ເຂດເສດຖະກິດພູຂຽວ ແຂວງຄຳມ່ວນ ມີບໍລິສັດທີ່ມາລົງທຶນ ແລະ ຈົດທະບຽນແລ້ວ 15 ບໍລິສັດ ປັດຈຸບັນ ຜູ້ພັດທະນາກຳລັງສຸມໃສ່ການກໍ່ສ້າງພື້ນຖານໂຄງລ່າງ ສິ່ງອຳນວຍຄວາມສະດວກຕ່າງໆ ໄປພ້ອມກັບການຊົດເຊີຍທີ່ດິນໃຫ້ຜູ້ໄດ້ຮັບຜົນກະທົບ ແລະ ສືບຕໍ່ຂົນຂວາຍການລົງທຶນພາຍໃນ ແລະ ຕ່າງປະເທດ ເຂົ້າມາລົງທຶນໃນເຂດດັ່ງກ່າວໃຫ້ນັບມື້ຫຼາຍຂຶ້ນ.
ທ່ານ ຈຳປາ ຄຳສຸກໃສ ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ໄດ້ລາຍງານຕໍ່ກອງປະຊຸມສະຫຼຸບຜົນງານການຈັດຕັ້ງປະຕິບັດ ວຽກງານພັດທະນາເຂດເສດຖະກິດ ປະຈຳປີ 2017 ແລະ ແຜນການປີ 2018 ເມື່ອບໍ່ດົນມານີ້ວ່າ: ເຂດເສດຖະກິດພູຂຽວ ສ້າງຕັ້ງຂຶ້ນປີ 2011 ມີເນື້ອທີ່ 4.850 ເຮັກຕາ ໂດຍສ້າງໃຫ້ເປັນເຂດການຄ້າ ການບໍລິການ ເຊິ່ງມີບໍລິສັດທີ່ມາລົງທຶນ ແລະ ຈົດທະບຽນແລ້ວ 15 ບໍລິສັດ ສະເພາະປີ 2017 ຜູ້ພັດທະນາໄດ້ສຸມໃສ່ການກໍ່ສ້າງພື້ນຖານໂຄງລ່າງ ເປັນຕົ້ນ ເສັ້ນທາງພາຍໃນລະບົບສາຍສົ່ງໄຟຟ້າ ເຂົ້າເຂດການຊົດເຊີຍທີ່ດິນໃຫ້ປະຊາຊົນທີ່ຖືກຜົນກະທົບຈາກການພັດທະນາໂຄງການ 16 ຕອນ 90 ເຮັກຕາ ພ້ອມທັງໄດ້ຊົດເຊີຍແລ້ວ 3.530 ເຮັກຕາ ໄດ້ສືບຕໍ່ຂົນຂວາຍການລົງທຶນພາຍໃນ ແລະ ຕ່າງປະເທດ ສຳເລັດການສຳຫຼວດອອກແບບເສັ້ນທາງເຂົ້າ ແລະ ອອກພາຍໃນເຂດ ສຳເລັດການສ້າງເວັບໄຊ ແລະ ແຜ່ນພັບໂຄສະນາ ເພື່ອເປັນເຄື່ອງມືໃນການດຶງດູດຂົນຂວາຍການລົງທຶນທັງພາຍໃນ ແລະ ຕ່າງປະເທດ.
ສຳລັບປີ 2018 ໄດ້ສືບຕໍ່ຂົນຂວາຍ ແລະ ດຶງດູດການລົງທຶນໃຫ້ໄດ້ 2 ບໍລິສັດ ສ້າງວຽກເຮັດງານທຳໃຫ້ໄດ້ 20 ຄົນ ປະຕິບັດພັນທະອາກອນ 5.000 ໂດລາສະຫະລັດ ຫຼື ປະມານ 40 ລ້ານກວ່າກີບ ສືບຕໍ່ແກ້ໄຂບັນຫາທີ່ດິນທີ່ມີຄວາມສັບຊ້ອນກັບບັນດາຫົວໜ່ວຍທຸລະກິດຢູ່ໃນເຂດດັ່ງກ່າວ ຊົດເຊີຍເນື້ອທີ່ດິນທີ່ຍັງບໍ່ທັນສຳເລັດ ພ້ອມສືບຕໍ່ຈັດສັນ ແລະ ແບ່ງດິນໃຫ້ປະຊາຊົນທີ່ຖືກຍົກຍ້າຍ ເລັ່ງໃສ່ພັດທະນາພື້ນຖານໂຄງລ່າງຕາມທີ່ໄດ້ກຳນົດໄວ້ໃນສັນຍາພັດທະນາໂຄງການ ໂດຍສືບຕໍ່ກໍ່ສ້າງເສັ້ນທາງດິນແດງ ແລະ ກຽມເສັ້ນທາງຕັດໃໝ່ຜ່ານເຂດໂຄງການ ຍາວ 2,08 ກິໂລແມັດ ນອກນີ້ ຈະໄດ້ສ້າງ ແລະ ພັດທະນາສະຖານີໄຟຟ້າ ນ້ຳປະປາ ລະບົບໂທລະຄົມມະນາຄົມ ແລະ ໂຄງລ່າງອື່ນໆ ເພື່ອຮອງຮັບການລົງທຶນຕື່ມອີກ.
Cr. VientianeMai
ຮູບພາບ: https://toi.boi.go.th
Hits: 51
