ທ້າວ ວາດສະໜາ ແກ້ວມີໄຊ ອາຍຸ 16 ປີ ບ້ານເກີດຢູ່ ຫຼັງຄັງ ເມືອງບົວລະພາ ແຂວງຄຳມ່ວນ, ປັດຈຸບັນຮຽນຢູ່ຊັ້ນ ມໍ4. ເປັນຄົນໜຶ່ງທີ່ມັກກິລາປະເພດເຕະບານເປັນພິເສດ ໂດຍສະເພາະແມ່ນຕຳແໜ່ງຜູ້ຮັກສາປະຕູ ເພາະວ່ານ້ອງເອງເປັນຄົນຮ່າງສູງ ແລະເໜືອສິ່ງອື່ນໃດນັ້ນ ລາວມີຄວາມຝັນ ແລະຄວາມມຸ່ງໝັ້ນສະເໝີວ່າ ຕ້ອງເປັນນັກກິລາເຕະບານໃຫ້ໄດ້.
ເມື່ອເຫັນຂ່າວທາງເຟສບຸກ SCG Brand ວ່າ ທາງເອັດສຊີຈີ ແລະ ສະຫະພັນແຫ່ງຊາດລາວ ຈະຈັດການແຂ່ງຂັນເຕະບານນັດມິດຕະພາບ ລະຫວ່າງ ເອັດສຊີຈີ ເມືອງທອງ ຍູໄນເຕັດ ກັນ ທີມຊາດລາວ ຢູ່ທີ່ສະໜາມກິລາແຫ່ງຊາດລາວ ຫຼັກ 16 ແລະມີກິດຈະກຳແຈກບັດເຂົ້າຊົມຟຣີ ວາດສະໜາ ເປັນຄົນທຳອິດ ທີ່ອິນບ໋ອກເຂົ້າມາຖາມ ເຖິງວິທີການໄດ້ບັດ ເພາະຢາກເຂົ້າໄປນັ່ງຊົມໃນສະຫນາມເຕະບານ ໂດຍບໍ່ເລືອກວ່າຈະຢູ່ໃກ້ຫຼືຫຼືໄກຂອບສະໜາມກໍຕາມ.
ວາດສະໜາ ມີໄອດໍ້ຄື ອ້າຍຕັງ ສາລັດ ເຊິ່ງເປັນນັກກິລາຂອງທີມ ເອສຊີຈີ ເມືອງທອງ ຢູໄນເຕັດ ປະເທດໄທ ດ້ວຍຄວາມທີ່ບໍ່ຢາກພາດໂອກາດຄືດັ່ງປີກ່ອນ ທີ່ເອສຊີຈີເຄີຍຈັດງານນີ້ ທ້າວວາດສະໜາ ກໍໄດ້ຂຸ້ນຂ້ຽວ ຫາທຸກວິທີທາງເພື່ອເຂົ້າມາຊົມການແຂ່ງຂັນໃນຄັ້ງນີ້ ພຽງຂໍໃຫ້ໄດ້ເຫັນອ້າຍຕັງ ແລະນັກກິລາຄົນອື່ນໆ ໃນສະໜາມກິລາ.
ແຕ່ດ້ວຍອຸປະສັກທາງດ້ານເສດຖະກິດ ແລະການເດີນທາງຈາກເມືອງບົວລະພາຜ່ານພື້ນທີ່ນ້ຳຖ້ວມໃນແຂວງຄຳມ່ວນ ມາສູ່ນະຄອນຫລວງວຽງຈັນ ເຮັດໃຫ້ວາດສະໜາເກືອບຖອດໃຈໄປຫຼາຍຄັ້ງ ແຕ່ກໍຍັງໄດ້ກຳລັງໃຈຈາກທີມງານເຟສບຸກຂອງ ເອັດສຊີຈີ ໃຫ້ມຸ່ງໝັ້ນ ແລະຄ່ອຍໆແກ້ອຸປະສັກໄປເທື່ອລະດ້ານ ຈົນໃນທີ່ ວາດສະໜາ ກໍສາມາດເດີນທາງມາເຖິງນະຄອນຫຼວງວຽງຈັນໄດ້ ໂດຍບໍລິສັດເອັດສຊີຈີ ທີ່ເປັນເຈົ້າພາບໃນງານນີ້ ສະຫນັບສະຫນູນດ້ານການເດີນທາງແລະທີ່ພັກໃຫ້ບາງສ່ວນ.
