ເມື່ອບໍ່ດົນມານີ້, ເມືອງຫົງສາ ແຂວງໄຊຍະບູລີ ຈັດກອງປະຊຸມເຜີຍແຜ່ນິຕິກຳກ່ຽວກັບ ວຽກງານການຄຸ້ມຄອງ, ການນຳໃຊ້, ການອານຸລັກປົກປັກຮັກສາ, ພື້ນທີ່ດິນຮ່ອງຮອຍປະຫວັດສາດຄູວຽງ ທີ່ຕິດພັນກັບປະຫວັດສາດ ຂອງເມືອງຫົງສາ ໂດຍການ ເຜີຍແຜ່ຂອງ ທ່ານ ຄຳເພັດ ພົມມະລາດ ເຈົ້າເມືອງຫົງສາ ເພື່ອໃຫ້ໃຫ້ພາກສ່ວນກ່ຽວຂ້ອງພາຍໃນເມືອງ ມີຄວາມຮັບຮູ້ ແລະ ເຂົ້າໃຈ ຕໍ່ນິຕິກຳດັ່ງກ່າວ ແລະ ນຳໄປຈັດຕັ້ງຜັນຂະຫຍາຍໃນຕໍ່ໜ້າ.
ໃນກອງປະຊຸມຜູ້ເຂົ້າຮ່ວມ ໄດ້ຮັບຟັງກົດໝາຍວ່າດ້ວຍມໍລະດົກແຫ່ງຊາດ(ສະບັບປັບປຸງ) ເລກທີ 44/ສພຊ,ລົງວັນທີ 24 ທັນວາ 2013 (ບາງໝວດ, ບາງມາດຕາ), ຮັບຟັງກົດລະບຽບ ຂອງເຈົ້າເມືອງຫົງສາເລກທີ 08/ຈມ.ຫສ, ລົງວັນທີ 21/8/2014 ວ່າດ້ວຍການຄຸ້ມຄອງ, ການນຳໃຊ້, ການອານຸລັກປົກປັກຮັກສາ, ພື້ນທີ່ດິນຮ່ອງຮອຍປະຫວັດສາດຄູວຽງ,ຮັບຟັງການສະເໜີຜ່ານແຜນຜັງຂອບເຂດພື້ນທີ່ດິນຮ່ອງຄູວຽງ ຈາກຫ້ອງການໂຍທາທິການ ແລະ ຂົນສົ່ງເມືອງ, ຮັບຟັງການຊີ້ແຈງກ່ຽວກັບຄຸ້ມຄອງ, ການອອກໃບທີ່ດິນຂອບເຂດຕິດກັບຮ່ອງຄູວຽງ ຈາກຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງ ຕື່ມອີກ.