Wednesday, April 23, 2025

ລັດຖະບານຢືນຢັນວ່າ ຈະບໍ່ມີການກູ້ຢືມເງິນຈາກຕ່າງປະເທດ ເພື່ອມາໃຊ້ຈ່າຍບໍລິຫານພາຍໃນຢ່າງເດັດຂາດ

ລັດຖະບານຢືນຢັນວ່າຈະບໍ່ມີການກູ້ຢືມເງິນຈາກຕ່າງປະເທດ ເພື່ອມາໃຊ້ຈ່າຍບໍລິຫານພາຍໃນຢ່າງເດັດຂາດໃນຕໍ່ໜ້າ ເພື່ອຫຼຸດຜ່ອນພາລະໜີ້ສິນຂອງລັດຖະບານໃນໄລຍະຍາວ.

ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ຊີ້ແຈງຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ວ່າ: ກະຊວງການເງິນໄດ້ມີການຄົ້ນຄວ້າປັບໂຄງສ້າງແຜນງົບປະມານແຫ່ງລັດຄືນໃໝ່ເພື່ອຮັບປະກັນໃຫ້ມີຄວາມໝັ້ນໃຈຫຼາຍຂຶ້ນໃນຕໍ່ໜ້າ ໂດຍເນັ້ນໃສ່ຄວາມອາດສາມາດທາງດ້ານລາຍຮັບ, ຕັດຊ່ອງການຮົ່ວໄຫຼ ແລະ ການສະໜອງທຶນເປັນບັນຫາສຳຄັນຕົ້ນຕໍ ເພື່ອກຳນົດຂອບເພດານລາຍຈ່າຍບໍ່ໃຫ້ສູງເກີນໄປ ແລະ ຮັກສາອັດຕາການຂາດດຸນປະມານໃນລະດັບທີ່ຄຸ້ມຄອງໄດ້ ແລະ ມີທ່າອ່ຽງຫຼຸດລົງໃນແຕ່ລະປີ ເຊັ່ນ: ໃນສົກປີ 2015 – 2016 ການຂາດດຸນງົບປະມານຢູ່ທີ່ 7,6% ຂອງ GDP, ປີ 2017 ຢູ່ທີ່ 5,49%, ຄາດປີ 2018 ຈະຢູ່ທີ່ 4,72% ແລະ ປີ 2019 ຈະໃຫ້ຫຼຸດລົງມາຢູ່ທີ່ 4,28% ຂອງ GDP.

ທ່ານຮອງນາຍົກລັດຖະມົນຕີ ຍອມຮັບວ່າ: ກະຊວງການເງິນ ຈະຕັດຮອນແຜນງົບປະມານລາຍຈ່າຍຂອງລັດຖະບານທີ່ເຫັນວ່າສູງກວ່າລາຍຮັບໃນແຕ່ລະປີລົງເພື່ອບໍ່ໃຫ້ມີການຂາດດຸນດ້ານງົບປະມານຫຼາຍຈົນເກີນໄປ ເພາະຈະກະທົບຕໍ່ໜີ້ສິນຂອງລັດໃນໄລຍະຍາວ. ແນວໃດກໍ່ຕາມ ລັດຖະບານຈະບໍ່ກູ້ຢືມເງິນຈາກຕ່າງປະເທດມາໃຊ້ຈ່າຍເຂົ້າໃນວຽກງານບໍລິຫານພາຍໃນຢ່າງເດັດຂາດ ແຕ່ບໍ່ປະຕິເສດທີ່ຈະອອກພັນທະບັດໃຫ້ຕ່າງປະເທດ ຫຼື ກູ້ຢືມເງິນຈາກຕ່າງປະເທດດອກເບ້ຍທີ່ບໍ່ສູງເກີນໄປ ແລະ ເວລາໃນການຊຳລະທີ່ຍາວນານມາໃຊ້ຈ່າຍໜີ້ເກົ່າທີ່ມີກຳນົດໃຊ້ ເພື່ອບໍ່ໃຫ້ອັດຕາດອກເບ້ຍເພີ່ມຂຶ້ນຕາມລະບົບສັນຍາກຳນົດໄວ້, ສ່ວນລາຍຈ່າຍພາຍໃນແມ່ນຈະບໍລິຫານກັນເອງ ຄື: ລາຍຮັບຈາກພາສີ, ອາກອນຕ່າງໆຂອງລັດຖະບານ ແມ່ນຈະນຳເຂົ້າໄປໃຊ້ໃນການໃຊ້ຈ່າຍພາຍໃນທັງໝົດ ໂດຍບໍ່ມີການແຕະຕ້ອງໃນຮ່ວງຂອງເງິນສ່ວນອື່ນ.

ລັດຖະບານມີຄວາມໜັກໃຈພໍສົມຄວນໃນການຮັດກຸມເລື່ອງໃຊ້ຈ່າຍໃຫ້ຮັດແຄບລົງ ເຊັ່ນ: ໄດ້ມີການຫຼຸດໂກຕາລັດຖະກອນລົງ ຂະແໜງທີ່ມີສັນຍາຈ້າງຈຳນວນຫຼາຍຈະໜີບໍ່ມົ້ມຂະແໜງສຶກສາທິການ ແລະ ກີລາ ແລະ ຂະແໜງສາທາລະນະສຸກ ບາງຄົນເຮັດວຽກມາຫຼາຍປີບໍ່ທັນມີໂກຕາເຂົ້າລັດ ໄດ້ມີການຮຽກຮ້ອງຈົ່ມວ່າຫຼາຍສົມຄວນ ແຕ່ກໍ່ຕ້ອງເຄົາລົບໃນການຕັດສິນໃຈຄັ້ງນີ້ ເພື່ອບໍ່ໃຫ້ກະທົບໜີ້ສິນໄລຍະຍາວຂອງລັດຖະບານທີ່ກຳລັງຊອກຫາທາງອອກມາແຕ່ດົນ.

