ຕະຫລອດໄລຍະ 1 ປີຜ່ານມາ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງອຸດົມໄຊ ໄດ້ເອົາໃຈໃສ່ຈັດຕັ້ງປະຕິບັດວຽກງານຈຸດສຸມ ຂອງຕົນຢ່າງຕັ້ງໜ້າ ໂດຍສະເພາະແມ່ນວຽກງານຄຸ້ມຄອງທີ່ດິນ ເຊິ່ງສາມາດ ອອກໃບຕາດິນຢ່າງເປັນລະບົບ ແລະ ສະເພາະຕອນໃນທົ່ວແຂວງ ໄດ້ທັງຫມົດ 6.063 ຕອນ, ເທົ່າກັບ 135% ທຽບໃສ່ແຜນການປີແມ່ນ 4.500 ຕອນ ເຊິ່ງປະຕິບັດໄດ້ເກີນແຜນທີ່ກຳນົດໄວ້.
ຕາງໜ້າ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງອຸດົມໄຊ ລະບຸວ່າ: ນອກຈາກການອອກໃບຕາດິນຢ່າງເປັນລະບົບ ແລະ ສະເພາະຕອນ ໃນທົ່ວແຂວງແລ້ວ ຍັງສາມາດອອກໃບແຈ້ງ 01 ໄດ້ທັງຫມົດ 1.595 ຕອນ ເທົ່າກັບ 35% ແຜນປີແມ່ນ 4.500 ຕອນ, ລົງຈົດສະຖິຕິສໍາມະໂນທີ່ດິນ ໄດ້ 7.658 ຕອນ, ເທົ່າກັບ 109% ແຜນການປີ 7.000 ຕອນ, ໄດ້ອອກປຶ້ມສໍາມະໂນທີ່ດິນໄດ້ 4.428 ຫົວ ເທົ່າກັບ 82%, ຈົນທະບຽບໃບຕາດິນຕາມແຜນ 350 ຕອນ ແຕ່ປະຕິບັດໄດ້ 418 ຕອນ ເທົ່າກັບ 119% ແລະ ຈົດທະບຽນຈໍານອງໄດ້ ທັງຫມົດ 291 ຕອນ ເທົ່າກັບ 37%.
ນອກນີ້, ໄດ້ປະກອບໃບອະນຸຍາດນຳໃຊ້ດິນລັດ ໃຫ້ແກ່ບັນດາພະແນກການ, ບໍລິສັດ ແລະ ພະນັກງານບໍານານ ທີ່ໄດ້ຮັບອະນຸຍາດນຳໃຊ້ທີ່ດິນລັດ ໄດ້ຈຳນວນ 11 ຕອນ ແລະ ສໍາຫລວດວັດແທກທີ່ດິນ ໃຫ້ແກ່ນັກລົງທຶນທັງພາຍໃນ ແລະ ຕ່າງປະເທດມາຂໍລົງທຶນໄດ້ 5 ກິດຈະການ.
ທີ່ມາ: ຂປລ
Hits: 22
