ທີ່ໂຮງແຮມ ລາວພຣາຊາ ນະຄອນຫລວງວຽງຈັນ, ຄະ ນະຜູ້ແທນສະຫະພາບເອີຣົບ ຮ່ວມກັບ ກະຊວງສຶກ ສາທິການ ແລະ ກິລາ ແລະ ອົງການຢູນິເຊບ UNICEF ໄດ້ຈັດກອງປະຊຸມຄະນະກໍາມະການ ຄຸ້ມຄອງງົບປະ ມານຂອງໂຄງການສະໜັບສະໜູນ ດ້ານການສຶກສາຂັ້ນພື້ນຖານ ເພື່ອເສີມສ້າງລະບົບການສຶກສາໃນ ສປປ ລາວ, ໂດຍໃຫ້ກຽດເປັນປະທານຮ່ວມ ຂອງ ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ລີໂອ ຟາເບີ ເອກອັກຄະລັດຖະທູດ ສະຫະພາບເອີຣົບ ປະຈໍາ ສປປ ລາວ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ຈຸດປະສົງການຈັດກອງປະຊຸມຄັ້ງນີ້, ເພື່ອທົບທວນຄວາມກ້າວໜ້າຂອງໂຄງການ ໃນການສະໜັບສະໜູນການສຶກສາ ຂອງສະຫະພາບເອີຣົບ (EU) ແລະ ປຶກສາຫາລືກ່ຽວກັບເງື່ອນໄຂ, ເປົ້າໝາຍຫລັງຈາກ ການນໍາໃຊ້ເງິນງວດທໍາອິດ 7 ລ້ານເອີໂຣ ເຊັນຮັບໂດຍສະຫະພາບເອີຣົບ ກັບ ລັດຖະບານ ສປປ ລາວ ໃນເດືອນຕຸລາ ທີ່ຜ່ານມາ.
ໃນໂອກາດດຽວກັນ, ທ່ານ ນາງ ແສງເດືອນ ຫລ້າຈັນທະບູນ ໄດ້ໃຫ້ຮູ້ວ່າ: ກະຊວງສຶກສາທິການ ແລະ ກິ ລາ ມຸ່ງໝັ້ນທີ່ຈະຫລຸດຜ່ອນຄວາມແຕກໂຕນ ດ້ານການສຶກສາໃນເຂດຊົນນະບົດ ແລະ ຕົວເມືອງ, ໂດຍການຂະຫຍາຍການຄຸ້ມຄອງຂະແໜງການສຶກສາ ນໍາໃຊ້ຊັບພະຍາກອນທີ່ມີປະສິດທິພາບ ແລະ ປະສິດທິຜົນ, ໃຫ້ສອດຄ່ອງກັບແຜນການພັດທະນາ ຂະແໜງການສຶກສາຂອງລັດຖະບານລາວ (ESDP) ໃນຊຸມ ປີ 2016-2020. ນອກນັ້ນ, ໂຄງການດັ່ງກ່າວ ໄດ້ເນັ້ນໜັກໃສ່ພື້ນທີ່ດ້ອຍໂອກາດ ຈະໄດ້ຮັບການຈັດຕັ້ງປະຕິບັດຢູ່ໃນເຂດຊົນນະບົດ ແລະ ໂຮງຮຽນຫ່າງໄກສອກຫລີກຂອງປະເທດ, ໂດຍສະໜອງການສະໜັບສະໜູນ ດ້ານວິຊາການໃນລະດັບຊາດ ແລະ ລະດັບແຂວງ ພາຍໃຕ້ການສະໜັບສະໜູນງົບປະມານ ໃຫ້ກະຊວງສຶກສາທິການ ແລະ ກິລາ, ພ້ອມກັບມີມາດຕະການທີ່ແນ່ນອນ.
#insidelaos
#ອິນໄຊລາວ
Cr.KPL