ກອງປະຊຸມສະຫຼຸບວຽກງານການເຄື່ອນໄຫວປີ 2018 ແລະ ທິດທາງແຜນການສູ້ຊົນ 2019 ຂອງພະແນກ ຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ (ຖວທ ນວ) ຈັດຂຶ້ນວັນທີ 10 ມັງກອນ 2018 ຢູ່ພະແນກດັ່ງກ່າວ ໂດຍເປັນປະທານຂອງທ່ານ ຄຳປະດິດ ເຂັມມານິດ ຫົວໜ້າພະແນກ ຖວທ ນວ ມີທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງ ຖວທ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ຄຳຄູນ ໃບລາຕີ ຮອງຫົວໜ້າພະແນກ ຖວທ ນວ ໄດ້ຍົກໃຫ້ເຫັນຜົນສຳເລັດໃນການຈັດຕັ້ງປະຕິບັດວຽກງານໃນ 1 ປີຜ່ານມາ ເຊິ່ງສາມາດຍາດໄດ້ຜົນງານໄດ້ຫຼາຍດ້ານ ພິເສດໃນປີທ່ອງທ່ຽວລາວ 2018 ໄດ້ຍົກລະດັບການນຳທ່ຽວລະດັບຊາດ 2 ຄັ້ງ ເລັ່ງໃສ່ຕົວເລກຄາດໝາຍວາງໄວ້ ເພື່ອດຶງດູດນັກທ່ອງທ່ຽວໃຫ້ໄດ້ 2 ລ້ານຄົນ ໃນປີ 2020 ຈາກຕົວເລກໃນ 11 ເດືອນ 2018 ໄດ້ຮັບນັກທ່ອງທ່ຽວ 1.778.000 ກວ່າຄົນ (ບໍ່ລວມເດືອນທັນວາ) ຕາມປົກກະຕິເດືອນທັນວາ (100.000200.000 ຄົນ) ແລະ ຄາດວ່າຕົວເລກໝົດປີຈະບໍ່ຫຼຸດ 1,81,9 ຄົນ ເຊິ່ງຖືວ່າບໍ່ຫຼຸດຫຼາຍຈາກເປົ້າໝາຍທີ່ວາງໄວ້.
ສ່ວນຄາດໝາຍສູ້ຊົນປີ 2019 ນອກຈາກການສືບຕໍ່ສຸມໃສ່ແກ້ໄຂບາງບັນຫາທີ່ຍັງຄ້າງຄາ ຈະຕ້ອງໄດ້ເລັ່ງປັບປຸງວຽກງານດ້ານວິຊາການ ສູ້ຊົນຈັດຕັ້ງປະຕິບັດຕົວເລກຄາດໝາຍທີ່ວາງໄວ້ ເລັ່ງປັບປຸງລະບຽບການ ແກ້ໄຂປາກົດການຫຍໍ້ທໍ້ພາຍໃນຖັນແຖວວຽກງານ ຖວທ ແກ້ໄຂ ກວດກາຄວາມບໍ່ເປັນລະບຽບພາຍໃນ 9 ເມືອງ ໂດຍສະເພາະ ການກວດກາສຽງດັງເກີນກຳນົດ ການປະຕິບັດໂມງເວລາຂອງຫ້າງຮ້ານບໍລິການຕ່າງໆ ບັນຫາໂສເພນີ ແລະ ປ້າຍໂຄສະນາຕ່າງໆ ພິເສດ ແມ່ນການກຽມຄວາມພ້ອມກ່ຽວກັບການເປີດປີທ່ອງທ່ຽວ ລາວຈີນ 2019.
ຈາກນັ້ນ ທ່ານ ອຸ່ນທວງ ຂາວພັນ ກ່າວວ່າ: ບັນຫາສຳຄັນອັນຮີບດ່ວນ ຄືການກະກຽມຄວາມພ້ອມໃນການເປີດປີທ່ອງທ່ຽວ ລາວ-ຈີນ ໃນທ້າຍເດືອນມັງກອນ 2019 ເຊິ່ງ ນວ ເປັນຈຸດໃຈກາງ ເປັນສູນລວມເສດຖະກິດສັງຄົມຂອງປະເທດ ພະແນກ ຖວທ ນວ ຈະຕ້ອງສືບຕໍ່ເປັນເຈົ້າການໃນການເຂັ້ມງວດກວດກາ ໃນບັນດາວຽກງານຂະແໜງການທີ່ກ່ຽວຂ້ອງ ເປັນຕົ້ນ ລະບຽບເຮືອນພັກ ໂຮງແຮມ ຮ້ານອາຫານ ສະຖານທີ່ບໍລິການຕ່າງໆ ໃຫ້ມີການກວດກາຢ່າງຕໍ່ເນື່ອງ ລວມທັງວຽກງານໂຄສະນາປະຊາສຳພັນ ກໍ່ຕ້ອງເອົາໃຈໃສ່ເປັນພິເສດ ເພື່ອໃຫ້ປະຊາຊົນໄດ້ຮັບຮູ້ ເຊື່ອມຊຶມ ເຂົ້າໃຈ ແລະ ປະກອບສ່ວນ ຊຸກຍູ້ໃຫ້ຂະບວນດັ່ງກ່າວ ດຳເນີນໄປຢ່າງມີບັນຍາກາດ ແລະ ບັນລຸຜົນສຳເລັດຕາມລະດັບຄາດໝາຍທີ່ວາງໄວ້.
ທີ່ມາ: ວຽງຈັນໃໝ່