ສະຖານທູດສະຫະລັດອາເມລິກາ ໄດ້ ມອບເຄື່ອງມືເຕັກໂນໂລຊີ ແລະອຸປະກອນດ້ານຂໍ້ມູນຂ່າວສານໃຫ້ແກ່ບັນດາເຈົ້າໜ້າທີ່ອະວຸໂສຢູ່ທີ່ສຳນັກງານຂໍ້ມູນຕ້ານການຟອກເງິນ (ສຕຟງ) ຂອງ ສປປ ລາວ. ຊຶ່ງຕາງໜ້າຮັບໂດຍທ່ານນາງແພງສີ ແພງເມືອງ ຫົວໜ້າ ສຕຟງ ຢູ່ນະຄອນຫຼວງວຽງຈັນ. ແລະພິທີດັ່ງກ່າວຍັງມີທ່ານນາງ Ekaterina Koposhilko ຈາກອົງການສະຫະປະຊາຊາດເພື່ອບໍລິຫານໂຄງການ (UNOPS).
ທ່ານນາງຣີນາບິດເຕີ ເອກອັກຄະລັດຖະທູດສະຫະລັດອາເມລິກາປະຈຳ ສປປ ລາວ ໄດ້ກ່າວໃນພິທີວ່າ: ສປປ ລາວ ໄດ້ສ້າງຄວາມກ້າວໜ້າຫຼາຍໃນວຽກງານຕ້ານການຟອກເງິນ ຍ້ອນໄດ້ຮັບການສະໜັບສະໜູນທີ່ເຂັ້ມແຂງຈາກລັດຖະບານແລະທີມງານ ສຕຟງ ທີ່ມີຄວາມສາມາດ.
“ພວກເຮົາມີຄວາມຍິນດີທີ່ໄດ້ໃຫ້ການສະໜັບສະໜູນວຽກງານຂອງ ສຕຟງ ເຊິ່ງຈະສ້າງຄວາມຍຸ້ງຍາກຫຼາຍຂຶ້ນໃຫ້ພວກອາຊະຍາກອນທີ່ຈະເຂົ້າມາສວຍໃຊ້ຂະແໜງການເງິນຂອງ ສປປ ລາວ ເພື່ອຟອກເງິນທີ່ໄດ້ຈາກການກະທໍາຜິດກົດໝາຍ ໃນເວລາດຽວກັນຍັງຊ່ວຍສ້າງຄວາມທັນສະໄໝໃຫ້ລະບົບທະນາຄານຂອງ ສປປ ລາວ”
ອຸປະກອນຊ່ວຍເຫຼືອດັ່ງກ່າວປະກອບມີ ຄອມພິວເຕີ, ຄອມພິວເຕີພົກພາ ແລະ ເຄື່ອງພິ້ນເຕີ ແນໃສ່ຍົກລະດັບຄວາມສາມາດດ້ານໄອທີຂອງສຕຟງແລະຊ່ວຍໃຫ້ພວກເຂົາສາມາດນໍາໃຊ້ເຂົ້າໃນວຽກງານຕ້ານການຟອກເງິນແລະການສະໜອງທຶນໃຫ້ແກ່ການກໍ່ການຮ້າຍ. ອຸປະກອນເຫຼົ່ານີ້ ແມ່ນສ່ວນໜຶ່ງການສືບຕໍ່ສະໜັບສະໜູນ ແລະຮ່ວມມືຂອງສະຖານທູດສະຫະລັດອາເມລິກາ ກັບລັດຖະບານ ໃນວຽກງານຕ້ານການຟອກເງິນ ແລະການກະທໍາຜິດກົດໝາຍອື່ນໆຢູ່ສປປລາວ.