ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດແຫ່ງ ສປປລາວ ໄດ້ໃຫ້ກຽດຕ້ອນຮັບ ທ່ານ ຫວັງອີ້, ທີ່ປຶກສາແຫ່ງລັດ, ລັດຖະມົນຕີກະຊວງການຕ່າງປະເທດແຫ່ງ ສປຈີນ ພ້ອມດ້ວຍຄະນະ ພ້ອມມີພິທີພົບປະຫາລືການຮ່ວມມືຂອງສັງພັກ-ສອງລັດໃນບັນຫາທີ່ມີຄວາມສົນໃຈຮ່ວມກັນ.
ຈຸດປະສົງຂອງການພົບປະຄັ້ງນີ້, ສອງຝ່າຍ ໄດ້ຕີລາຄາສູງຕໍ່ການພົວພັນແບບຄູ່ຮ່ວມຍຸດທະສາດຮອບດ້ານໝັ້ນຄົງຍາວນານ ລະຫວ່າງ ສອງພັກ-ສອງລັດຖະບານ ກໍຄືປະຊາຊົນສອງຊາດ ລາວ-ຈີນ ທີ່ນັບມື້ນັບໄດ້ຮັບການເສີມຂະຫຍາຍດ້ວຍຄຸນນະພາບໃໝ່ຢ່າງບໍ່ຢຸດຢັ້ງ ທັງທາງກວ້າງ ແລະ ທາງເລິກ.
ການເປັນຄູ່ຮ່ວມຊະຕາກຳສັງຄົມນິຍົມ ລາວ-ຈີນ ທີ່ມີຄວາມໝາຍຍຸດທະສາດ ທີ່ບໍ່ສາມາດທັບມ້າງໄດ້, ການພົວພັນຮ່ວມມື ລາວ-ຈີນ ແມ່ນຢູ່ໃນລະດັບດີທີ່ສຸດ ແລະ ສູງທີ່ສຸດ, ເຊິ່ງສະແດງອອກໃນການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງຂອງສອງປະເທດ ຢ່າງປົກກະຕິ.
ນອກນີ້, ທັງສອງຝ່າຍ ກຳລັງຈັດຕັ້ງຜັນຂະຫຍາຍ ຂໍ້ຕົກລົງຂອງສອງສະຫາຍການນຳຢ່າງຕັ້ງໜ້າເຊິ່ງເຫັນວ່າມີຫຼາຍອັນມີຄວາມຄືບໜ້າ ເປັນຕົ້ນແມ່ນ:
1. ໂຄງການກໍ່ສ້າງເສັ້ນທາງລົດໄຟຄວາມໄວສູງ ແມ່ນສຳເລັດແລ້ວ 46%,
2. ໂຄງການກໍ່ສ້າງໂຮງຮຽນເຕັກນິກທາງລົດໄຟ ເພື່ອສະໜອງບຸກຄະລາກອນຮັບໃຊ້ທາງລົດໄຟ ກໍ່ໄດ້ມີການສຳຫຼວດ ແລະ ໄດ້ລົງນາມເອກະສານນຳກັນແລ້ວ ແລະ ກຳລັງເລັ່ງຈັດຕັ້ງຜັນຂະຫຍາຍທຶນຊ່ວຍເຫຼືອ ມູນຄ່າ 04 ຕື້ຢວນ ແລະ ຈັດລຽງໂຄງການບູລິມະສິດໃນ 08 ໂຄງການໃຫຍ່.
ພ້ອມນີ້, ສອງຝ່າຍ ເຫັນດີໃຫ້ສືບຕໍ່ຊຸກຍູ້ພາກສ່ວນກ່ຽວຂ້ອງຂອງຕົນ ໃນການສ້າງແຜນແມ່ບົດ ວ່າດ້ວຍ ການສ້າງຄູ່ຮ່ວມຊະຕາກຳ ລາວ-ຈີນ, ແລວທາງເສດຖະກິດ ລາວ-ຈີນ ເພື່ອໃຫ້ໄດ້ເຊັນກັນໃນໄລຍະເວລາທີ່ ສະຫາຍ ປະທານປະເທດ ບຸນຍັງ ວໍລະຈິດ ຈະເດີນທາງໄປຢ້ຽມຢາມ ສປຈີນ ໃນເດືອນເມສາ 2019.
