ສະຖາບັນວິໄຈດາຣາສາດແຫ່ງຊາດ (ອົງການມະຫາຊົນ) (ສດຣ) ກະຊວງວິທະຍາສາດ ແລະເທັກໂນໂລຢີ ປະເທດໄທ ແຈ້ງວ່າ ຈະມີ “ຝົນດາວຕົກລີໂອນິດ” ຫຼັງທ່ຽງຄືນວັນທີ່ 17 ພະຈິກ 2018 ເວລາປະມານ 2 ໂມງກາງຄືນເປັນຕົ້ນໄປ ຈົນເຖິງຕອນເຊົ້າ ວັນທີ່ 18 ພະຈິກ 2018 ອັດຕາການຕົກສູງສຸດ ສະເລ່ຍ 10-15 ດວງ ຕໍ່ຊົ່ວໂມງ ຊ່ວງເວລາດັ່ງກ່າວນີ້, ຈະປາສະຈາກແສງເດືອນລົບກວນ ເຫມາະທີ່ຈະສັງເກດການເປັນຢ່າງຍິ່ງ ເບິ່ງໄດ້ດ້ວຍຕາເປົ່າ ທາງທິດຕາເວັນອອກສ່ຽງເຫນືອ ບໍລິເວນກຸ່ມດາວລາຊະສີ.
ແນະນຳໃຫ້ເບິ່ງໃນບ່ອນມືດສະຫນິດ ຈະເຫັນຊັດແຈ້ງຫລາຍຂຶ້ນ.
ຝົນດາວຕົກລີໂອນິດ (Leonids meteor shower) ເກີດຈາກສານທານຂອງເສດຝຸ່ນດາວຫອງ 55 ພີ ເທມ ເພລ-ທັດເທິນ (55P Tempel-Tuttle) ທີ່ຍັງຫລົງເຫລືອຢູ່ໃນວົງໂຄຈອນຂອງດາວຫາງ ຕັດຜ່ານວົງໂຄຈອນຂອງໂລກ ເຮັດໃຫ້ເສດຝຸ່ນຂອງດາວຫາງເຫຼົ່ານັ້ນ, ທີ່ສຽດສີກັບບັນຍາກາດໂລກ ເກີດການເຜົາໄຫມ້ ຈົນເຫັນເປັນແສງສະຫວ່າງ, ວູບວາບ ຄືກັບລູກໄຟແລ່ນຜ່ານທ້ອງຟ້າ ທິດທາງວົງໂຄຈອນຂອງຝົນດາວຕົກລີໂອນິດ ຈະສວນທາງກັບທິດທາງວົງໂຄຈອນຂອງໂລກອ້ອມດວງອາທິດ ເຮັດໃຫ້ຄວາມໄວຂອງເມັດຝຸ່ນ ທີ່ເຂົ້າມາສຽດສີກັບບັນຍາກາດໂລກ ມີຄວາມໄວຂ້ອນຂ້າງຫລາຍ ມີຄວາມໄວສູງເຖິງ 71 ກິໂລແມັດຕໍ່ວິນາທີ ຝົນດາວຕົກລີໂອນິດ ເປັນຝົນດາວຕົກ ທີ່ມີຄວາມສະຫວ່າງຫລາຍທີ່ສຸດ ຈຶ່ງໄດ້ຮັບການຂະຫນານນາມວ່າ#ລາຊາແຫ່ງຝົນດາວຕົກ.
ປົກກະຕິແລ້ວ ຝົນດາວຕົກ ລີໂອນິດຈະເຫັນຫຼາຍສຸດໃນທຸກ 33 ປີ ໂດຍມີຈຳນວນດາວຕົກຫຼາຍກວ່າ 1.000 ດວງຕໍ່ນາທີ ເຊິ່ງຄັ້ງລ່າສຸດແມ່ນປີ 2001
ເຖິງວ່າປີນີ້ ຈະມີຝົນດາວຕົກໜ້ອຍພຽງແຕ່ 10-15 ດວງ ຕໍ່ຊົ່ວໂມງ ແຕ່ກໍນັບວ່າຫຼາຍກວ່າທຸກຄືນ ຍິ່ງທ້ອງຟ້າແຈ່ມໃສ ອາກາດເຢັນສະບາຍ ຍາມນັ້ນ ນັບໄດ້ວ່າເປັນປະສົບການທີ່ດີຫຼາຍອີກຄັ້ງໜຶ່ງເລີຍທີດຽວ.