ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ໄດ້ລາຍງານໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII ໃນບໍ່ດົນມານີ້ວ່າ:
ເພື່ອເປັນການຊຸກຍູ້ສົ່ງເສີມການທ່ອງທ່ຽວໃຫ້ດີຂຶ້ນ ໂດຍສະເພາະການຊຸກຍູ້ໃຫ້ນັກທ່ອງທ່ຽວຈີນ ໃຫ້ເຂົ້າມາທ່ຽວຊົມປະເທດລາວຫຼາຍຂຶ້ນ ປີ 2019 ລັດຖະບານລາວ ກໍ່ຄືກະຊວງ ຖວທ ໄດ້ມີແຜນຈັດໂຄງການປີທ່ອງທ່ຽວ ລາວ-ຈີນ ໂດຍໄດ້ມີການປະສານສົມທົບກັບຝ່າຍຈີນ ແລະ ຈະສ້າງກິດຈະກຳຕ່າງໆ ເພື່ອໂຄສະນາໃຫ້ນັກທ່ອງທ່ຽວຈີນເຂົ້າມາປະເທດລາວ ໃນນີ້ ກໍ່ຈະມີທັງການຄຸ້ມຄອງຮ້ານອາຫານກິນດື່ມ ແລະ ໂຮງແຮມຕ່າງໆໃຫ້ໄດ້ມາດຕະຖານ ເພື່ອຮອງຮັບນັກທ່ອງທ່ຽວ ພ້ອມນີ້ ໄດ້ສົມທົບກັບພະແນກ ຖວທ ທົ່ວປະເທດ ໃນການຊຸກຍູ້ບັນດາຮ້ານອາຫານ ແລະ ໂຮງແຮມ ເພື່ອກະກຽມຄວາມພ້ອມໃນການຮອງຮັບນັກທ່ອງທ່ຽວ ທີ່ຈະມາທ່ອງລາວຫຼາຍຂຶ້ນ.
ສຳລັບຂັ້ນຕອນ ແລະ ວິທີການເກັບພາສີອາກອນກ່ຽວກັບກອງທຶນການທ່ອງທ່ຽວ ກະຊວງ ຖວທ ໄດ້ສົມທົບກັບກະຊວງການເງິນ ໂດຍຜ່ານມາໄດ້ມີການຕົກລົງໃຫ້ພາສີອາກອນເປັນຜູ້ເກັບ ແມ່ນບໍ່ທັນມີປະສິດທິຜົນເທົ່າທີ່ຄວນ ສະນັ້ນ ສອງກະຊວງໄດ້ມີການພິຈາລະນາກັນຄືນໃໝ່ ແລະ ໃນປີ 2019 ຄາດວ່າຈະມີການຫັນເກັບພາສີອາກອນຢູ່ດ່ານດ້ວຍລະບົບເຕັກໂນໂລຊີທີ່ທັນສະໄໝ ແລະ ເກັບຕາມໂຮງແຮມຕ່າງໆ ເພື່ອແນໃສ່ເຮັດໃຫ້ການເກັບລາຍຮັບເຂົ້າງົບປະມານບັນລຸຕາມແຜນ ແລະ ການເກັບກຳສະຖິຕິນັກທ່ອງທ່ຽວເຂົ້າມາທ່ຽວລາວ ມີຄວາມສະດວກວ່ອງໄວ ແລະ ມີປະສິດທິຜົນ.
ຮຼບປະກອບ: https://marketeeronline.co , https://www.bangkokbanksme.com/
Cr.Vientianemai