ລາງວັນຂອງຄວາມບໍ່ຫຍໍ້ທໍ້ ພ້ອມດ້ວຍກຳລັງໃຈຈາກທີມ ເອັດສຊີຈີ ບໍ່ພຽງເຮັດໃຫ້ວາດສະໜາໄດ້ເຂົ້າຊົມບານນັດພິເສດນີ້ໄດ້ຢ່າງທີ່ຕັ້ງໃຈ ແຕ່ຍັງເຮັດໃຫ້ ເອັດສຊີຈີ ເມືອງທອງ ທີ່ຮູ້ເຖິງຄວາມຕັ້ງໃຈນີ້ ຕົກລົງໃຈໃຫ້ພົບກັບ ສາລັດ ຢູ່ເຢັນ ໃນສະໜາມກິລາຫຼັກ 16 ຢ່າງໃກ້ຊິດ ໃນວັນນັ້ນອີກດ້ວຍ.
ດ້ວຍຄວາມດີໃຈຢ່າງບໍ່ຄາດຝັນ ເຮັດໃຫ້ວາດສະໜາຂຽນຄຳຂອບໃຈ SCG ໄວ້ຫຼາຍເທື່ອໃນເຟສບຸກຂອງລາວ ລ່າສຸດ, ໃນມື້ເປີດເທີມການສຶກສາ ນ້ອງຂຽນຂໍ້ຄວາມຂອບໃຈ SCG ອີກເທື່ອ, ດ້ວຍລາຍມືຂອງນ້ອງເອງທີ່ໂຮງຮຽນ ເພື່ອສົ່ງເຖິງທີມງານ SCG ທຸກຄົນ ດັ່ງຂໍ້ຄວາມ ລຸ່ມນີ້:
“ນ້ອງຂໍຂອບໃຈມາຍັງ ບໍລິສັດ ເອສຊີຈີ ທີ່ເຮັດໃຫ້ນ້ອງໄດ້ຮັບໂອກາດດີໆແບບນີ້, ເປັນໂອກາດທີ່ເຕັມໄປດ້ວຍຮອຍຍິ້ມ ແລະຄວາມສຸກຂອງນ້ອງ ແລະໃຜຫຼາຍໆ ຄົນ. ແລະໂອກາດທີ່ເຮັດໃຫ້ນ້ອງໄດ້ໃກ້ຊິດກັບອ້າຍຕັງ ສາລັດ ຢູ່ເຢັນ ພ້ອມດ້ວຍນັກເຕະລະດັບອາຊຽນຫຼາຍໆຄົນ ຢ່າງສະໂມສອນ SCG Muangthong United FC. ພ້ອມທັງໄດ້ເສື້ອ ພ້ອມລາຍເຊັນນັກເຕະຂອງທາງສະໂມສອນລະດັບນີ້.
ຂອບໃຈເປັນຢ່າງຍິ່ງ.
ຈາກ: ທ້າວ ວາດສະໜາ”
ວາດສະໜາບອກກັບທີມງານພວກເຮົາອີກວ່າ ນ້ອງບໍ່ຢາກເຊື່ອເລີຍ ທີ່ໃນຄວາມຝັນຂອງຕົນເອງກາຍເປັນຄວາມຈິງໃນທີ່ສຸດ ແລະນ້ອງຍັງໄດ້ຮັບຄຳແນະນຳຈາກ ສາລັດ ຢູ່ເຢັນ ຕື່ມວ່າ ໃຫ້ນ້ອງເອງເດີນຕາມຄວາມຝັນນັ້ນໃຫ້ເຖິງທີ່ສຸດ! ຢ່າຢຸດຢູ່ກັບທີ່ ເຊິ່ງວາດສະໜາກໍຈະຍຶດໝັ້ນໃນຄຳໂອວາດທີ່ສາລັດໃຫ້ແກ່ເຂົາເຊັ່ນດຽວກັນ
ດ້ວຍຄວາມໄຝ່ຝັນ ແລະມີຄວາມມຸ່ງໝັ້ນຢ່າງແຮງກ້າ ແລະທຳຕາມທີ່ສິ່ງຫວັງໄວ້ ເລີຍເຮັດໃຫ້ນ້ອງວາດສະໜາ ປະສົບຜົນສຳເລັດໃນສິ່ງທີ່ຕົນເອງຕ້ອງການ ນອກຈາກນີ້ ຍ້ອນວ່າໄດ້ຮັບໂອກາດຈາກຜູ້ໃຫຍ່ໃຈດີ ນັ້ນກໍຄື ບໍລິສັດ ເອັດສຊີຈີ ນັ້ນເອງ
