ຊາວກະສິກອນເມືອງສີໂຄດຕະບອງ ນະຄອນຫຼວງວຽງຈັນ ກໍ່ຄື ຊາວກະສິກອນໃນທົ່ວປະເທດ ກຳລັງຂຸ້ນຂ້ຽວເກັບກ່ຽວເຂົ້ານາປີ 2018 ເພື່ອໃຫ້ທັນກັບລະດູການຜະລິດ ພ້ອມທັງກະກຽມຄວາມພ້ອມດ້ານຕ່າງໆ ເຂົ້າສູ່ການຜະລິດລະດູແລ້ງ ປີ 2019 ຢ່າງເປັນຂະບວນຟົດຟື້ນ.
ທ່ານ ຄຳມະນີ ສົງວຽງໄຊ ຮອງຫົວໜ້າຫ້ອງການກະສິກຳ ແລະ ປ່າໄມ້ ເມືອງສີໂຄດຕະບອງວ່າ: ຊາວກະສິກອນທົ່ວເມືອງສີໂຄດຕະບອງ ໄດ້ເລີ່ມເກັບກ່ຽວເຂົ້ານາປີ 2018 ມາແຕ່ກາງເດືອນຕຸລາ ເປັນຕົ້ນມາ ປັດຈຸບັນສາມາດເກັບກ່ຽວໄດ້ສຳເລັດແລ້ວ 50% ແລະ ຄາດວ່າໃນທ້າຍເດືອນພະຈິກ ຈະໃຫ້ສຳເລັດ 100% ໃນເນື້ອທີ່ນາປີ ທັງໝົດ 1.400 ເຮັກຕາ ສະມັດຖະພາບໃນການຜະລິດສະເລ່ຍ 4,2-4,3 ໂຕນຕໍ່ເຮັກຕາ ໂດຍຄາດວ່າຜົນຜະລິດປີນີ້ ຈະຫຼຸດລົງກວ່າທຸກປີ ເພາະໄດ້ຮັບຄວາມເສຍຫາຍຈາກນ້ຳຖ້ວມ 54 ເຮັກຕາ ຈາກໄພນ້ຳຖ້ວມໃນໄລຍະຜ່ານມາ.
ເພື່ອກະກຽມໃສ່ການຜະລິດເຂົ້ານາແຊງໃນລະດູການຜະລິດທີ່ໃກ້ຈະມາເຖິງນີ້ ຫ້ອງການກະສິກຳ ແລະ ປ່າໄມ້ເມືອງ ໄດ້ຊີ້ນຳໃຫ້ພາກສ່ວນກ່ຽວຂ້ອງ ຮ່ວມກັບຊາວກະສິກອນ ລົງຟື້ນຟູເນື້ອທີ່ການຜະລິດທີ່ຖືກຜົນກະທົບຈາກນ້ຳຖ້ວມ ເພື່ອກະກຽມສືບຕໍ່ທຳການຜະລິດເຂົ້ານາແຊງ ພ້ອມທັງເລັ່ງຟື້ນຟູໂຄງການຈັກສູບນ້ຳ 3 ໂຄງການ ອະນາໄມຄອງເໝືອງ ກະກຽມສະໜອງນ້ຳໃຫ້ເນື້ອທີ່ການຜະລິດເຂົ້ານາແຊງ 200 ເຮັກຕາ ເພື່ອໃຫ້ຊາວກະສິກອນສາມາດທຳການຜະລິດທັນຕາມລະດູການ.
Cr.VientianeMai
ພາບປະກອບ: images.onbnews.com