ຈາກນັ້ນ, ສອງຝ່າຍຍັງໄດ້ຕີລາຄາສູງຕໍ່ການຮ່ວມມື, ການປະສານສົມທົບ ແລະ ການສະໜັບສະໜູນເຊິ່ງກັນ ແລະ ກັນ ຂອງສອງກະຊວງການຕ່າງປະເທດ ລາວ-ຈີນ ອັນໄດ້ເຮັດໃຫ້ຖານະບົດບາດຂອງສອງກະຊວງ ກໍ່ຄືສອງປະເທດສູງເດັ່ນຂຶ້ນໃນເວທີພາກພື້ນ ແລະ ສາກົນ, ທັງເປັນການປະກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.
ໂອກາດນີ້, ທ່ານ ສະເຫຼີມໄຊ ກົມມະສິດ ກໍໄດ້ຕີລາຄາສູງຕໍ່ການຢ້ຽມຢາມ ຂອງທ່ານ ຫວັງອີ້ ພາຍຫຼັງໄດ້ຮັບແຕ່ງຕັ້ງເປັນທີ່ປຶກສາແຫ່ງລັດ:
1. ໄດ້ສະແດງຄວາມຂອບໃຈຕໍ່ຝ່າຍຈີນ ໄດ້ໃຫ້ການຊ່ວຍເຫຼືອ ແລະ ສະໜັບສະໜູນແກ່ ສປປລາວ ຕະ ຫຼອດມາ ໃນບັນດາໂຄງການຕ່າງໆຂອງການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ແລະ ການຮ່ວມມືອາຊຽນ-ຈີນ,
2. ພ້ອມດຽວກັນນີ້, ກໍ່ສະເໜີໃຫ້ສອງຝ່າຍ ສືບຕໍ່ປະສານສົມທົບກັນຢ່າງສະໜິດແໜ້ນ ເພື່ອເອົາທັດສະນະຮ່ວມກັນ ຕໍ່ບັນຫາທີ່ພົ້ນເດັ່ນໃນພາກພື້ນ ກໍ່ຄືສາກົນ, ຊ່ວຍສ້າງພະນັກງານຄົ້ນຄວ້າ ແລະ ວິໄຈບັນຫາຕ່າງໆທີ່ພົ້ນເດັ່ນ,
3. ພິຈາລະນາຊ່ວຍເຫຼືອການປັບປຸງລະບົບໄອທີພາຍໃນກະຊວງ, ພິຈາລະນາຍົກລະດັບດ່ານເມືອງຄັງ ຂຶ້ນເປັນດ່ານສາກົນ, ສືບຕໍ່ແລກປ່ຽນບົດຮຽນລະຫວ່າງ ບັນດາກົມທີ່ກ່ຽວຂ້ອງຂອງທັງສອງກະຊວງ ໂດຍສະເພາະວຽກງານກວດກາ, ການເງິນ, ຊາຍແດນ ແລະ ອື່ນ.
ພາຍຫຼັງສຳເລັດການພົບປະສອງຝ່າຍ, ທ່ານ ສະເຫຼີມໄຊ ກົມມະສິດ ແລະ ທ່ານ ຫວັງອີ້ ໄດ້ເຂົ້າຮ່ວມເປັນສັກຂີພິຍານໃນພິທີລົງນາມເອກະສານ 02 ສະບັບ ຄື:
1. ສັນຍາ ວ່າດ້ວຍ ການສ້າງນາຍແປພາສາ ລາວ-ຈີນ,
2. ສານແລກປ່ຽນ ວ່າດ້ວຍ ການກໍ່ສ້າງໂຮງຮຽນມັດທະຍົມສົມບູນນາຊາຍທອງ.
ທີ່ມາ: facebook.com/918838951659164
#insidelaos
#ອິນໄຊລາວ