ມື້ວານນີ້,ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຕ້ອນຮັບການເຂົ້າຢ້ຽມຂ່ຳນັບ ຂອງ ທ່ານນາງ ລີນາ ບິດເຕີ (Rena Bitter) ເອກອັກຄະລັດຖະທູດ ແຫ່ງ ສະຫະລັດອາເມລິກາ ປະຈຳ ສປປ ລາວ ເພື່ອປຶກສາຫາລື ກ່ຽວກັບ ການພົວພັນຮ່ວມມື ດ້ານວັດທະນະທຳຂອງ 2 ປະເທດ.
ໃນໂອກາດດັ່ງກ່າວ, ທ່ານ ບໍ່ແສງຄຳ ວົງດາລາ ໄດ້ສະແດງຄວາມຍິນດີຕ້ອນຮັບ ທ່ານ ນາງ ລີນາ ບິດເຕີ ທີ່ໄດ້ມາພົບປະ ແລະ ປຶກສາຫາລືໃນຄັ້ງນີ້, ເຊິ່ງເປັນການປະກອບສ່ວນສຳຄັນ ເຂົ້າໃນການເພີ່ມທະວີການພົວພັນຮ່ວມ ລະຫວ່າງ 2 ປະເທດ. ເວົ້າລວມ, ເວົ້າສະເພາະ ແມ່ນການພົວພັນຮ່ວມມື ລະຫວ່າງ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກັບ ສະຫະລັດອາເມລິກາ ໂດຍສະເພາະ ການພົວພັນຮ່ວມມືດ້ານວັດທະນະທຳ.
ໂອກາດນີ້, ທ່ານ ນາງ ລີນາ ບິດເຕີ ໄດ້ສະແດງຄວາມຂອບອົກຂອບໃຈ ມາຍັງ ທ່ານ ບໍ່ແສງຄຳ ວົງດາລາ ທີ່ໄດ້ສະຫລະເວລາອັນມີຄຸນຄ່າໃຫ້ການຕ້ອນຮັບອັນອົບອຸ່ນ, ພ້ອມທັງແຈ້ງໃຫ້ຊາບເຖິງຈຸດປະສົງໃນການມາເຂົ້າຢ້ຽມຂ່ຳນັບໃນຄັ້ງນີ້.
#insidelaos
Cr.KPL