ອີງຕາມບົດສະຫຼຸບຂາດຕົວຂອງແຜນງົບປະມານແຫ່ງລັດ ປະຈຳປີ 2017 ລັດຖະບານມີລາຍຮັບຕົວຈິງຢູ່ທີ່ຕົວເລກ 23 ພັນຕື້ກີບ, ລາຍຈ່າຍ 31 ພັນຕື້ກີບ, ຂາດດຸນງົບປະມານຕົວຈິງເກືອບ 8 ພັນຕື້ກີບ, ດຸນງົບປະມານຕົວຈິງເກືອບ 14 ພັນຕື້ກີບ. ໃນນັ້ນ, ທົດແທນເງິນກູ້ ແລະ ພັນທະບັດຕ່າງປະເທດ ຈຳນວນເກືອບ 3 ພັນຕື້ກີບ, ທົດແທນພັນທະບັດລະດົມທຶນ ແລະ ພັນທະບັດລົງທຶນເກືອບ 3 ພັນຕື້ກີບ ແລະ ຍັງເຫຼືອເງິນດຸນດ່ຽງຕົວຈິງປະມານ 8 ພັນຕື້ກວ່າກີບ.

#insidelaos

Cr.KPL

InsideLaos
InsideLaoshttp://insidelaos.com
Online Journalists at insidelaos.com.

More from author

Related posts

Latest posts

ໂປຣໂມຊັນຈຳກັດເວລາ: VietJet ມອບສ່ວນຫຼຸດ 50% ປີ້ຍົນທົ່ວທຸກເສັ້ນທາງ

(ນະຄອນຫຼວງວຽງຈັນ, ວັນທີ 18 ເມສາ 2025) – ເພື່ອສະເຫຼີມສະຫຼອງວັນການຕ້ອນໂຮມປະເທດຊາດຫວຽດນາມ, VietJet ມອບສ່ວນຫຼຸດ ໃຫ້ນັກທ່ອງທ່ຽວເຖິງ 50% (ບໍ່ລວມພາສີ ແລະ ຄ່າທຳນຽມ) ໃນຄ່າໂດຍສານຊັ້ນ Eco-class ໃນທົ່ວເຄືອຂ່າຍຖ້ຽວບິນ ຕັ້ງແຕ່ມື້ນີ້ຈົນຮອດວັນທີ 18 ເມສາ 2025. ນັກທ່ອງທ່ຽວສາມາດເພີດເພີນກັບຂໍ້ສະເໜີນີ້ໄດ້ໂດຍການໃຊ້ລະຫັດໂປຣໂມຊັນ VJ50 ເມື່ອຈອງຜ່ານທາງ www.vietjetair.com ເຊິ່ງເລີ່ມເດີນທາງຕັ້ງແຕ່ວັນທີ 28 ເມສາ ເຖິງ 30 ພະຈິກ 2025 (ບໍ່ລວມວັນພັກລັດຖະການ).

ບົດສວດ ອັງເຊີນພຣະພຸດທະຮູບໃນເຮືອນລົງສົງນໍ້າ ໃນມື້ປີໃໝ່ລາວ

ໃນວັນບຸນປີໃໝ່ລາວນີ້ ກ່ອນທີ່ຈະໄປສົງນໍ້າພຣະຢູ່ທີ່ວັດ ແຕ່ເຮົາກໍ​ຍັງມີ​ກິດຈະກຳ​ສຳຄັນ​ນັ້ນ​ຄື​ການສົງນໍ້າພຣະຢູ່ໃນເຮືອນ ເພື່ອ​ກຽມ​ສົງ​ນ້ຳ​ພຣະ​ເສີມສິລິມຸງຄຸນ​ຕ້ອນ​ຮັບ​ວັນປີໃໝ່ລາວ, ຫາກ​ໃຜ​ຍັງ​ບໍ່​ຮູ້​ວ່າ​ຈະ​ຕ້ອງ​ເຮັດແນວໃດ ກຽມ​ສົງ​ນ້ຳ​ພະວັນປີໃໝ່ລາວ​ນັ້ນ​ມີ​ຫຍັງແດ່ ອິນໄຊລາວ ໄດ້ລວບລວມ​ມາ​ໃຫ້​ແລ້ວ.

5 ໂຣກຮ້າຍຕ້ອງລະວັງ ໃນຊ່ວງບຸນປີໃໝ່ລາວ.

ບຸນປີໃໝ່ລາວ ແມ່ນອີກບຸນໜຶ່ງທີ່ມ່ວນຊື່ນທີ່ທຸກຄົນຈະໄປສົງພຣະ ຫຼິ້ນນໍ້າ ແຕ່ມັນກໍເຕັມໄປດ້ວຍພະຍາດຮ້າຍແຮງຕ່າງໆທີ່ອາດຈະເກີດຂຶ້ນໃນຊ່ວງນັ້ນ ເພາະວ່າເປັນລະດູຝົນອາກາດຈະຮ້ອນ ແລະ ຈຳນວນເຊື້ອພະຍາດສາມາດເພີ່ມຂຶ້ນໄດ້ງ່າຍ ພ້ອມທັງຄວາມຊຸ່ມຊື່ນຈາກກິດຈະກຳຫຼິ້ນນໍ້າໃນບຸນປີໃໝ່ລາວ, ເຊິ່ງເຮົາໄດ້ລວມເອົາ 5 ໂຣກທີ່ເຈົ້າຕ້ອງລະວັງມາໃຫ້ເບິ່ງນໍາກັນ.