15 ປີຜ່ານມາ ກອງທຶນລຶບລ້າງຄວາມທຸກຍາກ (ທລຍ) ໄດ້ມີຜົນສຳເລັດຫລາຍດ້ານ ໃນການຈັດຕັ້ງປະຕິບັດ ວຽກງານແກ້ໄຂຄວາມທຸກຍາກ ໃຫ້ປະຊາຊົນ ເປັນຕົ້ນ ແມ່ນອົງການຈັດຕັ້ງ, ອຳນາດການປົກຄອງ ແລະ ປະຊາຊົນ ຢູ່ໃນເຂດຊົນນະບົດ ຫ່າງໄກສອກຫລີກ ຂອງ 43ເມືອງທຸກຍາກ ໃນ 10 ແຂວງ ຂອງລາວ ເຊິ່ງຜູ້ໄດ້ຮັບຜົນປະໂຫຍດ ກວມເອົາ 1,2 ລ້ານກວ່າຄົນ ມີຊີວິການເປັນຢູ່ທີ່ດີຂຶ້ນ.
ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ ແລະ ປະທານສະພາບໍລິຫານ ທລຍ ໄດ້ໃຫ້ສຳພາດຕໍ່ນັກຂ່າວ ໃນໂອກາດການສ້າງຕັ້ງ ກອງທຶນລຶບລ້າງຄວາມທຸກຍາກ ຄົບຮອບ 15 ປີ (31/5/2003-31/5/2018) ວ່າ: ນັບແຕ່ສ້າງຕັ້ງ ທລຍ ຂຶ້ນມາເຫັນວ່າມີປະສິດທິຜົນ ເຊິ່ງສະແດງອອກໃນການນຳໃຊ້ເງິນທຶນ ແມ່ນມີເປົ້າໝາຍ ແລະ ໄດ້ນຳເອົາຜົນປະໂຫຍດ ໄປໃຫ້ປະຊາຊົນ ເຂດຊົນນະບົດ ຢ່າງແທ້ຈິງ. ຍ້ອນມີແບບແຜນ ໃນການເຮັດວຽກຢ່າງເປັນລະບົບ ເຊິ່ງພະນັກງານ ທລຍ ໄດ້ລົງໄປພົບກັບ ປະຊາຊົນທີ່ຢູ່ໃນບ້ານທຸກຍາກ ແລະ ສຳຫລວດ ສາເຫດທີ່ພາໃຫ້ມີຄວາມທຸກຍາກ ຂອງປະຊາຊົນ, ຈາກນັ້ນ, ກໍໄດ້ມີການພົບປະກັບ ອຳນາດການປົກຄອງຂັ້ນບ້ານ ເພື່ອປຶກສາຫາລືຂັ້ຂຕອນຕ່າງໆ ໃນການແກ້ໄຂຄວາມທຸກຍາກໃຫ້ປະຊາຊົນ ເພື່ອສະໜອງສິ່ງທີ່ປະຊາຊົນ ຕ້ອງການໃນການທຳມາຫາກິນ ແລະ ດຳລົງຊີວິດ ເປັນຕົ້ນ ແມ່ນການສະໜອງຊົນລະປະທານ ເພື່ອປະກອບໃນການເຮັດນາ, ກໍ່ສ້າງສ້ອມແປງເສັ້ນທາງ, ຂົວໄປຫາບ້ານ ແລະ ໄປຫາເຂດທຳການຜະລິດ, ການກໍ່ສ້າງສ້ອມແປງໂຮງຮຽນ,ສຸກສາລາ, ຖົງຢາປະຈຳບ້ານ, ການກໍ່ສ້າງສ້ອມແປງ ລະບົບນ້ຳສະອາດ ແລະ ການຕັ້ງກຸ່ມຊ່ວຍເຫລືອ ເຊິ່ງກັນ ແລະ ກັນ. ທລຍ ໄດ້ປະຕິບັດວຽກງານ ຕາມການມອບໝາຍ ຂອງລັດຖະບານ ໂດຍສຸມໃສ່ການພັດທະນາ ຊົນນະບົດ ເຊິ່ງມີທ່າກ້າວໜ້າຫລາຍດ້ານ ໂດຍສະເພາະແມ່ນ ດ້ານພື້ນຖານໂຄງລ່າງ ອັນເປັນການປູພື້ນຖານ ໃຫ້ກັບປະຊາຊົນ ໄດ້ເຂົ້າເຖິງການບໍລິການຂອງລັດໄດ້ດີຂຶ້ນເລື້ອຍໆ.
ທ່ານ ສົມສະຫວາດ ເລັ່ງສະຫວັດ ຍັງໄດ້ຮຽກຮ້ອງໃຫ້ລັດຖະບານ ສືບຕໍ່ຈັດຕັ້ງປະຕິບັດໂຄງການ ທລຍ ນີ້ຕໍ່ໄປ, ພ້ອມທັງສືບຕໍ່ໃຫ້ ການສະໜັບສະໜູນ ຈັດສັນງົບປະມານຂຶ້ນຕື່ມ ເຖິງແມ່ນວ່າປະເທດ ຂອງພວກເຮົາຈະເປັນປະເທດ ທີ່ມີລາຍຮັບປານກາງກໍຕາມ ແຕ່ຕົວຈິງປະຊາຊົນ ໃນເຂດຊົນນະບົດ ຍັງມີຄວາມທຸກຍາກ ຫລາຍສົມຄວນ ແລະ ອັດຕາສ່ວນຄວາມທຸກຍາກ ຂອງປະເທດເຮົາຍັງສູງກວ່າ ປະເທດອ້ອມຂ້າງ.
Cr.KPl
