ບໍ່ດົນຜ່ານມານີ້, ເມືອງໂຂງໄດ້ຈັດພິທີເປີດງານແຂ່ງຂັນຊ່ວງເຮືອປະເພນີປະຈຳປີ 2018 ຂຶ້ນຢ່າງເປັນທາງການທີ່ບໍລິເວນທ່າສາລາແຄມຂອງປະຈຳເມືອງ; ໃຫ້ກຽດເຂົ້າຮ່ວມເປັນປະທານໃນພິທີມີທ່ານ ສົມສະໜິດ ບຸດຕິວົງ ຮອງເຈົ້າແຂວງຈຳປາສັກ, ທ່ານ ສະນັ່ນ ສີພາພົມມະຈັນ ເຈົ້າເມືອງໆໂຂງ, ມີບັນດາທ່ານຜູ້ອຳນວຍການບໍລິສັດ, ຫ້າງຮ້ານ, ແຂກຖືກເຊີນ, ພໍ່ແມ່ປະຊາຊົນຊາວເມືອງໂຂງກໍ່ໄດ້ເຂົ້າຮ່ວມຢ່າງຟົດຟື້ນມ່ວນຊື່ນ ແລະ ພິເສດຍັງມີຮອງເຈົ້າແຂວງຄຳມ່ວນກໍ່ໄດ້ເຂົ້າຮ່ວມ.
ໂອກາດນີ້ທ່ານ ສະນັ່ນ ສີພາພົມມະຈັນ ເຈົ້າເມືອງໆໂຂງກໍ່ໄດ້ກ່າວເປີດຈຸດປະສົງໃນການຈັດງານຄັ້ງນີ້ໂດຍສັງເຂບວ່າ: ການຈັດງານແຂ່ງຂັນຊ່ວງເຮືອປະເພນີປະຈຳປີ 2018 ນີ້ກໍ່ເພື່ອເປັນການສືບທອດປະເພນີ ແລະ ເພີ່ມພູນຄູນສ້າງສິລະປະວັດທະນະທຳອັນດີງາມທີ່ເປັນເອກະລັກຂອງຊາດ ກໍ່ຄືຂອງທ້ອງຖິ່ນ, ເປັນການສ້າງບັນຍາກາດໃຫ້ມີຄວາມໝາຍຄວາມຄຳຄັນ ເວົ້າລວມກໍ່ເພື່ອສ້າງຄວາມເບີກບານມ່ວນຊື່ນໃຫ້ກັບພໍ່ແມ່ປະຊາຊົນຊາວເມືອງ ພາຍຫຼັງທີ່ສຳເລັດການເກັບກ່ຽວມ້ຽນມັດເຂົ້ານາປີ ແລະ ຫັນໜ້າລົງສູ່ການຜະລິດລະດູແລ້ງຂອງໃຜລາວ; ພ້ອມດຽວກັນນັ້ນ ກໍ່ເພື່ອໃຫ້ປະຊາຊົນໄດ້ນຳເອົາຜົນລະປູກກໍ່ຄືຜົນຜະລິດຂອງແຕ່ລະທ້ອງຖິ່ນ, ເຄື່ອງຫັດຖະກຳຕ່າງໆມາວາງສະແດງ ແລະ ຂາຍໃຫ້ແຂກທີ່ມາທ່ຽວຊົມ, ເປັນການຊຸກຍູ້ສົ່ງເສີມການທ່ອງທ່ຽວ, ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມນັບມື້ນັບຫຼາຍຂຶ້ນ. ໂດຍລວມແລ້ວ ການຈັດງານຄັ້ງນີ້ທັງເປັນການກະຕຸກຊຸກຍູ້ສົ່ງເສີມການແຂ່ງຂັນຊ່ວງເຮືອໃຫ້ມີການຂະຫຍາຍຕົວເປັນຂະບວນກວ້າງຂວາງ ແລະ ເປັນການເສີມສ້າງຄວາມສາມັກຄີ, ສ້າງສາຍສຳພັນອັນດີງາມລະຫວ່າງຄະນະເຮືອຜູ້ເຂົ້າແຂ່ງຂັນຢູ່ພາຍໃນເມືອງ ແລະ ຕ່າງເມືອງໃຫ້ມີຄວາມຮັດແໜ້ນຢິ່ງຂຶ້ນກວ່າເກົ່າ.
ຂ່າວແຈ້ງຕື່ມວ່າ: ການແຂ່ງຂັນຊ່ວງເຮືອປະຈຳປີ 2018 ທີ່ເມືອງໂຂງໄດ້ມີເຮືອເຂົ້າຮ່ວມແຂ່ງຂັນທັງໝົດມີຈຳນວນ 36 ລຳ, ໃນນັ້ນມີເຮືອປະເພນີລຸ້ນ 33 ສີພາຍມີຈຳນວນ 11 ລຳ, ເຮືອສູດລຸ້ນ 33 ສີພາຍມີຈຳນວນ 6 ລຳ, ເຮືອລຸ້ນ 28 ສີພາຍມີຈຳນວນ 10 ລຳ ແລະ ເຮືອລຸ້ນ 12 ສີພາຍມີຈຳນວນ 9 ລຳ. ສຳລັບຜົນການແຂ່ງຂັນຜົນປະກົດວ່າ: ເຮືອປະເພນີລຸ້ນ 33 ສີພາຍຊະນະເລີດໄດ້ແກ່ເຮືອບ້ານເວີນສົມ, ທີ 2 ໄດ້ແກ່ເຮືອກອງພົນທີ 5 ແລະ ທີ 3 ໄດ້ແກ່ເຮືອເມືອງມູນລະປະໂມກ, ເຮືອສູດລຸ້ນ 33 ສີພາຍຊະນະເລີດໄດ້ແກ່ເຮືອບ້ານເວີນສົມ, ທີ 2 ໄດ້ແກ່ເຮືອຫ້ອງວ່າການປົກຄອງເມືອງໂຂງ ແລະ ທີ 3 ໄດ້ແກ່ເຮືອບ້ານດອນເດດ, ເຮືອລຸ້ນ 28 ສີພາຍຊະນະເລີດໄດ້ແກ່ເຮືອຫ້ອງວ່າການປົກຄອງເມືອງໂຂງ, ທີ 2 ໄດ້ແກ່ເຮືອບ້ານທ່າໂພ ແລະ ທີ 3 ໄດ້ແກ່ເຮືອບ້ານຫິນສິ່ວ, ເຮືອລຸ້ນ 12 ສີພາຍຊະນະເລີດໄດ້ແກ່ເຮືອສ່ວນນ້ຳບ້ານຈານ, ທີ 2 ໄດ້ແກ່ເຮືອບ້ານເວີນສົມ ແລະ ທີ 3 ໄດ້ແກ່ເຮືອບ້ານຫີນສິ່ວ. ສຳລັບຜົນການປະກວດເຮືອງາມປະກົດວ່າເຮືອມາຈາກບ້ານດອນຫວດ ຍາດໄດ້ຊະນະເລີດ, ທີ 2 ໄດ້ແກ່ເຮືອບ້ານຫີນສິ່ວ ແລະ ທີ 3 ໄດ້ແກ່ເຮືອບ້ານທໍລະທີ.
ທີ່ມາ: facebook.com/783524595328102