ພິທີເຊັນສັນຍາ ຮ່ວມມືການໃຫ້ບໍລິການ ດ້ານໂທລະຄົມມະນາຄົມ ໃນເຂດເສດຖະກິດສະເພາະບໍ່ເຕນແດນງາມ ແຂວງຫລວງນ້ຳທາ ສປປ ລາວ ໄດ້ມີຂຶ້ນຫວ່າງບໍ່ດົນມານີ້ ທີ່ຄອນຫລວງວຽງຈັນ, ລະຫວ່າງ ທ່ານ ຈິດປະສົງ ໜູແກ້ວໄກສອນ ຮອງຜູ້ອຳນວຍການໃຫຍ່ບໍລິສັດລັດວິສາຫະກິດລາວ ໂທລະຄົມມະນາຄົມ ແລະ ທ່ານ ນາງ ຢາງຢ້າຫົງ ຮອງຜູ້ອຳນວຍການ ກຸ່ມບໍ ລິສັດພັດທະນາ ເຂດເສດຖະກິດສະເພາະ ບໍ່ເຕນລາວຈຳກັດຈັດ, ໂດຍມີພາກສ່ວນກ່ຽວຂ້ອງຂອງ ທັງສອງຝ່າຍເຂົ້າຮ່ວມ ເປັນສັກຂີພິຍານ.
ການລົງນາມໃນຄັ້ງນີ້, ບໍລິສັດລັດວິສາຫະກິດ ລາວໂທລະຄົມມະນາຄົມ ເປັນຜູ້ສະໜອງການໃຫ້ບໍລິການ ທາງດ້ານການສື່ສານ ໂທລະຄົມມະນາຄົມ ແບບຄົບວົງຈອນ ໃນເຂດເສດຖະກິດສະເພາະ ບໍ່ເຕນແດນງາມ ບ້ານບໍ່ເຕນ, ເມືອງນ້ຳທາ ແຂວງຫລວງນ້ຳທາ ເປັນເວລາ 5 ປີ ເພື່ອອຳນວຍຄວາມສະດວກ ທາງດ້ານພື້ນຖານໂຄງລ່າງການສື່ສານ ໂທລະຄົມມະນາຄົມ ທີ່ສະດວກສະບາຍ, ທັນສະໄໝ ແລະ ໄດ້ມາດຕະຖານ ໃຫ້ການຈັດຕັ້ງປະຕິບັດ ແຜນການພັດທະນາ ຂອງກຸ່ມບໍລິສັດພັດທະນາ ເຂດເສດຖະກິດ ສະເພາະບໍ່ເຕນລາວຈຳກັດ ໃຫ້ບັນລຸຕາມຈຸດປະສົງ ທີ່ວາງໄວ້ ໃນການຮ່ວມມືພັດທະນາ ໜຶ່ງແລວທາງໜຶ່ງ ເສດຖະກິດ ລະຫວ່າງສອງພັກ, ລັດ ລາວ-ຈີນ ທີ່ໄດ້ລົງນາມກັນໄວ້.
ລາວໂທລະຄົມ ຄືຜູ້ນຳໃນການໃຫ້ບໍລິການທາງດ້ານການສື່ສານ ໂທລະຄົມມະນາຄົມ ແບບຄົບວົງຈອນຜູ້ທຳອິດ ໃນ ສປປ ລາວ ນັບແຕ່ປີ1996ເປັນຕົ້ນມາ ຈົນເຖິງປັດຈຸບັນ ສາມາດຕອບສະໜອງ ການບໍລິການລູກຄ້າ ທັງລະບົບໃຊ້ສາຍ ແລະ ບໍ່ມີສາຍ ໄດ້ຫລາຍກວ່າ 3,5ລ້ານຄົນ ໃນຂອບເຂດທົ່ວປະເທດ. ໃນປີ 2011ລາວໂທລະຄົມ ໄດ້ເປີດໃຫ້ບໍລິການ 4G ຢ່າງເປັນທາງການ, ເຊິ່ງເປັນບໍລິສັດທຳອິດ ໃນ ສປປ ລາວ ແລະ ເປັນປະເທດທີ 2ໃນຂົງເຂດອາຊີ ຕາເວັນອອກສ່ຽງໃຕ້ ຮອງຈາກສິງກະໂປ. ຈາກນັ້ນ, ໃນປີ 2017ລາວໂທລະຄົມ ໄດ້ເປີດໃຫ້ບໍລິການ 4,5G ໃນນະ ຄອນຫລວງວຽງຈັນ ແລະ ຂະຫຍາຍໄປສູ່ບັນດາແຂວງຕ່າງໆ ໃນຂອບເຂດທົ່ວປະເທດ.
Cr.KPL