ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII ຫວ່າງບໍ່ດົນມານີ້ ຢູ່ສະພາແຫ່ງຊາດ (ຫຼັກ 6) ໂດຍເປັນປະທານຂອງທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ມີບັນດາລັດຖະມົນຕີ ແລະ ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງຕ່າງໆເຂົ້າຮ່ວມ.
ທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຊີ້ແຈງຕໍ່ຂໍ້ຊັກຖາມທີ່ບັນດາ ສສຊ ໄດ້ຍົກຂຶ້ນໃນກອງປະຊຸມ ໂດຍສະເພາະການຄຸ້ມຄອງລາຄານ້ຳມັນເຊື້ອໄຟ ແລະ ການປັບປຸງໂຄງສ້າງລາຄານ້ຳມັນເຊື້ອໄຟ ຕາມມະຕິສະພາ ເຊິ່ງແຕ່ຕົ້ນປີ 2018 ເປັນຕົ້ນມາ ລາຄານ້ຳມັນເຊື້ອໄຟໃນຕະຫຼາດໂລກເວົ້າລວມ ເວົ້າສະເພາະ ລາຄານ້ຳມັນສຳເລັດຮູບຕະຫຼາດສິງກະໂປມີການເໜັງຕີງສູງຂຶ້ນ ນອກນີ້ ຍັງໄດ້ເພີ່ມອາກອນຊົມໃຊ້ຕໍ່ກັບສະພາບການດັ່ງກ່າວ ເພື່ອເຮັດໃຫ້ລາຄານ້ຳມັນເຊື້ອໄຟພາຍໃນບໍ່ສູງເກີນໄປ ລັດຖະບານໄດ້ໃຊ້ມາດຕະການດັດສົມຄື: ໄດ້ປັບຄັງແຮຈາກ 500 ກີບຕໍ່ລິດ ມາເປັນ 300 ກີບຕໍ່ລິດ ແລະ ຫຼຸດມາເປັນ 100 ກີບຕໍ່ລິດ (ນ້ຳມັນແອັດຊັງພິເສດ) 50 ກີບຕໍ່ລິດ (ນ້ຳມັນແອັດຊັງທຳມະດາ ແລະ ນ້ຳມັນກາຊວນ) ຫຼື ໄດ້ຫຼຸດຄັງແຮລົງ 400-450 ກີບຕໍ່ລິດ ຄ່າກວດນັບບໍລິມາດນ້ຳມັນເຊື້ອໄຟໄດ້ປັບຈາກ 22 ກີບຕໍ່ລິດ ມາເປັນ 12 ກີບຕໍ່ລິດ ສະເພາະນ້ຳມັນແອັດຊັງພິເສດ 10 ກີບຕໍ່ລິດ ສະເພາະນ້ຳມັນແອັດຊັງທຳມະດາ ແລະ ນ້ຳມັນກາຊວນ ປັດຈຸບັນເກັບ 6 ກີບຕໍ່ລິດ ນ້ຳມັນເຊື້ອໄຟທຸກຊະນິດ ຫຼື ຫຼຸດລົງ 16 ກີບຕໍ່ລິດ ສ່ວນຄ່າກວດຄຸນະພາບນ້ຳມັນເຊື້ອໄຟຈາກ 32 ກີບຕໍ່ລິດ ມາເປັນ 16 ກີບຕໍ່ລິດ ມາຮອດເດືອນພະຈິກ 2018 ລາຄານ້ຳມັນເຊື້ອໄຟໃນຕະຫຼາດໂລກເວົ້າລວມ ເວົ້າສະເພາະ ລາຄານ້ຳມັນສຳເລັດຮູບຕະຫຼາດສິງກະໂປມີການເໜັງຕີງຫຼຸດລົງ ດັ່ງນັ້ນ ວັນທີ 9 ພະຈິກ ແລະ ວັນທີ 26 ພະຈິກ 2018 ໄດ້ປັບລາຄານ້ຳມັນເຊື້ອໄຟລົງ ນອກນີ້ຍັງໄດ້ເພີ່ມຄັງແຮນ້ຳມັນເຊື້ອໄຟແຕ່ລະຊະນິດຂຶ້ນຕື່ມ 20 ກີບຕໍ່ລິດ ເຮັດໃຫ້ຕົ້ນປີ 2018 ຮອດປັດຈຸບັນ ໄດ້ປັບລາຄານ້ຳມັນເຊື້ອໄຟລົງແລ້ວ 4 ຄັ້ງ ປັບຂຶ້ນ 9 ຄັ້ງ.
ປັດຈຸບັນມີບໍລິສັດນຳເຂົ້າ ແລະ ບໍລິການຂາຍຍົກນ້ຳມັນເຊື້ອໄຟມີ 26 ບໍລິສັດ ບໍລິສັດ ນ້ຳມັນເຊື້ອໄຟຊີວະພາບ 2 ບໍລິສັດ ປ້ຳນ້ຳມັນເຊື້ອໄຟ 1.991 ປ້ຳ ແລະ ສະເໜີສ້າງຕັ້ງເປັນບໍລິສັດນຳເຂົ້າ ແລະ ສົ່ງອອກນ້ຳມັນເຊື້ອໄຟໃໝ່ 2 ບໍລິສັດ ເພື່ອເຮັດໃຫ້ດຳລັດວ່າດ້ວຍທຸລະກິດນ້ຳມັນເຊື້ອໄຟ ໄດ້ຮັບການຈັດຕັ້ງປະຕິບັດ ຕ້ອງໄດ້ດັດສົມບໍລິສັດທີ່ມີຢູ່ໃຫ້ຖືກຕ້ອງ ແລະ ສອດຄ່ອງຕາມມາດຖານເງື່ອນໄຂໃໝ່ ບໍລິສັດກໍ່ຕ້ອງປັບປຸງພື້ນຖານໂຄງລ່າງຂອງຕົນຄືນໃໝ່ ພາຍໃນກຳນົດເວລາ 1 ປີ ເຊິ່ງຜູ້ປະກອບການທຸລະກິດນ້ຳມັນເຊື້ອໄຟ ແມ່ນມີຄວາມຕື່ນຕົວ ພ້ອມຈະປັບປຸງຕົນເອງໃຫ້ໄດ້ຕາມເງື່ອນໄຂຂອງດຳລັດ ສະແດງອອກບາງບໍລິສັດໄດ້ປັບປຸງຕົນເອງສຳເລັດ ແລະ ໄດ້ຮັບໃບຢັ້ງຢືນການເຄື່ອນໄຫວທຸລະກິດ ບາງບໍລິສັດແມ່ນຢູ່ຂັ້ນຕອນການປະເມີນມູນຄ່າຊັບສິນ ບາງບໍລິສັດແມ່ນຢູ່ໃນຂັ້ນຕອນແຈ້ງຊັບສິນໃຫ້ບໍລິສັດປະເມີນມູນຄ່າຊັບສິນ.
Cr.Vientianemai
ຮູບປະກອບ: https://imglp.com/
Hits: 5
