ກອງປະຊຸມ ອົງການປົກຄອງ ແຂວງ ໄຊຍະບູລີ ເປີດກວ້າງ ໄດ້ໄຂຂຶ້ນໃນທ້າຍອາທິດຜ່ານມານີ້, ໂດຍໄດ້ຊີ້ໃຫ້ເຫັນຜົນງານ 1 ປີຜ່ານມາ ແຂວງ ໄຊຍະບູລີ ໄດ້ເອົາໃຈໃສ່ປຸກລະດົມ, ຊຸກຍູ້ການ ຜະ ລິດເປັນ ສິນຄ້າຂອງປະ ຊາຊົນ ແລະ ບັນດາຫົວໜ່ວຍທຸລະກິດດ້ານຕ່າງໆຢ່າງຕັ້ງໜ້າ ອັນເຮັດໃຫ້ເສດຖະກິດຂອງແຂວງ ໄຊຍະບູລີ ສືບຕໍ່ຂະຫຍາຕົວໃນລະດັບ 8,7%, ມູນຄ່າຜະລິດຕະພັນພາຍໃນ GDPບັນລຸ 9.555 ຕື້ກີບ, ສະເລ່ຍໃສ່ຫົວ ຄົນໄດ້ 3.012 ໂດລາສະຫະລັດ, ເກັບລາຍຮັບເຂົ້າງົບປະມານໄດ້ 883 ຕື້ກີບ, ເທົ່າກັບ 96,44% ຂອງແຜນການປີ.
ທ່ານ ຍັນຍົງ ສີປະເສີດ ຮອງເຈົ້າແຂວງ ໄຊຍະບູລີ ກ່າວວ່າ: ໂດຍລວມແລ້ວການຈັດຕັ້ງ ປະຕິບັດແຜນພັດທະນາເສດຖະກິດ-ສັງຄົມ ປີ 2018 ແມ່ນໄດ້ສືບຕໍ່ຫັນລົງກໍ່ສ້າງຮາກຖານການເມືອງຢູ່ຊົນນະບົດ, ແກ້ໄຂຄວາມທຸກຍາກ ແລະ ຈັດສັນອາຊີບຄົງທີ່ໃຫ້ປະຊາຊົນ ຕິດພັນກັບການສ້າງບ້ານພັດທະນາ. ປະຕິບັດໂຄງການລົງຂອງລັດມີທັງໝົດ 340 ໂຄງການ, ໄດ້ຮັບເພດານທຶນທັງໝົດ 58,16 ຕື້ກີບ, ໃນນັ້ນທຶນພາຍໃນ 56 ຕື້ກີບ, ທຶນຕ່າງປະເທດ 2,16 ຕື້ກີບ, ສາມາດປະຕິບັດໄດ້ 100 %, ທົ່ວແຂວງສາມາດລະດົມເງິນຝາກໄດ້ທັງໝົດ 1.701,2 ຕື້ກີບ, ທຽບໃສ່ປີຜ່ານມາເພີ່ມຂຶ້ນ 43 %, ເນື້ອທີ່ເກັບກ່ຽວເຂົ້າທັງໝົດ 45.106 ກວ່າເຮັກຕາ, ຜົນຜະລິດໄດ້ 181.303 ກວ່າໂຕນ, ເທົ່າກັບ 90,65 % ຂອງແຜນການປີ, ທຽບໃສ່ປີຜ່ານມາຫຼຸດລົງ 11.749 ໂຕນ, ສາເຫດຫຼຸດລົງຍ້ອນ ມີການສ້ອມແປງຊົນລະປະທານ ແລະ ການລະບາດຂອງສັດຕູພືດ, ນອກນີ້ຍັງໄດ້ປູກພືດເປັນສິນຄ້າ ປະຕິບັດໄດ້ 107.971 ກວ່າເຮັກຕາ, ເທົ່າກັບ 95,56 % ຂອງແຜນການປີ, ທຽບໃສ່ປີຜ່ານມາ ຫຼຸດລົງ ເກືອບ 100 ເຮັກຕາ, ຜົນຜະລິດໄດ້ທັງໝົດ 1 ລ້ານກວ່າໂຕນ.
ກອງປະຊຸມຄັ້ງນີ້ ຈະໄດ້ຮັບຟັງ ແລະ ຄົ້ນຄວ້າປະກອບຄຳຄິດ-ຄຳເຫັນໃສ່ຮ່າງນິຕິກຳ ໃຕ້ກົດໝາຍໃນຂົງເຂດວຽກງານປ້ອງກັນຄວາມສະຫງົບ, ກອງທຶນພັດທະນາກະສິກໍາຍືນຍົງ ແລະ ວຽກງານວິທະຍາສາດ ແລະ ເຕັກໂນໂລຊີ ເພື່ອ ນຳສະເໜີສະພາປະຊາຊົນແຂວງຮັບຮອງເຊັ່ນ:ຮ່າງຂໍ້ຕົກລົງວ່າດ້ວຍການສ້າງຕັ້ງກອງທຶນຄວບ ຄຸມ, ສະກັດກັ້ນ ແລະ ຕ້ານຢາເສບຕິດ, ຮ່າງຂໍ້ຕົກລົງວ່າດ້ວຍກອງທຶນພັດທະນາກະສິກຳຍືນຍົງ, ຮ່າງຂໍ້ຕົກລົງວ່າດ້ວຍການຄຸ້ມຄອງ ແລະ ພັດທະ ນາສວນ ອຸທິຍານພຶກ ສາສາດຜາຊ້າງ-ຜາຂີ້ໝິ້ນ ແຂວງໄຊຍະບູລີ.
ທີ່ມາ: ຂປລ
Hits: 4
