ໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ່ VIII ໃນທ້າຍອາທິດຜ່ານມາ, ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງຕ່າງໆ ໄດ້ສະເໜີໃຫ້ລັດ ຖະບານ ເລັ່ງແກ້ໄຂບັນຫາຄູອາສາສະໝັກ, ຄູເຫລືອບໍ່ພໍ ເຊິ່ງບັນຫາດັ່ງກ່າວ, ແມ່ນມີຢູ່ທຸກຊັ້ນຮຽນ, ທຸກທ້ອງຖິ່ນ ແລະ ມີຢູ່ໃນເຂດຕົວເມືອງ ເປັນສ່ວນຫລາຍ, ສາເຫດຫລັກ ທີ່ເຮັດໃຫ້ມີຄູເຫລືອບໍ່ພໍ ແມ່ນຍ້ອນ ແຜນຄວາມຕ້ອງການ, ແຜນກໍ່ສ້າງຄູ ແລະ ແຜນບັນຈຸ ບໍ່ສອດຄ່ອງກັນ.
ຂະແໜງສຶກສາທິການ ແລະ ກິລາ ຍັງມີຫລາຍຄາດໝາຍ ທີ່ຍັງບໍ່ບັນລຸຕາມຈຸດປະສົງ, ຊຶ່ງເປັນສິ່ງທ້າທາຍ ທີ່ຈະຕ້ອງໄດ້ສຸມໃສ່ປັບປຸງແກ້ໄຂ ເປັນຕົ້ນ ອັດຕາຄ້າງຫ້ອງ, ອັດຕາປະລະ ຂອງນັກຮຽນຊັ້ນປະຖົມ, ມັດທະຍົມຕອນຕົ້ນ, ຕອນປາຍ ຍັງສູງ, ຄຸນນະພາບການຮຽນ-ການສອນ ຍັງບໍ່ທັນໄດ້ຮັບການປັບປຸງເທົ່າທີ່ຄວນ, ການແກ້ໄຂບັນຫາ ຄູອາສາສະໝັກ, ຄູເຫລືອບໍ່ພໍ ຍັງມີຈຳນວນຫລວງຫລາຍ, ຫ້ອງຮຽນ, ຫໍພັກຄູ, ນັກຮຽນກິນນອນຊົນເຜົ່າ ເຂດຫ່າງໄກສອກຫລີກ, ເຂດຊາຍແດນ ຍັງມີໜ້ອຍ ແລະ ອື່ນໆ.
#insidelaos
#ອິນໄຊລາວ
Cr.KPL