ທີ່ກະຊວງສາທາລະນະສຸກ ນະຄອນຫລວງວຽງຈັນ, ທ່ານ ຊິນຊອງ ຊູນ (Mr Shin Sunh-soon), ເອກອັກຄະລັດຖະທູດ ສ ເກົາຫລີ ປະຈຳລາວ ໄດ້ມອບລົດ ນຳສົ່ງຄົນເຈັບ ຈຳນວນ 03 ຄັນ ລວມມູນຄ່າ 1.357 ລ້ານກີບ ຫລື ປະມານ 156.000 ໂດລາສະຫະລັດ, ເຊິ່ງເປັນການຊ່ວຍເຫລືອລ້າ ຈາກອົງການກອຍກາ (KOICA) ໃຫ້ທ່ານ ດຣ.ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ເພື່ອນຳໃຊ້ເຂົ້າໃນ ການຊ່ວຍ ເຫລືອຜູ້ປະສົບໄພນ້ຳຖ້ວມ ທີ່ເມືອງສະໜາມໄຊ ແຂວງອັດຕະປື.
ທ່ານ ດຣ.ບຸນກອງ ສີຫາວົງ ໄດ້ກ່າວສະແດງຄວາມຂອບໃຈຕໍ່ລັດຖະບານ ແລະ ປະຊາ ຊົນ ສ ເກົາຫລີ ໃນການຊ່ວຍເຫລືອຄັ້ງນີ້, ເຊິ່ງລົດທີ່ໄດ້ຮັບ ການຊ່ວຍເຫລືອຄັ້ງນີ້ ແມ່ນຈະຖືກນຳໃຊ້ການຂົນສົ່ງຄົນເຈັບ ໃນວຽກງານພາກສະໜາມ ເຂດທີ່ຖືກຜົນກະທົບຈາກໄພພິບັດ ທີ່ເມືອງສະໜາມໄຊ ແຂວງອັດຕະປື ແລະ ເພື່ອເປັນການຊ່ວຍເຫລືອ ໃຫ້ພະນັກງານແພດໝໍ ນຳສົ່ງຄົນເຈັບ ໄດ້ຮັບການປິ່ນປົວທັນເວລາ ແລະ ມີປະສິດທິພາບສູງກວ່າເກົ່າ, ພ້ອມທັງຢືນຢັນຈະນຳໃຊ້ພາຫະ ນະດັ່ງກ່າວ ເພື່ອຊ່ວຍເຫລືອບໍລິການ ຄົນເຈັບໃຫ້ໄດ້ຢ່າງຍາວນານ.
ທີ່ມາ: ຂປລ