ລັດຖະບານກຳລັງໄດ້ເລັ່ງປັບປຸງການຈັດຕັ້ງປະຕິບັດ ວຽກງານການເກັບລາຍຮັບເຂົ້າງົບປະມານ ດ້ວຍການຫັນເປັນການຊຳລະຜ່ານລະບົບທັນສະໄໝ ຫຼື ການຊຳລະ ແລະ ບໍລິການຜ່ານລະບົບທະນາຄານ ເຊິ່ງເຮັດໃຫ້ການຮົ່ວໄຫຼດ້ານລາຍຮັບ-ລາຍຈ່າຍງົບປະມານ ກໍ່ຄື ການລະເມີດວິໄນດ້ານການເງິນ ມີທ່ວງທ່າທີ່ຫຼຸດລົງຢ່າງຊັດເຈນ ຕາມການຕີລາຄາຂອງຂະແໜງການເງິນໃນໄລຍະຜ່ານມາ ການເກັບລາຍຮັບຈະບໍ່ສາມາດບັນລຸຕາມແຜນການປະມານ 4-5% ແຕ່ລັດຖະບານກໍ່ຕັດສິນໃຈສູ້ຊົນ ແລະ ມີມາດຕະການຊຸກຍູ້ດ້ວຍຫຼາຍວິທີ ເຮັດໃຫ້ລາຍຮັບໝົດປີ 2018 ຈະສາມາດບັນລຸໄດ້ 25.496,15 ຕື້ກີບ ຫຼື ເທົ່າກັບ 100,17% ຂອງແຜນການທີ່ສະພາແຫ່ງຊາດຮັບຮອງ ຂະນະທີ່ລາຍຈ່າຍງົບປະມານຄາດວ່າໝົດປີຈະຢູ່ໃນລະດັບ 32.692,74 ຕື້ກີບ ເທົ່າກັບ 99,64% ຂອງແຜນການປີ ເຊິ່ງ 9 ເດືອນ ປີ 2018 ອັດຕາເງິນເຟີ້ສະເລ່ຍເທົ່າກັບ 2,08% (ມະຕິສະພາຮັບຮອງແມ່ນ 5%) ສູງກວ່າປີ 2017 (1,09%).
ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII ທ້າຍອາທິດຜ່ານາວ່າ: ລັດຖະບານໄດ້ເອົາໃຈໃສ່ຈັດຕັ້ງປະຕິບັດ ບັນດາມາດຕະການຕົ້ນຕໍດ້ານເສດຖະກິດ ທີ່ລັດຖະບານສະເໜີຕໍ່ສະພາແຫ່ງຊາດ ໃນເດືອນມິຖຸນາ 2018 ເປັນຕົ້ນ 8 ມາດຕະການໃນການຊຸກຍູ້ເສດຖະກິດ ເພື່ອສົ່ງເສີມການຜະລິດ ແລະ ບໍລິການພາຍໃນ-ຕ່າງປະເທດ ການຂາດດຸນດ້ານການຄ້າ ຖານລາຍຮັບບໍ່ແນ່ນອນ ເຮັດໃຫ້ອັດຕາການຂະຫຍາຍຕົວຂອງເສດຖະກິດຢູ່ໃນລະດັບ 6,5% (ຫຼຸດຄາດໝາຍທີ່ສະພາຮັບຮອງ 0,5%) ສະເລ່ຍລາຍຮັບຕໍ່ຫົວຄົນໝົດປີໄດ້ 2.209 ໂດລາສະຫະລັດ ລື່ນແຜ່ນການທີ່ສະພາຮັບຮອງ (2.004 ໂດລາສະຫະລັດ) ຄຽງຄູ່ກັນນີ້ປີ 2018 ການລົງທຶນຂອງລັດສາມາດປະຕິບັດໄດ້ 3.281 ໂຄງການ ມູນຄ່າ 2.378,2 ຕື້ກີບ ເທົ່າກັບ 51,7% ຂອງແຜນການ.
Cr.Vientianemai
#insidelaos
#ອິນໄຊລາວ
Hits: 5
