 ພາກ ຄື:
ກິດຈະກຳພາຍໃນພະແນກ ຖວທ ນວ ໄດ້ເຕົ້າໂຮມເອົາພະນັກງານທີ່ໜຸ່ມນ້ອຍມາເຝິກເດືອນລະຄັ້ງ ໂດຍກຳນົດເອົາທຸກອາທິດຂອງທ້າຍເດືອນ ຜ່ານມາມີຜູ້ເຂົ້າຮ່ວມ 22 ຄົນ ຍິງ 19 ຄົນ ຈັດກິດຈະກຳນອກສະຖານທີ່ 9 ຕົວເມືອງ ມີຜູ້ເຂົ້າຮ່ວມ 857 ຄົນ ຍິງ 326 ຄົນ ໃນນັ້ນ ມາຈາກບ້ານພັດທະນາ ແລະ ບ້ານວັດທະນະທຳ 399 ຄົນ ຍິງ 660 ຄົນ ຈາກຫ້ອງການຕ່າງໆອ້ອມຂ້າງເມືອງ 359 ຄົນ ຍິງ 276 ຄົນ ຈາກກອງບັນຊາການທະຫານເມືອງ ປກສ ເມືອງ 50 ຄົນ ແລະ ຈາກໂຮງຮຽນທີ່ເປັນຄູ ແລະ ນັກຮຽນ 49 ຄົນ ໂດຍເລີ່ມຈາກເມືອງສັງທອງ ວັນທີ 25 ກໍລະກົດ 2018 ແລະ ສຳເລັດຢູ່ເມືອງນາຊາຍທອງ ວັນທີ 13 ພະຈິກ 2019 ໂດຍກິດຈະກຳແມ່ນເນັ້ນໃສ່ເຝິກການຟ້ອນລຳວົງຂັ້ນພື້ນຖານ.
ແຫຼ່ງຂໍ້ມູນ: ໜັງສືພິມວຽງຈັນໃໝ່