ຂະນະນີ້ຝູງບົ້ງສາລີລະບາດໜັກທີ່ແຂວງໄຊຍະບູລີ ລວມເນື້ອທີ່ເສຍຫາຍແລ້ວ 2,01 ພັນເຮັກຕາ ໃນເກືອບ 40 ບ້ານຂອງ 4 ເມືອງຊາວກະສິກອນ 2,5 ພັນຄອບຄົວໄດ້ຮັບຜົນກະທົບຢ່າງໃດກໍຕາມເວລານີ້ພາກລັດຈາກກະ ຊວງກະສິກຳໄດ້ເລັ່ງເຂົ້າຊ່ວຍເຫຼືອໂດຍໄດ້ນຳຢາກຳຈັດບົ້ງລົງມອບໃຫ້ແຂວງເພື່ອກຳຈັດ ການລະບາດບໍ່ໃຫ້ແຜ່ຂະຫຍາຍອອກຕື່ມອີກໄດ້.
ທີ່ພະແນກກະສິກຳ ແລະປ່າໄມ້ແຂວງໄຊຍະບູລີໄດ້ມີພິທີມອບ-ຮັບຢາເຄມີ ແລະ ອຸປະກອນໃນການປ້ອງກັນ ແລະກຳຈັດບົ້ງຝູງສາລີທີ່ລະບາດໃນ 4 ເມືອງ ຂອງແຂວງໄຊຍະບູລີ ເຄື່ອງດັ່ງກ່າວປະກອບມີ:
ຢາເຄມີ Emamectin benzoate 5% ຈຳນວນ 60 ກັບ (600 ຊອງ), ຢາເຄມີ Chlorpyrifos 40% ຈຳນວນ 3 ຕຸກ, ບັ້ງສີດຢາຈຳນວນ 7 ອັນ, ຖົງມືຈໍານວນ 100 ຄູ່, ຊຸດປ້ອງກັນຈຳນວນ 70 ຊຸດ, ຜ້າອັດດັງຈຳນວນ 2 ກັບ ລວມມູນຄ່າທັງໝົດ: 23,76 ລ້ານກີບ ກ່າວມອບເຄື່ອງດັ່ງກ່າວໂດຍ ທ່ານ ວິໄລສຸກ ເຄນນະວົງ ຫົວໜ້າກົມປູກຝັງ ແລະ ກ່າວຮັບໂດຍ ທ່ານ ຄຳພຸດ ອິນທະວົງ ຮອງຫົວໜ້າພະແນກກະສິກຳ ແລະປ່າໄມ້ແຂວງຊ່ອງໜ້າສັກຂີພິຍານຫົວໜ້າຂະແໜງການທີ່ກ່ຽວຂ້ອງພະນັກງານ-ວິຊາການມາແຕ່ກົມປູກຝັງ, ສູນປ້ອງກັນພືດ ແລະພະແນກເຂົ້າຮ່ວມ.
ຊຶ່ງຂະແໜງການທີ່ກ່ຽວຈະໄດ້ນຳໃຊ້ເຄື່ອງທີ່ມອບໃນຄັ້ງນີ້ເຂົ້າໃນການປ້ອງກັນ ແລະ ກຳຈັດການແຜ່ລະບາດຂອງບົ້ງຝູງສາລີທີ່ກຳລັງລະບາດໃນ 4 ເມືອງ ຂອງແຂວງໄຊຍະບູລີມີເນື້ອທີ່ໄດ້ຮັບຜົນເສຍຫາຍ 2.015 ເຮັກ ຕາ ໃນນັ້ນມີເມືອງພຽງມີເນື້ອທີ່ 273,39 ເຮັກຕາ, ເມືອງປາກລາຍມີເນື້ອທີ່ 1.739,49 ເຮັກຕາ, ເມືອງແກ່ນທ້າວ 1,76 ເຮັກຕາ, ເມືອງໄຊສະຖານມີເນື້ອທີ່ 0,50 ເຮັກຕາກວມ ເອົາ 37 ບ້ານ ແລະມີຄອບຄົວໄດ້ຮັບຜົນກະທົບຈຳນວນ 2.529 ຄອບຄົວ .
ໃນໂອກາດນີ້ ທ່ານ ວິໄລສຸກ ເຄນນະວົງ ຫົວໜ້າກົມປູກຝັງ ແລະທີມງານຍັງໄດ້ລົງເບິ່ງພື້ນທີ່ເສຍຫາຍຂອງການລະບາດບົ້ງຝູງສາລີຕື່ມອີກ.
ແຫຼ່ງຂໍ້ມູນ: ໜັງສືພິມເສດຖະກິດ-ສັງຄົມ